Read Biblia Mixe de Quetzaltepec Efesios 3 Bible Online

Efesios 3 - Biblia Mixe de Quetzaltepec bible

Efesios 3

¹Paatyës, ëjts Pablo, yap tsumy n'ity mëët yë'ëkyëjxm koos ja Kristë nmëtuny ets miits xytyuk'oy'attëty mëti'ipë ka'ap jyutiis'atën.

²Miits wa'ats xynyijawëtë ko Tiosës të xytyuknipëky koos nkajpxwa'kxëty mëti'ipë të tuknipëjktaakën ma miitsëtyën mëët ja tsyojkën jya'awën.

³Tëës ja Tios xytyuk'ixy xytyuknijawë ja yu'utsypë etsës nkajpxwa'kxëty, ijxtëm wäänë të ntuk'ëwaanëtën nokyjoty.

⁴Ko miits yë noky xykyajpxtëty, ënät xymyëpëktëty koos nijawë ja Kristë jyä'ä mëti'ipë ijty kayajnija'apën.

⁵Ni pën ijty tëëyëp tkanijawë, je'eyëp ko tyam tëë ja Tios mëët ja kyënu'kxymyëk'ajtën tuk'ixy tuknijawë ja wa'atspë y'ijxpëjkpëtëjk ets ja kyäjpxynyajxpëtëjk.

⁶Ya'atë ijty kayajnija'ap: mëët ja oy aaw oy ayuk Tios tmëkajpxta'ay ja naax kajpn ets yajpaatëty mëët ja Kristë Jesús ets t'ëxajëtëty mëti'ipë ja Tios të twaantä'äkyën.

⁷Tios të tuny ja mëyajtën ma ëjtsën mëët ja y'oy jot y'oy winma'any ets pya'ëyo'ow nyajts'ëyo'owën, tëëjës xytyuk'ixy ja myëk'ajtën.

⁸Oyës ëjts ni'ik naxym nyajpaaty ma ja Tios ja nyaax kyajpnën wa'atspë; e tëëjës xytyuknipëky etsës nkajpxwa'kxëty ja aaw ayuk mëti'ipë ka'ap tjëkyepyën wi'ix nkajpxtë'kxmëty, etsës n'ëwaanëtëty ja ja'ay mëti'ipë ka'ap jyutiis'atën wi'ix ja Kristë myëjëtyën.

⁹Ja Tios, mëti'ipë tu'kë'ëyë winë yajkojën, yë'ëjës të xytyuknipëky etsës ja ja'ay ntuk'ëwaanëtëty mëti'ipë tyuknipëjktakëpën, mëti'ipë ijty ja ja'ay ka'ap nijawëtën.

¹⁰Jëtu'un'äämpy tyam, mëët ja mëpëjkpëtëjkëty, nijawëtëty ja tsajpjotmëpë yajkutujkpëtëjk ja Tios ja wyijy'ajtën kyejyajtën mëti'ipë kanaakjëjp nikëxë'kpën.

¹¹Jëtu'un ja Tios të tuny winë ma ja Kristë Jesusën ijxtëm tëëyëp tuknipëjktaakën.

¹²Mëët ko ja Kristë të nmëpëjkëmë, jyëkyejpy nmëwinko'onmëty ja Tios mëët ja oy'aaw oyjyot.

¹³Paaty këtii xymyëmay xymyëtajtëty ko miits nku'ëyowëtë. Miits yë'ë mtuk'oy'ajtëp koos yap n'ity.

¹⁴Yë'ëkyëjxmës nwinkoxtänë ja Tios,

¹⁵ma ja xyëëw tsyoontën tëkokyë naaxwiinyëtë ja'ay ets tsajpjotmëpë yajpaatën.

¹⁶N'amëtoopy npëjktsoopyës ja Tios ets mjotmëkmo'ojëtëty ets myajpaatëty akujk jotkujk mëët ja mëk'ajtën mëti'ipë tso'onpën ma ja oypyë tsujpën, mëti'ipë myëët'ajtypyën ja Tios ja kyënu'kxymyëk'ajtën,

¹⁷wä'än ja Kristë t'ity ma miitsëtyën ko të xymyëpëktë, ets ja tsojkën ja'awën yajpaatëty xëmë ma miitsëtyën.

¹⁸Jëtu'un tëkokyë ja Tios ja nyaax kyajpn tja'akyukëtëty wi'ix myëjwiinëtyën, yenyëtyën, kyëjxmëtyën ets kyëkëtyën ja Kristë ja tsyojkën jya'awën.

¹⁹N'amëtoopy npëjktsoopyës ets xynyijawëtëty ya'atë tsojkën ja'awën, ko ni'ik myëjëty këtiinëm tii wiinkpë, ets ni'ikyë xypyaatëty ja Tios ja y'oyajtën.

²⁰E tyamm, mëj'äämpy ja Tios nyäxy, ko tmëët'aty ja mëk'ajtën ets winë tunëty, wäänëni'ik këtiinëm ijxtëm n'amëto'owëmën ëkë ijxtëm nmëma'ay nmëtajëmën, oy ko tmëët'aty ja kutujkën ets winë tunëty ma ëëtsajtëmën.

²¹Mëj'äämpy ja Tios nyäxy ma ja mëpëjkpëtëjkëtyën ets ma ja Kristë Jesusën, winë xëëw winë jëmëjt ets xëmëkyëjxm. Oy jyëtu'un'atëty.