Read Biblia Mixe de Quetzaltepec Filipenses 1 Bible Online

Filipenses 1 - Biblia Mixe de Quetzaltepec bible

Filipenses 1

¹Pablo ets Timoteo, Jesukristë myëtuunpë, tyam ntuknikäxtë ja kajpxpo'kxën miitsëty mëpëjkpëtëjkëty ni'ëmukë jampë yajpaatën Filipos ets mëti'ipë nyikopk'ajtëpën ja mëpëjkpëtëjkëty ets ni'ëmukë jënu'un yajpaatën mëët tu'ukyë mëët ja Kristë.

²Wä'än ja nTeety'ajtëm Tios ets Wintsën Jesukristë mmo'ojëtë ja kënu'kxën ets ja jotkujk'ajtën.

³Tëkok tëkok miits nja'amyätstë, nkukajpxëpës ja Tios;

⁴ets koos ja Tios nja'amyetsy, xëmë nimëpëjktsowëtë akujk jotkujk,

⁵jä'ä ko tu'knax të ntu'unëmë ets myëjwiin kyëjääjëty ja aaw ayuk oypyë, tyimtso'ontäky ko ojts mmëpëktë ets tyampaat.

⁶Njëjp'ijxypës ko ja oypyë tuunk mëti'ipë ja Tios yajtso'ontakën ma miitsëtyën, yë'ë oy yajtu'uye'eyäämpy koonëm ja Jesukristë wyimpitëty.

⁷Jëtu'un pyaat'atyë ko miits nmëmay nmëtajtëty, jä'ä ko mëk miits n'oyjyawëtë ets jä'ä ko nän mëët miits n'itë ma ja Tios ja kyënu'kxënën, oyës tsumy matsy nyajpaaty ëkë oyës ja kutuunktëjk nwinkuwa'akëty, ja oy aaw oy ayuk jootjoty nwinma'anyjyotyës yajpaaty.

⁸Tios nyija'ap ko miits mëk nja'ixa'antë mëët ja Wintsën Jesukristë ja tsyojkën jya'awën.

⁹N'amëtoopy npëjktsoopyës ja Tios ets wäänëni'ik ja m'oyjot m'oywyinma'anyëty jyaaktimkyëjääjëty ets ja Tios ni'ik mjaaktimmyo'ojëtëty ja wijy'ajt ets ja'aykyujkën,

¹⁰ets xynyijawëtëty wi'ix xywyin'ixtëty mëti'ipë oyën, jëtu'unts ja juukyajtën wa'atspë xymyëët'attëty ets ka'ap tii poky xytyuntëty ko ja Kristë wyimpitëty.

¹¹Myaj'ixëtëp ja oypyë ja tuunk mëti'ipë ja Jesukristë mtukmëtuuntëpën; jëtu'un ja Tios wintsë'ëkë ets mëjjaw jaantyjawë y'itëty.

¹²Mëku'uktëjkëty, ntsojkpyës ets xynyijawëtëty ko mëti'ipës të xyäty të xykyëpetyën yë'ëkyëjxm të jyëtu'un'aty ets myëjtëkëty ja oy aaw oy ayuk.

¹³Koos yap jëtu'un tsumy n'ity tëë tyuny etsës nikajpx nimëtya'akëty ja Kristë mayjä'äyjoty ets näjyëtu'un ma ja kutuunktëjkëtyën ets ma oy pyënëtyën.

¹⁴Ets ko të t'ixtë ko jap tsumy n'ityës, may ja nmëku'uk'ajtëmë të jyotmëkta'aktë ets të nimëtya'aktëty ja oy aaw oy ayuk amëk jotmëk ets yi'iyë tu'ukyë tyuk'ijxpäjtëp ja Wintsën.

¹⁵Tëy ko tää ja'ay mëti'ipë Kristë y'aaw y'ayuk tsipkyëjxm äkëkyëjxm kyajpxwa'kxtëpën ets näyjyëtu'un mëti'ipë oyjyot oywyinma'any mëët nyikajpxtëpën.

¹⁶Pën oyjyot oywyinma'any mëët nyikajpxtëpën, tsojkënkyëjxm ja Kristë tmëtuntë ko tnijawëtë ko Tios tëë xypyëjktä'äkyës ets nkuwa'anëtyës ja oy aaw oy ayuk;

¹⁷e mëti'ipë tsipkyëjxm nyikajpxtëpën, yë'ë tyuuntëp ko kyë'ëm jä'ä tyajmëjtëkëja'antë, ka'ap ëmuumtu'ukjot tuntë, je'eyë xyajtsiptëkëja'antës maajës tyam n'ityën tsumy.

¹⁸Tiijës nkëwentëty, wä'än tmëtëy tkamëtëyëty, yë'ë kopkpëky ko ja Kristë yajkajpxwä'kxy. Yë'ës ntukxoontäkpy ets njaaktimtyukxoontäkpyës wäänëni'ik,

¹⁹jä'ä ko nija'apës koos npaata'any ja nitsokën, nkukajpxëpës ko tëë ja Tios xytyuknija'amyätsëtës ets tëë näjyëtu'un ja Jesukristë ja Kyënu'kxymyëk'ajtën xypyutëkës.

²⁰Njëjp'ijxypës ëmuumtu'ukjot ko ka'apës ntsëtyu'unpaata'any, ni'ikyës xymyo'oja'any ja Tios ja mëk'ajtën wi'ix yajmëjjaw yajjaantyjäwëtyën ja Kristë, oyës n'ookëty ëkë njuuky'atëtyës.

²¹Mëët ëjts, koos njuuky'äty, yi'iyës ntsojkpy wi'ix ja Kristë mëjjaw jaantyjawë y'itëtyën; ets pën o'kpës, oy ënäty mëët ëjts.

²²Pën jaakjuuky'ajtpës ja ni'kx nkopk, jyëkyejpyës njaaktuunkojëty ja Tios ja jyä'ä. Ka'apës nijawë mëti'ipës nwin'ixëp, ko n'ookëtyës ëkë ko njaakjuuky'atëtyësë.

²³Aak oy mäjtskpëky, ¿mëti'ipës tëy nwin'ijxnëp? Tu'kpëky, njatsojkpyës etsës jeexyë n'o'knë ets mëët ja Kristë nëjkx nyajpaatyës, yë'ëjës oy nja'ap.

²⁴E jatu'kpëky, miitskyëjxmëty, oy koos njaakjuuky'atëty.

²⁵Yë'ëkyëjxm ko jëjp'ixy nmëët'atyës koos njaakjuuky'ata'any mëët miitsëty ets njaakputëkëtëty wi'ix mtu'uye'eytyëtyën ets wi'ix xymyëët'atëtyën ja xoontakën ma mëpëktën.

²⁶Jëtu'unts jatëkok nyajpaatëtyës ma miitsëtyën ets kyëjääjëty ja Kristë Jesús ja myëj'ajtën.

²⁷Wä'än t'ixy tii tuunëp jajtëp, juuky'atë miits ijxtëm y'ënä'änyën ja oy aaw oy ayuk ma Kristë yajnimëtyä'äkyën. Oy miits nninëjkxtëty ëkë nkaninëjkxtëty, nijawëpës ko tu'ukyë m'itë ets tu'ukyë ja mwinma'any yajpaatë ets xytyuntë wi'ix ja ja'ay oy tmëpëktëtyën ja oy aaw oy ayuk,

²⁸je'eyëp ko këtii mnätyuk'ëtsë'ëkëtëty ja mmëtsipëty. Ko xykyatsë'ëkëtëty, yë'ë mtuknijawëtëp ko kutëyoyantëp ënätyëty ets nän yë'ë yajtunijawëp ko ënäty ja nitsokën xypyaata'antë. Ya'atë Tios jëtu'un të tuknipëjktaakë.

²⁹Kristë mëët ja Tios të tuny ja mëyajtën ka'ap yi'iyëty ko xymyëpëktë ja Kristë, näjyëtu'un ko Kristëkyëjxm xymyënax xyajnaxtëty ja ëyo'on jotmay.

³⁰Tu'knax ëëts ja ëyo'on jotmay nmëët'ajtëmë. Miits tëë xy'ix xynyijawëtë wi'ixës të ntsiptunyën mëët ja ëxëëkpë ku'oypyë ets mnija'awëtëp wi'ixës tyam mëët ntsiptuun'ëtë'ëtyën.