Read Biblia Mixe de Quetzaltepec Filipenses 3 Bible Online

Filipenses 3 - Biblia Mixe de Quetzaltepec bible

Filipenses 3

¹Jëtu'un mëku'uktëjkëty, tukxoonta'aktë ja Wintsën. Ka'apës näy'atsipë njawë oyës yam jatëkok nja'ay mëti'ipës të n'ëkjääpyën, jä'ä ko mtuna'anxëtëp yë'ë.

²Näkyëwent'atëtë ma ja ja'ayëtyën mëti'ipë ka'ap tsyokëtën, mëti'ipë tëkatsy winët tyuuntëpën ets tsyujktëp ja nyi'kx kyopkëty;

³jä'ä ko ëëtsajtëm jëtu'un nxëëwajtëm mëti'ipë ja ye'etyëjkajtën të yajnatsujk'ëwtityën, mëti'ipë y'ëwtajtëpën ja Tios mëët ja Kënu'kxymyëkajtën, ets yë'ë nätyukmëjja'awëm ja Kristë Jesús, ka'ap yë'ëjëty nätyukmëjja'awëm ja nëkëjxypyë.

⁴Ëjts njamëët'ajtypyës ja winma'any wi'ixës jeexyë tääpë jëtu'unpë ntukjotkujk'atyën. Ni pën jëtu'un ja winma'any tkapaatëty tä ëjtsën tiikyëjxm ko jeexyë nyajmëjnaxyës,

⁵jä'ä koos nmëxu'unk'ajty, kom tuktujk xëëwës ojts ja nye'etyëjk'ajtën yajnatsujk'ëwtity, jutiis ja'ayës ëjts, Benjamínkës nteety'äjtyp n'ap'ajtyp, hebreo ja'ayës ëjts xy'u'unk'ajtp. Ets ijxtëm ja jutiis ja'ay ja y'ënä'ämënëty y'ityën, ëjts ojtsës n'ijxpëjkë ja fariseë ja'ay ja y'ijxpëjkënëty.

⁶Mëkës ijty näjyawëty tii nmëpëky, yë'ëpaat ijty n'ëxëëk'ixyës ets n'ixjëtity npajëtiyës mëti'ipë ja Jesús myëpëjktëpën. Ka'ap ijty ëjts nyajmëyätyës ets pën ja Moisés ja y'ënä'ämën xytyukmëmëtya'akëtyës koos nkapatuny.

⁷E mëti'ipës ijty ntijpyën ko ni'ik tsyowpaaty ma ka'ap ja Kristë ënäty nmëpëkynyëmës, tyam tëëjës nijawë ko ka'ap tsyowpaaty.

⁸Ni tiis tyam jëtu'un nka'ixy tsyowpaaty ijxtëm ja oyajtënën mëti'ipë yajmëët'ajtpën ko ja Kristë Jesús të yajnijawë, mëti'ipës nWintsën'ajtypyën. Mëët koos ja Kristë të nmëpëky tëëjës winë nyajtëkooytyä'äy, aak pu'uxmën tu'kë'ëyë winë njawës koos ja Kristë npaata'any,

⁹ets nyajpaata'anyës jam ma yë'ëjën; ka'ap yë'ëkyëjxmëty koos të nyajpaye'ey mëët ja ënä'ämën kutujkën; yë'ëkyëjxm ko yajmëët'aty ja mëpëjkën ma ja Kristën, mëti'ipë ja Tios nyipaye'eyën'ajtypyën ko të yajmëpëky.

¹⁰Yë'ës ntsojkpy etsës oy nnijawëja'any ja Kristë, etsës npaatëty ja mëk'ajtën ko të jyuukpyiky ets ko të tmënaxy të tyajnaxy ja ëyo'on jotmay; ets të xyajnaxyës tä yë'ëjën ko të y'ooky,

¹¹ets yë'ëjës njatsojkpy jeexyë Tios xyajjuukpyikyës.

¹²Ka'apës n'ëna'any ko tëëjës tu'kë'ëyë npaataaynyë ëkë koos wa'ats ja'ay nyajpatnë ijxtëm ja Tios tsokyën. Yäjtsp pojpnëmës ets ja Kristë Jesús mpaata'anyës ijxtëmës yë'ë ëka'any të xypyäätyën.

¹³Mëku'uktëjkëty, ka'apës n'ëna'any ko tëëjës winë nmëmëtakta'ay; je'eyës winë të nja'atyëkooytyä'äy mëti'ipë nyäxyën ets nämyëjaaw'ixyës ets npaata'anyës ja kuma'ayën mëti'ipë miimp wiinkoonpën,

¹⁴yë'ëjës npajotëkoopy etsës npata'any ja kuma'ayën tsajpkëjxmëpë mëti'ipë ja Tios xymyo'oja'anëmën ko ja Kristë të nmëpëjkëmë.

¹⁵Jënu'un ëëtsajtëm mëti'ipë mëk mëpëjktëpën, mëpaat jëtu'un nmä'ämyëty ntajmëty. Ëkë pën jamts mëti'ipë wiink maaytyëp tajtëpën, mtuk'ixëtëp mtuknijawëtëp ja Tios näjyëtu'un.

¹⁶Wä'än njuuky'ajtëmë ijxtëm ja Tios të xytyuknija'awëmën.

¹⁷Mëku'uktëjkëty, tuntë ijxtëmës yam nnajtstunën ets ixtë tuntë ja ja'ay mëti'ipë pyatuuntëpën näjyëtu'un ijxtëm të yajnajtstunëtën.

¹⁸Tëë miits kanaak ok n'ënëëmëtë ets tyam jatëkok nëëmëja'antë jëëpy yaxp, ko jam may mëti'ipë myëtsip'ajtëpën ja Kristë, mëti'ipë ojts y'ookyën kruutskëjxm,

¹⁹yë'ëjëty ëxëëk nëjkx kyukëxë. Jam ja wyinma'any tpëjkta'aktë ma ja kääky uukyën; yë'ë nätyukmëjpëjktakëtëp mëti'ipë jeexyë tsyuktsëtyuuntëpën. Yi'iyë myääytyëp tyajtëp mëti'ipë yaa naaxwiinyëtën.

²⁰E ëëts'ajtëmë, jam tsajpjotm nkukajpn'ajtëmë, yë'ë njëjp'ijxëmë ko tsajpjotm tsyoonëty ja Yajknitsokpë, ja Wintsën Jesukristë,

²¹mëti'ipë ja ni'kx'ajt nkopk'ajtëm yajtëkatsäämpyën ets yë'ë xymyo'oja'anëmë ja kyë'ëm nini'kx mëti'ipë mëj'ajtën jaanty'ajtën myëët'ajtypyën ets tyunäämpy mëët ja myëk'ajtën mëti'ipë myëët'ajtypyën ets tmëmëtakta'ajëty oy tyimtiijëty.