Read Biblia Mixe de Quetzaltepec Filipenses 4 Bible Online

Filipenses 4 - Biblia Mixe de Quetzaltepec bible

Filipenses 4

¹Paaty, mëku'uktëjkëty, mëti'ipës njatsojkpyën yë'ë ets jeexyë nëjkx nku'ixëtë; miitsëty mëk n'oyjawëtë ets ntukxoontaktëp; jëtu'un njawëtë ijxtëm tu'uk ja kuma'ayënën. Itë jëtu'un mëk ma ja Wintsën xymyëpëktën.

²Npëjktsoopyës ja Evodia ets ja Sintique ets tkajpx'oyëtëty ja tsyipëty ma ja Wintsën tmëpëktën.

³Ets mijts mëku'uk, mëti'ipës oy të xypyutëkën ma ja Kristë yamëtunyën, n'amëtoopyës ja mëyajtën ets xypyutëkëty ya'atë to'oxytyëjkëty. Yë'ë mëk ojts tyuntë mëët ëjts ma yajkajpxwä'kxyën ja oy aaw oy ayuk, näjyëtu'un ja Clemente ets wiinkëtypë mëti'ipës mëët të ntuunmuktën. Kuja'ay ja xyëëw y'ijnëtë nokyjoty ma ja ja'ay xyëëwëtyën mëti'ipë juuky'ajtëpën xëmëkyëjxm.

⁴Tukxoonta'aktë ja Kristë xëmë. Njaaknikäjpxyës ets mxoonta'aktëty.

⁵Wä'än ja ja'ay nijawëtë ko yujy naxym mja'ay'atë. Tää ja Wintsën tyimwiinkony.

⁶Këtii tii je'eyë xymyëmon xymyëtuktëty, yë'ë Tios tukë'ëtëkëtë tii jam mjotmay'ajtëp, amëtowtë pëjktsowtë ets kukajpxën näjyëtu'un.

⁷Jëtu'un ja Tios mmo'ojëtëty ja jotkujk'ajtën mëti'ipë ka'ap myäyën tja'akyukëty ja naaxwiinyëtë ja'ay; ets ya'atë jotkujk'ajtën yë'ë kyëwent'atäämpy ja mjot mwinma'anyëty, mma'ayënëty mtajënëty ko ja Kristë Jesús të xymyëpëktë.

⁸Mëku'uktëjkëty yë'ë mëmay mëtajtë mëti'ipë tëy jaantyën, mëti'ipë paat'ajtëp yajwintsë'ëkëtyën, mëtëypyë, wa'atspë; mëti'ipë yajtukjotkëtakpën ets mëti'ipë oy wiinkëxë'kpën. Mëmay mëtajtë tu'kë'ëyë mëti'ipë oyën ets paat'ajtëp oy yajnikajpxëty.

⁹Tuunta'aktë mëti'ipë të ntuk'ijxpëktën ets mëti'ipë të ntuknëëmëtën ets ijxtëm të xy'ixtën ma ëjtsën; Tios, mëti'ipë ja jotkujk'ajtën yäjkpyën, yë'ë mmëët'itanëtëp.

¹⁰Ntukxoontäkypës ets nkukajpxëpës ma miitsëtyën ets ma Wintsënën koos jatëkok të xyjyä'ämyätstë. Ka'apës yë'ë ntijy koos miits të xyjyä'ätyëkoytyë, jä'ä ko ka'ap të mmëta'aktë ets jeexyë të xypyutëkëtës.

¹¹Ka'ap yë'ëkyëjxmëty jëtu'un n'ëna'anyës koos tii nyajmëyäty, tëëjës n'ijxwë'ëmy wi'ix tii npaatyën ets yë'ëjës ntukjotkujk'ajtyp.

¹²Nija'apës wi'ixës njuuky'atëtyën mëët ja ëyo'on ets näjyëtu'un ko may tii nmëët'atyës. Tëës n'ijxwë'ëmy wi'ixës nwinkuwa'akëtyën ko tii kyaka'ty ëkë ko tii nyatëkë.

¹³Aak jyëkyejpyës tii nwinkuwa'akëty jä'ä ko Kristë xyjyotmëkmoopyës.

¹⁴Oy jyajëtu'unëty, miitsëty tëë oy mwinma'anypyaatë ko të xypyutëkëtës ma amaayjoty jotmayjoty të nyajpaatyënës.

¹⁵Mnija'awëtëp miits, Filipo ja'ayëty, koos ntso'ony jam Macedonia, ko ënäty miits tëë ëka'any xynyijawëtë ja aaw ayuk oypyë. Ka'apës pën wiinkëtypë mëpëjkpëtëjk xymyooytyë ja putëjkën, miitsës ojts xymyo'otë.

¹⁶Ets näjyëtu'un koos ënäty jam Tesalónica nyajpaaty, ka'ap tyu'k'okëty ojts miits xytyuknikäxtës ja putëjkën maas ënäty tii nyajmëyätyën.

¹⁷Ka'apës yi'iyë nmëmay nmëtajy tiijës n'ëk'ëxajëp; yë'ëjës nmëmääpy nmëtäjpy ets ja oyajtën xypyaatëty Tios wyintum.

¹⁸Tëës may winë n'ëxajë ets njaaktimmyëët'ajtypës ja natëkë, jä'ä ko nmëët'ajtypyës mëti'ipë ja Epafrodito ojts xytyukmëkäxëtën. Jëtu'un ya'atë putëjkën ijxtëm ja pa'akxu'kpën mëti'ipë yajyojxpën ets yajtukwintsë'këpën ja Tios ets tukjotkëta'akëty.

¹⁹Ja nTiosës mmo'ojëtëp tu'kë'ëyë mëti'ipë miits myajmëyajtëpën, ja jotkujk'ajtën mëti'ipë myëët'ajtypyën ja Kristë Jesús.

²⁰Mëj jawë jaantyjawë ja nTeety'ajtëm Tios y'itëty. Jëtu'un y'itëty.

²¹Jam xyajnaxtëty ja nkajpxpo'kxënës ma ni'ëmukë ja ja'ayëty mëti'ipë ja Tios kajpn'ajtëtëpën ko Jesukristë të tmëpëktë. Ja nmëku'uk'ajtëm mëti'ipës yam mëëtën mtuknikäxëtë ja kajpxpo'kxën.

²²Näyjyëtu'un mtuknikäxëtë ja kajpxpo'kxën ni'ëmukë mëti'ipë ja Tios kajpn'ajtëtëpën, yë'ë ni'ik mëti'ipë tuuntëpën ma ja Roma yajkutujkpë ja kyutujktaknën.

²³Wä'än ja Wintsën Jesukristë mkënu'kxëtë ni'ëmukë.