Read Biblia Mixe de Quetzaltepec Colosenses 1 Bible Online

Colosenses 1 - Biblia Mixe de Quetzaltepec bible

Colosenses 1

¹Ëjts Pablo, Jesukristë y'ayuk kajpxwa'kxpë mëët ko ja Tios jëtu'un të tuknipëjktaakë, mëët ja nmëku'uk'ajtëm Timoteo,

²tyam ntuknikäxtë ja kajpxpo'kxën miitsëty Tios ja nyaax kyajpn, ja nmëku'uk'ajtëm mëti'ipë të tmëpëktën ja Kristë jampë Colosas yajpaatën. Wä'än ja nTeety'ajtëm Tios mmo'ojëtë ja kënu'kxën ets ja jotkujk'ajtën.

³Xëmë ko miits nja'amyätstë nkukajpxëtëpës ja Tios, ja nWintsën'ajtëm Jesukristë ja Tyeety.

⁴Jä'ä ko tëëjës nnijawëtë wi'ix miits xymyëpëktën ja Kristë Jesús ets ko xytsyoktë mëti'ipë ja Tios kajpn'ajtëtëpën.

⁵Jä'äkyëjxm ko xyjyëjp'ixtë mëti'ipë të myajtuknipëjktaakëtën jam tsajpjotm. Tëë ya'atë jëtu'unpë xy'ëkmëtoowtëpë ko të xynyijawëtë ja tëyajtën ko të yajnimëtyä'ä ja oy aaw oy ayuk,

⁶mëti'ipë jampaat të jyä'tyën ma miitsëtyën. Ni'ikyë myëjwiin kyëjääjë ya'atë aaw ayuk ets oy wyimpëtsëmy oy tyimmatsowëty naaxwiinyëtë apëtsëmy. Jëtu'un tä të jyäty të kyëpetyën ma miitsëtyën ko ojts ëka'any xymyëtowtë ja oy aaw oy ayuk ets xyjyä'äkyujkëtyë ja tëyajtën.

⁷Yë'ë ojts mtuk'ijxpëkëtë ja nmëku'uk'ajtëm Epafras, mëti'ipës mëët ntuunmujktën ets myëtuumpy ja Kristë ma miitsëtyën.

⁸Näy yë'ëjës të xytyuk'ëwaanëtë ko ja tsojkën ja'awën xymyëët'atë mëti'ipë ja Kënu'kxymyëkajtën mmooyëtëpën.

⁹Paaty, koos ojts nijawëtë, xëmë ja Tios miits ntuknija'amyätsëtë, n'amëtowtës ja Tios ets kä'pxy mtuknijawëtëty mëti'ipë tsyojkpyën ets mmo'ojëtëty tu'kë'ëyë wijyajtën kejyajtën mëët yë Kyënu'kxymyëk'ajtën.

¹⁰Yë'ë miits ntukni'amëto'owëtëp ets mjuuky'attëty ijxtëm pyaat'atyën mëti'ipë myëpëjktëpën ja Wintsën; yë'ë mtuntëp mëti'ipë yë'ë tyukjotkëtäkpyën, mëti'ipë oy tsuj winpëtsëëmpën ets ja Tios oy xynyijawëtëty.

¹¹N'amëtow npëjktsowtës ja Tios ets mjotmëkmo'ojëtëty mëët tu'kë'ëyë ja myëj'ajtën y'oyajtën; jëtu'un winë xymyëmëta'aktëty amëk jotmëk, akujk jotkujk ets mëët ja mä'kxtujkën

¹²nëjkxëp ja Tios xykyukajpxëtë, mëti'ipë të mtukjatëtën ets xy'ëxajëtëty ja kuma'ayën mëti'ipë myo'ojäämpyën ja nyaax kyajpn të'kxëntuuypyë y'itën.

¹³Tëë ja Tios xyaj'ëwa'atspëtsë'ëmëm ma ja ku'oypyë yajkutukyën ets tëë xypyëjktakëm ma yajkutukyën ja y'U'unk, mëti'ipë ni'ik tsyojkpyën.

¹⁴Y'U'unk të xyajnitsokëm ets të tnime'kxy ja npoky'ajtëm.

¹⁵Ko ja Kristë të yaj'ixy'äty ënät të yajnijawë wi'ix ja Tios y'ixëtyën, jä'ä ko yë Tios ka'ap yaj'ixy; yë'ë myëëtu'uk U'unk'ajtyp ka'anëm ënäty tii kyojnyëm.

¹⁶Mëët ja Kristë ojts ja Tios winë t'oytyuunta'ay mëti'ipë tsajpjotm ijtpën ets mëti'ipë naaxwiinyëtën, mëti'ipë yaj'ijxp, kayaj'ijxpën. Wä'än tkutujktaknëty, wä'än tmëk'ajtënëty, wä'än tyajkutujkpëty ëkë wä'än tkutuunkëty. Mëët ja Kristë ojts winë t'oytyuunta'ay ets yë'ë ojts yajtukni'oytyunë.

¹⁷Taayëm yë Kristë naamka'anëm ënäty tii kyojynyëm, yë'ë yaj'ijtääpy winë oy mëti'ipë jää'ajtpën.

¹⁸Kristë nyikëpajk'ajtyp ja mëpëjkpëtëjk, mëti'ipë ijtëpën ijxtëm tu'uk ja ni'kx kopkën. Yë Kristë tääyëm yë'ë yajpaaty, yë'ë jëyëjp të jyuukpyiky ets nikopk'atëty tu'kë'ëyë oy tyimtiijëty.

¹⁹Tios ojts kë'ëm tuknipëjktaakë ets tu'kë'ëyë ja mëj'ajtën yajpaatëty ma yë'ëjën,

²⁰ets mëët yë'ëkyëjxm ojts tëkokyë nyänyimä'kxta'ayë ets jam yajpaatëty ma yë'ëjën, naaxwiinypë ets tsajpjotmëpë, ets jëtu'un ja jotkujk'ajtën tpaatëty tëkokyë winë ko ja Kristë ja nye'pyny të temy të tje'etsy kruutskëjxm.

²¹Miitsëty, jëpyaat jëpyo'kxy ets mëtsip ijty myajpaatë ma Tiosën. Mmëtsip'ajtëp ijty ja Tios mëët ja m'ëxëëkjot m'ëxëëk winma'anyëty ko ëxëëk xytyuntë.

²²E tëë ja Tios tpëjktä'äky ja näykyajpx'oyë mëët miitsëty ko Kristë të myajjootwinpitëtë ets ko ja Kristë wyimpijty ja'ayën ets ojts mku'ookëtë kruutskëjxm. Paaty jëtu'un të tuny ets miits wa'ats myaj'ita'anëtë Tios wyintum, ka'ap tii poky xy'ëkmëët'ajnëtëty ets ka'ap m'ëk yajpoky'ijxnëtëty.

²³Je'eyëp ko mëk mëpaat myajpaatë ma mëpëktën, këtii xymyajtstu'utëty mëti'ipë të xymyëpëktën ets mëti'ipë të xymyëtowtën. Yë'ë jëtu'un ya'atë aaw ayuk mëti'ipë të yajkajpxwä'kxyën oy tyimmaajëty ma ja it naaxwiinyëtën, ëjts Pablo je'eyës të nputëkë ets të yajkäjpxywä'kxy.

²⁴Jotkujkës näjyawëty ko miits nku'ëyowëtë, jëtu'unës nyajkä'pxy ja ëyo'on maas ja njot nini'kxën, mëti'ipë ja Kristë kyayajka'pxën ma tku'ëyo'owëyën ja mëpëjkpëtëjkëty, mëti'ipë yë'ë nyi'kx'ajtyp kyopk'ajtypyën.

²⁵Tëë ja Tios xypyëjktä'äkyës ets nputëkëtyës mëti'ipë mëpëjktëpën, yë'ëjës të xytyuknipëky ets miitsëty xytyuk'oy'attëty, ko ja y'aaw y'ayuk të yajkajpxwä'kxy oymyaajëty,

²⁶ja winma'any mëti'ipë ijty kayajnija'apën ma yu'utsy të y'ityën kanaak jëmëjt, je'eyëp ko tëë ja Tios tyam tuknijawë ja nyaax kyajpn.

²⁷Jëtu'unts yë'ë të tuknijawë mëti'ipë ka'ap jyutiis ja'ay'atën ets tnijawëtëty ja mëj'ajtën jaanty'ajtën mëti'ipë ijty ka'ap yajnijawën. Ja yu'utsypë ijty y'ityën yë'ë ja Kristë, mëti'ipë tyam yajpatpën ma miitsëtyën, mëti'ipë mjëjp'ijxtëpën ets mtukpaatëtëty ja mëj'ajtën jaanty'ajtën.

²⁸Yë'ëjës nikajpx nimëtyaktëp ja Kristë ets nyaj'ijxpëktës ntukmëkajpx ntukmëmëtya'aktës ni'ëmukë ja ja'ayëty ja wijyajtën, ets yajpaatëty oy wa'ats ma ja Kristën.

²⁹Paatyës mëk ntuntë ets npajotëkoytyës mëët ja mëjaaw mëk'ajtën mëti'ipës ja Kristë xymyooytyëpën.