Read Biblia Mixe de Quetzaltepec Colosenses 3 Bible Online

Colosenses 3 - Biblia Mixe de Quetzaltepec bible

Colosenses 3

¹Jä'ä ko m'itë ijxtëm jeexyë të mjuukpyëktën mëët ja Kristë, ixta'atë mëti'ipë tsajpjotmën, ma ja Kristë jap y'u'unyën Tios y'aka'anytsyow.

²Yë'ë mëmay mëtajtë ja tsajpjotmëpë, ka'ap yë'ëjëty mëti'ipë naaxwiinyëtën.

³Jëtu'un tpaaty ijxtëm jeexyë të m'ooktën mëët ja Kristë. Kristë ja mjuukyajtënëty myëët'ajtyp tuknipëjkë'ëkë ma ja Tiosën.

⁴Ko nëjkx yaj'ixy ja Kristë, mëti'ipë yäjkpyën ja juukyajtën, näjyëtu'un miitsëty nëjkx myaj'ixtë mëët ja Kristë ma mëj'ajtën oyajtënën.

⁵Yajkutëkoonyëtë tu'kë'ëyë ja naaxwiinyëtë winma'any: Ijxtëm ja ëxëëktu'un ëxëëk kajpxën, ëxëëk winma'any, ëxëëk atsojkën ets meeny atsojkën mëët ko ja'ay ja meeny t'atsoktë, ja meeny tios'ajtëp ets ka'ap Tiosëty.

⁶Jä'äkyëjxm ja Tios tkäxa'any ja ëyo'on ma ja ja'ayëtyën mëti'ipë ka'ap myëmëtoyën,

⁷mëti'ipë ijty näjyëtu'un mtuuntëpën ma ënäty ka'ap mëpëktënëm.

⁸E tyam mëpaat xy'ëxmajtsta'atë ja äkë, joot'an, ëxëëk winma'any, näwyinkajpxpätë ets ëxëëk aaw ëxëëk ayuk.

⁹Këtii mnäwyin'ëënëtëty nixim niyam, jä'ä ko tëë xy'ëxmajtsnëtë jëtu'unpë ja juukyajtën ets ja ëxëëkpë mëti'ipë ijty mtuuntëpën,

¹⁰tëë xypyaatë ja jempyë ja juukyajtën, ja jempyë ja ja'ayajtën mëti'ipë ja Tios yaj'ajemyëpën xëmë ets jyuuky'atëty tä Tiosën, mëti'ipë të yajkojyën ets yajxon t'ixy'atëty.

¹¹Ka'ap yë'ë kyopkpëkyëty pën griegë ja'ay ets jutiis ja'ay, pën tsuky ets pën katsukyën, wä'än tpën ja'ayëty tiija'ayëty, wä'än yë'ëjëty mëti'ipë ka'ap kyajpxwijyëtyën, ëkë mëtuunpë nitookpyë ëkë wä'än t'ëwaatsëtumpëty. Yë'ë kopkpëky ko ja'ay y'ity mëët ja Kristë mëti'ipë tu'kë'ëyë winë myëët'ajtääpyën.

¹²Mëk miits yë Tios mtsokëtë ets tëë mwin'ixëtë ets jam myajpaatëty ma ja kënu'kxypyë nyaax kyajpnën. Tuk'itëtë ja pa'ëyo'owën, oyjä'äyajtën, yujyajtën, tëtä'äkyajtën, nätsyokë ets ja mä'kxtujkën.

¹³Nämyëmä'kxtukëtë nixim niyam ets nänyimä'kxëtë näjyëtu'un. Jëtu'un ijxtëm ja Kristë të mnimä'kxëtën, näjyëtu'un miits yë mmëku'uk xynyimä'kxtëty.

¹⁴Nätsyokëtë ni'ëmukë, jä'ä ko yë'ëkyëjxm ja ja'ay tu'ukyë y'itë ko nyätsyokëtë nyämyäyëtë.

¹⁵Wä'än ja Kristë yë'ë ja kyijpxyajtën tyajkutuky ma ja mjot mwinma'anyëtyën, jä'ä ko yë'ëkyëjxm ja Tios të myaxtsowëtë ets nitu'ukjaty m'itëty jotkujk ijxtëm tu'ukpë ja ni'kx kopkën ets akëtä'äky jotkëtä'äky myajpaatëty.

¹⁶Wä'än xëmë t'ity mjootjoty mwinma'anyjyotyëty ja Kristë ja y'aaw y'ayuk. Neykajpxwijëtë ets näjyotmëkwinkajpxëtë nixim niyam mëët tu'kë'ëyë ja mwijy'ajtënëty mkejy'ajtënëty ets kuuy'ëwtë ja Tios, mmëjjaw jaantyjyawëtë.

¹⁷Ets tu'kë'ëyë mëti'ipë mtuuntëp mkajpxtëpën, tuntë Wintsën Jesús xyëëwkyëjxm, mo'otë ja Tios ja kukajpxën Jesukristë mëët.

¹⁸To'oxytyëjk pëkpyë, yajpaatë mëët ja mniye'etyëjkëty, jëtu'un ijxtëm pyaat'atëtën mëti'ipë myëpëjktëpën ja Wintsën.

¹⁹Näyjyëtu'un ja ye'etyëjkëty pëkyëtypë, tsoktë ja mto'oxytyëjkëty, ka'ap win'äk jëjp'äkë xymyëëtsëënëtëty.

²⁰U'unk ëna'këty, mëmëtowtë ja mtaak mteetyëty ko tii mtuk'ënä'ämëtëty, jëtu'un ja Wintsën tsoky.

²¹U'unk teetyëty, ka'ap m'u'unk m'ëna'k je'eyë xyajjoot'anpëktëty këtiipë jyotmäjtskëtëty.

²²Mëtuunpë, mëmëtowtë mëti'ipë mtuk'ënä'ämëtëpën ja mwintsënëty yaapë naaxwiinyëtën, ka'ap yë'ëkyëjxm tii xytyuntëty oy ko ënäty jam m'ixëtë ets mëët oy mwë'ëmtëty; ëmuumtu'ukjot xymyëtuntëty ijxtëm ja Tios tyajkutukyën ets ijxtëm pyaat'atyën.

²³Tu'kë'ëyë mëti'ipë mtuuntëpën, tuntë jotkujk, ijxtëm jeexyë ja Tios yë'ë xymyëtuntën ka'apë jyä'äyëtyën.

²⁴Tëë xynyijawëtë ko yë Wintsën mmo'oja'anëtë ja kuma'ayën, jä'ä ko miits xymyëtuntë ja Kristë mëtëypyë wyintsën'atyën.

²⁵Mëti'ipë ja ëxëëkpë tyuuntëpën, tukupätëtëp ja Tios, jä'ä ko yë'ë paye'epy ijxtëm pyaat'atyën ets yë'ë ka'ap pën twiink'ixy.