Read Biblia Mixe de Quetzaltepec 1 Tesalonicenses 1 Bible Online

1 Tesalonicenses 1 - Biblia Mixe de Quetzaltepec bible

1 Tesalonicenses 1

¹Ëjts Pablo, mëët ja Silvano ets Timoteo, tyam yë noky ntuknikäxtës ja mëpëjkpëtëjkëty mëti'ipë ye'eymyujktëpën jam Tesalónica, mëti'ipë ijtëpën tu'ukyë mëët ja Tios ets Wintsën Jesukristë. Wä'än ja Tios mmo'ojëtë ja kënu'kxën ets jotkujk'ajtën.

²Xëmës ja Tios nkukajpxë mëët miitskyëjxmëty, ka'ap nja'atyëkoytyë koos ja Tios nja'amyetsy.

³Xëmës miits nja'amyätstë nTeety'ajtëm Tios nmëpëjktsoy ko mtuntë mëët ja mëpëjkën ets ko xyjyëjp'ixtë ja Wintsën Jesukristë ets ko të mputëkëtë ets xymyënax xyajnaxtë amëk jotmëk ja ëyo'on jotmay.

⁴Mëku'uktëjkëty, mtsojkëtëp ja Tios ets nija'awëtëpës ko Tios të mwin'ixëtë,

⁵paaty ko ojts miits ntuk'ëwaanëtë ja oy aaw oy ayuk, ka'ap ojts je'eyë nwinmëtya'aktë, ja Tios yë myëjaaw myëk'ajtën ets ja Kyënu'kxymyëk'ajtën ojts xyajtuntës ets tsyojkën jya'awën. Wa'ats miits xynyijawëtë wi'ixës ojts winë ntuntën ma miitsëtyën ets xytyuk'oy'attëty.

⁶Miitsëty jëtu'un ojts winë xytyuntë ijxtëm pyäätyën, ijxtëm ëëts winë të ntuntën ets ijxtëm ja Wintsën të nnajtstunën ets tëë xykyupëktë ja aaw ayuk mëët ja xoontakën mëti'ipë Kënu'kxymyëkajtën yajkën ma ënäty m'ëyow mjotëkoytyën.

⁷Jëtu'un ja oypyë të xynyajtstunëtë ma ja mëpëjkpëtëjkëtyën mëti'ipë tsënaaytyëpën jam Macedonia ets Acaya y'itjotm.

⁸Tëë tsyo'ontä'äky ja Wintsën ja y'aaw y'ayuk ma miitsëtyën ets të myëjtëkë, ka'ap jyämyëty je'eyë Macedonia ets Acaya, näjyëtu'un oymyaajëty ets yajnijawë wi'ix xymyëpëktën ja Tios. ¿Wi'ixës njaaktimy'ëna'anëty?

⁹Yë'ë kë'ëm nyimëtyaktëp wi'ixës ojts miits jotkujk xykyupëktën ets wi'ix të xy'ëxmatstën ja wiink tios ets xymyëpëjktë ja Tios juukpyë mëtëypyë

¹⁰ets xyjyëjp'ixtë ko myina'any ja Jesús, ko tsyoona'any jam tsajpjotm ja Tios U'unk, mëti'ipë juukpyëjkën. Yë Jesús yë'ë xyajnitso'oka'anëm ma ja mëj ëyo'onën mëti'ipë miimp wiinkoonpën.