Read Biblia Mixe de Quetzaltepec 1 Tesalonicenses 3 Bible Online

1 Tesalonicenses 3 - Biblia Mixe de Quetzaltepec bible

1 Tesalonicenses 3

¹Paaty, koos ënäty ka'ap n'ëkmëmëta'akanëtë ja jotmay, paatyës ojts ntimwyë'ëmtë jam Atenas

²ets nkäjxtës ja nmëku'uk'ajtëm Timoteo, mëti'ipë Tios myëtuumpyën ets mëti'ipës mëët nkajpxwä'kxtën ja aaw ayuk oypyë ma Kristë yajnimëtyä'äkyën. Paatyës nkäjxtë ets nëjkx mku'ixëtë, mjotmëkwinkajpxëtë wi'ix tu'ukyë ja mëpëjkën xymyëët'attëty,

³këtiipë pën myäyëty tyajëty ma ya'atë tsyiptä'äkyën. Wa'ats xynyijawëtë ko tëë nyajtuknipëjktakëmë ets n'ëye'eymyëty.

⁴Näyjyëtu'un ko ënäty ëëts jam njaakyajpaatë ma miitsëtyën, ojts ntuk'ëwaanëtë ko ja ëyo'on nmëët'ata'anëmë; jëtu'un të jyänty tyuny të jyänty jyätyë, tä xynyijawëtën.

⁵Paaty, koos ënäty ëjts ka'ap n'ëkmëmëta'akanë, ënätës nkejxy mëti'ipë myajtëwëtëpën wi'ix ja mëpëjkën xymyëët'attëty, jä'ä ko tsë'këpës ënäty ko ntij yë mëjku'u tëë myajtuuntëkoyëtë ets ja ntuunkëtyës ka'ap tsyoowpaatëty.

⁶E ja Timoteo ojts ja wyimpity ets tmëja'ajty ja ayuk oypyë wi'ix miits mmëpëktën ets ko ja mëku'uk oy xytsyoktë xyjyawëtë. Jëtu'unës të xynyëëmëtë ko xëmës miits xyjyä'ämyätstë ets ko näjyëtu'un ja tsojkën xymyëët'atë etsës xyjyapaata'an xyjya'ixa'antë, ijxtëm ëëts miits nja'ixa'antën näjyëtu'un.

⁷Paaty, mëku'uktëjkëty, oy tsip'akuky ëyo'on akujky nja'ijtëmë, ntukxoontaktëpës koos tëë nmëtowtë wi'ix ja Tios xymyëpëktën.

⁸Koos nijawëtë ko ja Tios tu'ukyë xymyëpëktë, xyajjotkujkëtëpës jatëkok.

⁹¿Wi'ix ëëts ja Tios n'ëkkukajpxëtëty, mëët tu'kë'ëyë ja xoontakën mëti'ipës nmëët'ajtëpën Tios wyintuuy, miitskyëjxmëty?

¹⁰Xëënaxy tsuunaxyës ja Tios n'amëtowtë ets miits nëjkx nku'ixëtë ets kë'ëm ntimpyaatëty ets ntuk'ëwaanëtëty mmëpëjkën myëjwiin kyëjääjëtëty.

¹¹Ntsojktëpës ets ja Tios mëti'ipë nTeety'ajtëmën ets ja Wintsën Jesukristë ëëts xypyutëkëtëty ets miits nëjkx nku'ixëtë.

¹²Wä'än ja Wintsën tjaakyajyeeky ja mtsojkënëty ets ni'ik mnätsyokëtëty nixim niyam, mëët ja wiinkëtypë mmëku'uktëjkëty, ijxtëm ëëts miits të ntsoktën.

¹³Wä'än yë Wintsën tu'ukyë tyaj'ity ja mjot mwinma'anyëty, wa'ats, ka'ap tii poky xymyëët'attëty Tios wyintum ko ënäty myiny ja Wintsën Jesús mëët ni'ëmukë mëti'ipë jyä'ä'ajtypyën. Jëtu'un y'itëty.