Read Biblia Mixe de Quetzaltepec Josue 11 Bible Online

Josue 11 - Biblia Mixe de Quetzaltepec bible

Josue 11

¹Ko yë Jabín, Hasor yajkutujkpën tnija'awëy mëti'ipë ënäty të tyuny të jyätyën, ënät ojts tu'uk ja käjpxytyu'unën tyaj'apaatë mëët ja Jobab mëti'ipë jam ënä'ämpën Madón ets mëët ja yajkutujkpëty mëti'ipë jam ënä'ämtëpën Simrón ets Acsaf,

²näjyëtu'un mëët ja yajkutujkpëtëjk jampë kopkjotmën anëkëjxytsyowpë, joyjyotypyë ma ja Jordán mëjnëëjën, ëpa'tkë'ëmtsowpë ma yajpaatyën Quinéret mejyën, tëkokyë ma ja joyjyotën ets jënu'un tmëwinkon'atyën ja Dor jamtsow anajnytsyow.

³Ojts näjyëtu'un tuntë ja käjpxytyu'unën mëët ja Canaán ja'ayëty mëti'ipë ënäty yajpatëpën jamtsow a'oytsyow ets anajnytsyow, näjyëtu'un mëët yë Amor ja'ayëty, Hit ja'ayëty, Ferez ja'ayëty, Jebús ja'ayëty jampë tsyëënëtën ets Heve ja'ayëty mëti'ipë jam tsënaaytyëpën ma ja mëjkopk txëëwatyën Hermón Mizpá nyaaxjot.

⁴Tëkokyë ya'atë yajkutujkpëtëjk ojts tsyo'onta'atë mëët tu'kë'ëyë tsyiptuunpëtëjkëty ets may'äämpy yë kepy wintëkäämpë tmëtso'ontë mëti'ipë myëtsiptuuntëpën ets këwaayëty ojts tmëtso'onta'atë. Yajxon nimay kyëxë'knëtë tä nëë'ajinën, ka'ap t'ëkjëkyäjpnë yajmëtyowtëty.

⁵Ya'atë ja'ayëty tu'ukyë ojts nyäpyëkëtë ets tsyo'ontë. Jam jyajtë ma tu'uk yë Merón mëjnëë jyënäkyën ets ja Israel ja'ayëty mëët tsyiptuna'antë.

⁶Yë Wintsën ojts t'ënëëmë yë Josué: Këtii mtsë'ëkëty, jä'ä ko jopy ooky ya'atë ja'ayëty kya'ata'aja'antë mijts mwintuuyëty. Yë kyëwaayëty nëjkxëp xytyektsyujkta'atë këtiipë y'ëkpëyë'knëtëty ets kyepywyintëkäämpëty mëti'ipë myëtsiptuuntëpën wa'ats xynyino'ktaayëty.

⁷Ënät ja Josué tuknipëjktakëy mëët tëkokyë ja jyä'äy mëti'ipë tsip'ixyëtyën ets tukja'ajtë ja myëtsip ajotkumonë jam ma ja Merom nëë akëyën.

⁸Yë Wintsën yë'ë ojts ja Israel ja'ayëty yajmëta'akëtë, jampaat ja myëtsip tpaja'ajtë ma Sidón kajpnën ets ma ja Misrefot-maim kajpnën, e jamtsow a'oytsyow jampaat ojts tpaja'të ma ja Mizpá joyjyotën. Nitu'uk ojts ja'ay tkayajwë'ëmtë juuky.

⁹Josué ojts tpatuny tä ënäty ja Wintsën të y'ëne'emyën, wa'ats tekytsyujktaay ja kwaay këtiipë y'ëkpëyë'knëtëty ets näjyëtu'un tnino'ktaay ja kepy wintëkäämpë mëti'ipë myëtsiptuuntëpën.

¹⁰Ko wyimpijnë jam ojts nyijkxy Hasor, ma ënäty ja yajkutujkpëtëjk ja käjpxytyu'unën të tuntën. Ko jam jyä'äjty tä ojts tyaj'ooky ja yajkutujkpë jampë y'ëne'emyën,

¹¹ojts tyaj'o'kta'atë ja ja'ayëty jampë tsyëënëtën, wa'ats winë tyajkutëkooytyääytyë ets tyajtooytyë ja kajpn.

¹²Näyjyëtu'un ja wiinkëtypë ja kajpn mëti'ipë ënäty mëët ja käjpxytyu'unën të tmëët'atyën ojts tyajkutëkooytyä'äy ets tyaj'o'ktaay ja nyiyajkutujkpë ets mëët tëkokyë ja ja'ayëty jampë tsyëënëtën, jëtu'un tä ënäty ja Moisés të tyuk'ëne'emyën ja Wintsën.

¹³Jä'ä tëy ja kajpnëty jampë yajpaatën tunkëjxm ka'ap ja Israel ja'ayë tyajtooytyë, yi'iyë ojts tyajtoytyë ja Hasor kajpn.

¹⁴Ojts tkupujxta'atë ja ja'ayëty jampë tsyëënëtën, nitu'uk tkayajwë'ëmtë. Yë'ë ojts tjä'ä'ajta'atë ja jëyujk tsajpkaa ets winëjaty jampë yajpaatyën kajpnjotm.

¹⁵Yë Wintsën ojts yë ënä'ämën tmo'oy yë Moisés, e yë Moisés ojts ya'atë ënä'ämën tyajknaxy ets tmooy yë Josué, Josué yë'ë ojts tkuuytyuunta'ay.

¹⁶Josué ojts tniwa'kta'ay tampë ja it naaxwiinyëtë, mëti'ipë kopkjotmën ma ja Négueb itjotmën, Gosen y'itjotm, ma ja Jordán nëëpa'ajën, tukë'ëyë joyjyot ma ja Israel ja'ayëty yajpaatën.

¹⁷Ojts tniwä'äky ja naaxwiinyëtë jampë yajpaatyën Halac, ma mëët nyäpyäätyë yë Seir, jampaat Baal-gad, ma ja joyjotmën mëti'ipë Líbano nyitënääpyën ets tyim'ixkëtä'äky jam ma Hermón kopkën. Josué wa'ats tmajtstaay ets tyaj'o'ktaay ja jampë ja yajkutujkpëtëjk,

¹⁸ma mëët jeky tsiptuuntën.

¹⁹Yi'iyë ojts wyi'imy ja Gabaón kajpn, ma ja Heve ja'ay tsyëënëtën, mëti'ipë mëët ja käjpxytyu'unën tyuuntën ets mëët nyäy'ënanëtë ko ka'ap yaj'ooka'anëtë. Tëkokyë ja wiinkëtypë ja kajpn atsip ojts tnitëkëtë.

²⁰Wintsën ojts kë'ëm tuknipëjktaakë ets tääpë ja'ayëty kujuun nyäpyëjkta'akëtëty ets tmëmayëtëty ja Israel kajpn, tääts yë'ë yajkutëkooyëtë ets yajkëjxtaayëtë. Nimaa ja pa'ëyo'owën tkamëët'ajtë mëët yë'ëjëty, jëtu'un tä ja Wintsën ënäty të tuk'ëne'emyën ja Moisés.

²¹Jä'ä xëëw ojts ja Josué tyajkutëkoy ja anaquitas ja'ayëty, jampë tsyëënëtën ma ja Hebrón y'itjotmën, ma ja kajpn Debir, Anab ets tëkokyë ja kopkjot jënu'un yë Judá ets Israel tnitänën.

²²Ka'ap ojts nitu'uk wyi'imy ja y'u'unk y'ok ja ja'aypyajkyeny Anac ma ja Israel ja naaxwiinyëtë ojts tniwä'äkyën. Ja ja'aypyajkyeny Anac ja y'u'unk y'ok jämyë ojts wyë'ëmtë ma ja Gaza, Gad ets Asdod kajpnën.

²³Jëtu'un'äämpy ja Josué tniwa'ktaay ja jampë ja it naaxwiinyëtë tä ënäty ja Wintsën të tuk'ëne'emyën ja Moisés, tää tkijpxwax'ktaay ets tmooytyääy ja Israel ja'ayëty mëti'ipë kyuma'ayën'ajtën. Ko jëtu'un nyäjxy ka'ap ojts maa y'ëktsiptuunëtë.