Read Biblia Mixe de Quetzaltepec Josue 14 Bible Online

Josue 14 - Biblia Mixe de Quetzaltepec bible

Josue 14

¹Ya'atë ja it naaxwiinyëtë mëti'ipë yajmooytyën ja Israel ja'ayëty tä tu'uk ja kuma'ayënën mëti'ipë ojts tyajwa'kxtën ja teety Eleazar, Josué, yë myaank yë Nun ets ja mëjja'aytyëjkëty mëti'ipë nyikopk'ajtëpën ja Israel ja'ayëty.

²Ojts ja it naaxwiinyëtë tyajwa'kxtë ijxpëtsëmy, ja taxtujk ja kujkmëpë ja naax kajpn, jëtu'un tä ënäty Wintsën të tuk'ëne'emyën ja Moisés.

³E ja nimäjtsk ja kujkmëpë ja naax kajpn ja Moisés tëë ënäty ja nyaax tmo'otë jamtsow nëë'awinm, jä'ä ja jyä'äyëty ja Rubén, ja Gad ets nikujkwä'kxy ja Manasés ja jyä'äy.

⁴Yë José yë y'u'unk y'ok mäjtskpëky ënäty nyäwyä'kxyë, tu'kpëky mëti'ipë ja Manasés jyä'äy'äjtypyën ets tu'kpëky mëti'ipë ja Efraín jyä'äy'äjtypyën, e jä'äts ja Leví ja'ayëty ka'ap ojts nitu'knu'un yajmo'otë ja nyaaxëty; yi'iyë yajmooytyë ja kajpn ma tsyëënëtëtyën ets wäänë ja naax ma tyajtänëtyën ja jyëyujk tsyajpkaajëty.

⁵Jëtu'un ojts ja Israel ja'ayëty ja it naaxwiinyëtë tyajwa'kxtë jam Canaán naaxjotm jëtu'un tä ënäty ja Wintsën të tuk'ëne'emyën ja Moisés.

⁶Ënät ja Judá ja y'u'unk y'ok ojts nyëjkxtë jam Guilgal ets myëtya'aka'antë mëët ja Josué. Ojts yë Caleb näjyëtu'un nyijkxy mëti'ipë Quenéz ja'ayën, Jefuné yë myaank ets t'ënëmaay ja Josué: Ja'amyäts wi'ix yë Wintsën ojts t'ënëëmën yë Moisés jam Cades-barnea ko ojts ëëtsajtëm nyajnimëtyakëmë.

⁷Ëjts wëxtyikxyës ënäty yë njëmëjt koos ojts jam Cades-barnea nyajkäjxtsoony, etsës ojts nëjkx jam Canaán naaxjotm, etsës ja it naaxwiinyëtë n'ixa'any ntuna'any, koos ojts nwinpijnë oypyës ojts ja aaw ayuk nmëwinpity jëtu'un tääjës ënäty të njanty'ixyën.

⁸Mëti'ipës ojts mëët nwinpijnëtën je'eyë ojts nëkoo ja naax kajpn t'ëtsë'ëkëtë, e ëjts tu'ukyës ja njot nwinma'any npëjktäky ma Wintsënën.

⁹Ënätës yë Moisés xy'ënëmaay: Ja naaxwiinyëtë maajaty të mnaxyën mijts nëjkx xyjyä'ä'aty ets ja m'u'unk m'ok, mëët ko tu'ukyë yë mjot mwinma'any jam të xypyëjktä'äky ma Wintsën Tiosën.

¹⁰E ix jëna'ajëp jä'änë, tëë wëxtyikxy jyëmëjt nyajxnë ma ja Wintsën t'ënëmaayën ja Moisés, ma ënäty jam yajpaatën të'ëts'itjotm, e tëë jëtu'un jyänty tyuny jyänty jyätyë tä ojts tnikäjpxyën; ix ëjts tyampaat juuky'ajtpnëmës, tyam jä'äs yë njëmëjtnë majkta'px ja mëkoxk.

¹¹E tyam oy mëknëmës nyajpaaty timjëtu'un tääjës ënätyën ko ja Moisés xykyejxyës jam ma ja Canaán itën, ëjts je'eyëmës mëk nye'ey nnaxy ets jyëkyejpynyëm ntsiptunëtyës.

¹²Paaty yam mijts n'ënëëmë, etsës xymyo'ojëty ja kopkjot mëti'ipës ja Wintsën ojts xytyukwinwanën. Mijts mnija'ap wa'ats ko yë'ë jam tsënaaytyëp yë Anac pajkyeny yë y'u'unk y'ok ets nyaax kyajpnëty ta'tspëky nyapotsy'atë. Yë Wintsën yë'ëtsës xypyutëkëp etsës jam ntëkëty, etsës n'ëxwojpta'ajëty yë ja'ay jampë tsyëënëtën, jëtu'un tä yë'ë të y'ëne'emyën.

¹³Jëtu'un'äämpy ojts yë Josué tkënu'kxy yë Caleb ets tmooy ja Hebrón it ets yë'ë tjä'ä'atëty mëët ja y'u'unk y'ok.

¹⁴Jëtu'un ojts yë Caleb yë'ë tniwä'äky tampë it naaxwiinyëtë ma ja Hebrón y'itjotmën ets yë'ë tjä'ä'ajty mëët ja y'u'unk y'ok, yë'ëkyëjxm ko ojts oy yë Wintsën tmëtuny, mëti'ipë yë Israel Tyios'ajtypyën.

¹⁵Yë Hebrón jä'ä ijty tëëyëp yajtijy Quiriat-arbá, paatykyëjxm jëtu'un yajtijy, jä'ä ko jam ojts yë Arbá tsyëënë, tu'uk yë y'u'unk y'ok yë Anac ja'ay pajkyenypë. Ko ya'atë jëtu'un kyijxy nyäjxy ka'ap ojtx ma tsip y'ëk'ijnë.