Read Biblia Mixe de Quetzaltepec Josue 15 Bible Online

Josue 15 - Biblia Mixe de Quetzaltepec bible

Josue 15

¹Ja it naaxwiinyëtë mëti'ipë ojts ja Judá ja jyä'äy tyuka'ayën ko yaj'ijxpëtsëëmy, ja tsëpa'an jampaat ojts jyä'ty ma mëët ja Edom nyäpyäätyë; e ëpa'tkë'ëmtsow jampaat jyä'äjty ma ja të'ëts'it txëëwatyën Zin.

²Ja tsëpa'an ja jampë ëpa'tkë'ëmtsow tsyo'ontä'äkyën jam ijty kyijpxtsoony ma ja naaxjëjpën mëti'ipë jam yajpatpën ma ja Ooky myejy nyäxyën.

³Nyäxy jam ëpa'tkë'ëmtsow ets wyimpäjtë'ëky jam yä'äpwinm ma txëëwatyën Acrabim, nyäxy jam të'ëts'itjotm ma txëëwatyën Zin, jyëjptä'äky Cades-barnea, ets tyimnëjkxy Hesrón; wyimpäjtë'ëky jam Adar ets jam y'ëwtity Carcá.

⁴Ja tsëpa'an mëti'ipë jam najxë'kpën jëtu'un ijty tyimnëjkxy ets jyä'ty ma txëëwatyën Asmón ets jam tukpëtsëmy ja wokjot mëti'ipë tso'onpën Egiptë ets jyëjpkëxy ma ja mejyën naax'akujkpë. Ya'atë të yajnikäjpxyën yë'ë ijty tsëpa'an ëpa'tkë'ëmtsowpë.

⁵Ja mëti'ipë a'oytsyow yajpatpën jam ja tsyo'ontä'äky ma Ooky myejyën ets jyä'ty ma Jordán nëë kyëtä'äkyën, e jamts jatëkok tsyo'ontä'äky wiinkpë ja tsëpa'an mëti'ipë anëkëjxytsyow pa'tëjkëpën,

⁶jam pyäjtë'ëky Bet-hoglá ets nyajxë'ëky anëkëjxytsyow ma txëëwatyën Bet-arapá, jam tsyoony ets nyijkxy ma tsaatun txëëwatyën Bohan Ben-Rubén.

⁷Jam tsyoony ma txëëwatyën Acor ets pyäjtë'ëky jam Debir ets jyä'ty jam Guilgal mëti'ipë wintuuytsyow yajpatpën ma ja yä'äp txëëwatyën Adumim, ëpa'tkë'ëmtsow yajpaaty ma ja nëëwokën. Ja tsëpa'an ja wiinkpë jam jyënajkë'ëky ma ja In-semes nëëwookën ets jyä'ty ma txëëwatyën En-roguel.

⁸Ya'atë tsëpa'an jam ijty nyäxy ma Ben-hinom joyjyotmën, e jam ëpa'tkë'ëmtsow jam nyäxy ma txëëwatyën Jebús, jä'ä ja kajpn mëti'ipë yajtijpën Jerusalén ets pyäjtë'ëky jam kopkëjxm mëti'ipë wintuuytsyow yajpatpën ma ja Hinom joyjyotën ets jam anëkëjxy'äämpy nyäxy ma ja Refaim joyjotmën,

⁹y'ëwtijtë'ëky jam ma kopkupi'tsykën ets jyä'ty ma ja Neftóah nëëkopkën, jam tsyoony ets nyijkxy ma ja kajpn yajpaatën mëti'ipë jamëtyën ma ja Efrón kopkjotmën, nyäxy jam Baalá mëti'ipë näjyëtu'un yajtijpën Quiriat-jearim.

¹⁰Jamts tsyoony Baalá ets nyijkx jamtsow anajnytsyow, jyä'ty jam ma Seir kopkjotmën ets nyäxy Quesalón, jam pë'am anëkëjxmtsow ma ja Jearim kopkën ets jam kyujënake'eky Bet-semes, nyäxy Dimná,

¹¹ets jam Ecrón yä'äp'ituuy anëkëjxytsyowpë wyi'imyën, y'ëwtity Sicrón ets tuknaxy ja Baalá kopk, tukpëtsëmy ja Jabneel y'itjot ets jyëjpkëxy ma ja Mejyën naax'akujkpë.

¹²Jëtu'un jyëjpkëxy ja tsëpa'an jamtsowpë yajpaatyën awinmtsow, ja Mejy Naax'akukpë, jä'ä ijty tsëpa'an'ajtp. Ya'atë tsëpa'an ma ja it naaxwiinyëtën mëti'ipë ojts ja Judá ja jyä'äy tyuka'ajëtën ets jëtu'un ojts nyätyuknikäkëtya'ajëtë tä ënäty nyimay'atën.

¹³Josué ojts tmo'oy yë Caleb, yë Jefuné myaank wäänë yë naax mëti'ipë Judá ja'ay jyä'ä'ajtëpën, jä'ä pyatuun ja aaw ayuk mëti'ipë ja Wintsën ënäty të tni'ënä'ämën, yë'ë ojts tmo'oy ja Quiriat-arbá, mëti'ipë yajtijpën Hebrón, ma ijty tsyëënëtën tëëyëp ja Anac pajkyeny ja y'u'unk y'ok.

¹⁴Caleb ojts jam t'ëxwojpta'ay nitëkëëk ja Anac pajkyeny yë y'u'unk y'ok mëti'ipë ënäty mëj'äämpy ijtëpën ma tampë ja it naaxwiinyëtën, jä'ä txëëwatë: Sesai, Ahiman ets Talmai.

¹⁵Jam tsyo'ony ets ojts nyijkxy tsiptuunpë ma ja Debir kajpnën mëti'ipë ijty yajtijpën Quiriat-séfer,

¹⁶ets ojts y'ënä'äny: Pën ya'atë kajpn yajkutëkoopyën nmo'ojëpës yë nnëëx Acsa.

¹⁷Yë tsyojkmaank mëti'ipë xyëëwajtypyën Otoniel yë'ë ojts ja kajpn tyajkutëkoy, jä'ä ja myaank ja Cenaz, ja Caleb ojts ja nyëëx Acsa tjanty kyë'ëyäky ets ja Otoniel jä'ä tukpëjky.

¹⁸Ko jam tsyoonantë ets nyëjkxantë ma ja tyëjkëtyën, ënät yë Otoniel t'ënëmaay yë Acsa ets ja tyeety t'amëtowëty ja naax kam ma winë oy y'ity wyintëyën. Tää tukjënäjky ja jëyujk ets ja Caleb tyajtëëy ja nyëëx: ¿U'unk, tii mtsojkpy?

¹⁹Mëyajtënës n'amëtoowäämpy ma mijtsën, jëtu'un y'ëtsoy. Mëët koos të xymyo'oy yë naax jam Négueb të'ëts itjotm, näjyëtu'unës xymyo'ojëty yë nëëkopk. Paaty ojts tmo'oy ja nëëwooky mëti'ipë jam yajpatpën ëpa'tkë'ëmtsow ets anëkëjxytsyow.

²⁰Ya'atë it naaxwiinyëtë mëti'ipë ojts ja Judá ja jyä'äy tniwa'aktën ets tyajwa'kxtë tä ënäty nyimay'atën.

²¹Ja naax kajpn mëti'ipë jam yajpatëpën ëpa'tkë'ëmtsow ma mëët ja Edom ja y'itjot nyäpyaatëtën, jä'ä yajtijtë: Cabseel, Éder, Jagur,

²²Quiná, Dimoná, Adadá,

²³Quedes, Hasor, Itnán,

²⁴Zif, Télem, Bealot,

²⁵Hazor-hadatá, Queriot, Hesrón, mëti'ipë näjyëtu'un yajtijpën Hasor,

²⁶Amám, Semá, Mecladá,

²⁷Jasar-Gadá, Hesmón, Bet-pelet,

²⁸Hasar-sual, Beerseba, mëët yë kajpn mutskjatypë,

²⁹Baalá, Lim, Ésem,

³⁰Eltolad, Quesil, Jormá,

³¹Siglag, Madmaná, Sansaná,

³²Lebaot, Silhim ets En-rimón. Jä'ä nyiwinë'ajtë ja naax kajpnëty i'pxtaxtujk, ëpëky ja mutskëtypë ja kajpn mëti'ipë nyitënaaytyëpën.

³³E jam ma joyjyotmën jä'ä ojts nyikääkëtë ja kajpn mëti'ipë yajtijtëpën: Estaol, Zorá, Asná,

³⁴Zanóah, En-ganim, Tapúah, Enam,

³⁵Jarmut, Adulam, Socó, Azecá,

³⁶Saaraim, Aditaim, Guederá Guederotaim, jä'ä nyiwinë'atë ja kajpn majkmajkts, ëpëky ja mutsk kajpnëty mëti'ipë nyitënaaytyëpën.

³⁷Ja kajpnëty mëti'ipë yajtijtëpën Senán, Hadasá, Migdal-Gad,

³⁸Dilean, Mizpá, Jocteel,

³⁹Laquis, Boscat, Eglón,

⁴⁰Cabón, Lahmam, Quitlis,

⁴¹Guederot, Bet-dagón, Naamá ets ja Maquedá, jä'ä nyiwinë'ajtë ja kajpnëty majkmokx tu'uk, ëpëky ja myutsk kajpnëty mëti'ipë nyitënaaytyëpën.

⁴²Ja kajpnëty mëti'ipë yajtijtëpën Libná, Éter, Asán,

⁴³Iftah, Asná, Nesib,

⁴⁴Queilá, Aczib ets ja Maresá, jä'ä nyiwinë'atë taxtujk ja kajpn, ëpëky ja myutsk kajpnëty mëti'ipë nyitënaaytyëpën.

⁴⁵Ja kajpn mëti'ipë xyëëwajtypyën Ecrón, ëpëky ja mutsk kajpn mëti'ipë nyitënääpyën.

⁴⁶Jam tsyo'ontä'äky Ecrón tyimja'ty ma ja mejyën ets jënu'un tmëwinkon'aty yë Asdod, mëët tëkokyë ja myutsk kajpn.

⁴⁷Ja kajpn mëti'ipë xyëëwajtypyën Asdod mëët ja myutsk kajpn ets ja pya'a nyux; ja Gaza mëët ja myutsk kajpnëty ets ja pya'a nyux ets tyimja'ty ma ja wokjot nyäxyën mëti'ipë Egiptë tso'onpën ets ma mëët nyäpyäätyë ja Mejy Naax'akukpë.

⁴⁸Ja it naaxwiinyëtë mëti'ipë kopkjotmën yë'ë ojts tyuka'ajëtë ja Judá ja jyä'äy ets tjä'ä'atëty ja kajpn mëti'ipë yajtijtëpën: Samir, Jatir, Socó,

⁴⁹Daná, Quiriat-saná, mëti'ipë näjyëtu'un yajtijpën Debir.

⁵⁰Anab, Estemoa, Anim,

⁵¹Gosen, Holón ets Guiló, jä'ä wyinë'aty ja kajpn nimajktu'uk, ëpëky ja myutsk kajpnëty mëti'ipë nyitënaaytyëpën.

⁵²Ja kajpnëty mëti'ipë yajtijtëpën Arab, Dumá, Esán,

⁵³Janum, Bet-tapúah, Afecá,

⁵⁴Humtá, Quiriat-arbá, mëti'ipë näjyëtu'un yajtijpën Hebrón ets Sior, jä'ä nyiwinë'atë ja kajpn taxtujk, ëpëky ja myutsk kajpnëty mëti'ipë nyitënaaytyëpën.

⁵⁵Ja kajpnëty mëti'ipë yajtijtëpën Maón, Carmel, Zif, Jutá,

⁵⁶Jezreel, Jocdeam, Zanóah,

⁵⁷Caín, Guibeá ets ja Timná, jä'ä nyiwinë'atë ja kajpnëty nimajk, ëpëky ja myutsk kajpnëty mëti'ipë nyitënaaytyëpën.

⁵⁸Ja kajpnëty mëti'ipë yajtijtëpën Halhul, Bet-sur, Guedor,

⁵⁹Maarat, Bet-anot ets ja Eltecón, jä'ä nyiwinë'atë tëtujk, ëpëky ja mutsk kajpnëty mëti'ipë nyitënaaytyëpën.

⁶⁰Ja kajpnëty mëti'ipë yajtijtëpën Quiriat-Baal, mëti'ipë näjyëtu'un yajtijtëpën Quiriat-jearim ets ja Rabá mëët ja myutsk kajpnëty mëti'ipë nyitënaaytyëpën.

⁶¹E jam ma ja të'ëts'itjotmën ojts tyuka'ajëtë ja kajpn mëti'ipë yajtijtëpën: Bet-arabá, Midín, Secacá,

⁶²Nibsán, ja kajpn mëti'ipë xyëëwajtypyën Kaan Kajpn ets ja En-gadi, jä'ä nyiwinë'atë tëtujk ja kajpn ëpëky ja myutsk kajpnëty mëti'ipë nyitënaaytyëpën.

⁶³Yë Judá y'u'unk y'ok ka'ap ojts myäyëtë tyajpëtsëmtëty yë Jebús ja'ayëty jam Jerusalén mëti'ipë ënäty jam tsënaaytyëpën, paatykyëjxm yë Jebús ja'ayëty je'eyëm tyampaat mëët y'ijtmuktë yë Judá y'u'unk y'okëty jam Jerusalén.