Read Biblia Mixe de Quetzaltepec Josue 17 Bible Online

Josue 17 - Biblia Mixe de Quetzaltepec bible

Josue 17

¹Ya'atë jëtu'un ja itjot naaxjot mëti'ipë ojts tyuka'ajëtën ja Manasés ja jyä'äy, mëti'ipë kyä'äxkopk'ajtypyën yë José. Mëjëyëjp ja Maquir mëti'ipë kyä'äxkopk'ajtypyën yë Manasés, yë Galaad yë tyeety. Tsip'ixy ijty yajxon, yë'ë ojts tyuka'ayë ja Galaad ja y'itjot nyaaxjot jampë yajpaatyën Galaad ets Basán, a'oytsyow wyi'imy ma ja Jordán mëjnëëjën.

²Ojts näjyëtu'un t'ijxpëtsëmtë mëti'ipë naax ënäty nitu'ukjaty tukka'ajëtëp ja y'u'unk y'ëna'k yë Manasés: Ojts tyuka'ayë ja nyaax ja Abiézer, Hélec, Asriel, Siquem, Héfer ets ja Semidá mëti'ipë ja Manasés y'u'unk'ajt y'ok'ajtën, jä'ä jëtu'un ja y'ok'u'unk y'ok'ëna'k ja José.

³E ja Selófhad, Héfer yë myaank, yë Galaad y'ok'u'unk; e yë Galaad, Maquir yë myaank, yë Manasés y'ok'u'unk. Yë Selófhad ka'ap ijty myaank, yi'iyë nyëëx nimëkoxk mëti'ipë xyëëwajtëpën Mahlá, Noá, Hoglá, Milcá ets Tirsá.

⁴Ënät ojts tääpë to'oxy'ëna'këty tninëjkxtë ja teety Eleazar, Josué, mëjja'aytyëjkëty ets t'ënëmaaytyë: Yë Wintsën ojts t'ënëëmë yë Moisés etsës näjyëtu'un xymyo'otëty yë naaxëtyës, tä ja nmëku'uktëjkëtyës ja nyaax të tpëktën. Ënät ja Josué ojts tjantymyo'oy ja nyaaxëty ya'atë to'oxy'ëna'këty jëtu'un tä ënäty të yajmo'otën ja myëku'uktëjkëty.

⁵Jëtu'un'äämpy ojts ja Manasés majkpëky ja naax tjä'äpëky, ëpëky ja jampë Galaad ets Basán mëti'ipë a'oytsyow yajpatpën ma ja Jordán mëjnëëjën.

⁶Jä'ä ko ja Manasés ja nyëëxëty jëtu'un ojts ja nyaaxëty yajmo'otë tä ja ye'etyëjktëjkëtyën. Ja it naaxwiinyëtë ma txëëwatyën Galaad, yë'ë ojts tmo'otë ja wiinkëtypë ja y'u'unk y'ok ja Manasés.

⁷Ja it naaxwiinyëtë mëti'ipë yë Manasés jyä'äy'ajtën jä'ä ënäty myëjwiinëty: jampaat tsyo'ontä'äky ma txëëwatyën Aser ets jyä'ty jam Micmetat, yë'ë mëët nyäwyinku'ixëty yë Siquem ets tyimnëjkxy jëtu'un ëpa'tkë'ëmtsow, jyä'ty ma ja nëëwookyën jam Tapúah.

⁸Oy ënäty ja Tapúah itjot yë'ë ja Manasés tjajä'ä'aty, ja Tapúah kajpn yë'ë jyä'äniwantëp yë Efraín ja'ayëty.

⁹Jam ja tsëpa'an tsyoony ets kyuye'eynyäxy, tyimja'ty jam Caná wokjotm, tääts yajja'akyukë ko yë Efraín kyajpnëty jam ënäty yajpaatë ma Manasés yë kyajpnëtyën, oy ja tsëpa'an ënäty jam jyanaxy anëkëjxmtsow mëti'ipë ja Manasés jyä'äniwäämpyën, mëët ja mëti'ipë jam tso'onpën ets jyä'ty ma ja Mejyën Naax'akujkpyë.

¹⁰Yë Efraín nyaax jam wyi'imy ëpa'tkë'ëmtsow ma ja wokën, e ja Manasés ja jyä'äy jam anëkëjxmtsow; yë'ë tsyëpa'an'ajtëp ja Mejy Naax'akujkpyë ets mëët nyäpyaatëtë ja Aser ja nyaaxëty anëkëjxytsyow; e a'oytsyow yë'ë mëët nyäpyaatëtë ja Isacar ja nyaaxëty.

¹¹Ojts näjyëtu'un yë Manasés tjä'ä'aty ya'atë naax kajpn jampë yajpaatën ma nyaaxjotëtyën yë Aser ets Isacar, tu'ukjaty ja mëj kajpn aakmëët ja myutsk kajpnëty ets ja pya'a nyuxëty. E ja kajpn mëti'ipë yajtijtëpën: Bet-sean, Ibleam ets ja mëtëkëëkpë, mëti'ipë yajtijtëpën Dor, ëpëky ja Endor, Taanac ets Meguido.

¹²Ja Manasés ja jyä'äyëty ka'ap ojts myäyëtë tniwa'aktëty ya'atë kajpn kanaakpëkpyë, jä'ä ko ja Canaán ja'ayëty mëk ojts nyäpyëjkta'akëtë, paatykyëjxm ojts jam wyë'ëmtë.

¹³E ko ja Israel ja'ayëty myëktaktë, ënät tuk'atsip'ajtë ja Canaán ja'ayëty ets nyäkyuyakëtëty, je'eyëp tëy ko ka'ap ojts timy'ëxwoptë.

¹⁴Ja José y'u'unk y'ok ojts tninëjkxtë ja Josué ets t'ënëmaaytyë: ¿Wi'ix ko ëëtsëty janty wäänë yë naaxëty të xytyimmooynyëtë? Ets mnija'ap wa'ats koos nimay'atë, tëëjës yë Wintsën xykyënu'kxtë mëët nimay yë u'unk ëna'k.

¹⁵Ënät ja Josué y'ëtsoowëtë: Jä'ä ko miitsëty mnimay'atë ets ka'ap jam mtëjkëtya'atë ma ja Efraín ja nyaaxjotmën, nëjkxtë jam yukjotm, ma Refa ja'ayëty ets Ferez ja'ayëty tnitänëtën ets xyajwa'atstëty ets jam mtsënaaytyaknpëktëty.

¹⁶Tääts y'ëtsoowtë: Tääpë kopkjot ka'ap yë myëta'akëty etsës nyajtuntëty. Yë Canaán ja'ayëty jampë jyuuky'atën joyjyotm myëët'ajtëp yë pujxnwintëkäämpë mëti'ipë myëtsiptuuntëpën, näjyëtu'un mëti'ipë tsënaaytyëpën Bet-sean ets ma tëkokyë ja myutsk kajpnëtyën ets jampë yajpaatën ma Jezreel joyjyotmën.

¹⁷Ënät ja Josué t'ëtsooy ja José ja y'u'unk y'ok, jä'ä jëtu'un ja Manasés ets Efraín ja jyä'äyëty: Miitsëty jä'ä ko mnimay oyëty ets näjyëtu'un ja mëk'ajtën xymyëët'atë; paatykyëjxm ja it naaxwiinyëtë mëti'ipë mjä'ä'atantëpën ka'ap je'eyë tu'kpëky xyjyä'ä'ata'antë.

¹⁸Tëkokyë jënu'un xy'ixtën tääpë yuk'it miits nëjkx xyjyä'ä'atë ets ja aay kepy jampë yajpaatën, miits nëjkx xytyuk'oy'atë. E ja Canaán ja'ayëty nëjkxëp xy'ijxwojpta'atë oy ënäty xyjya'ixtë ja pyujxnwintëkäämpë mëti'ipë myëtsiptuuntëpën.