Read Biblia Mixe de Quetzaltepec Josue 19 Bible Online

Josue 19 - Biblia Mixe de Quetzaltepec bible

Josue 19

¹Ja mëmäjtskpë ja it naaxwiinyëtë mëti'ipë ojts yaj'ijxpëtsëmyën, yë'ë ojts tyuka'ajëtë ja Simeón ja jyä'äyëty. Ya'atë naax jam ënäty yajpaaty ma ja Judá ja'ay nyaaxjotëtyën.

²E ya'atë kajpn ojts tyuka'ajëtë: Beerseba, Sebá, Moladá,

³Hasar-sual, Balá, Ésem,

⁴Eltolad, Betul, Hormá,

⁵Siclag, Bet-marcabot, Hasar-susá,

⁶Bet-lebaot ets ja Saruhén, jä'ä nyiwinë'ajtë majktëkëëk kajpn, ëpëky ja mutsk kajpnëty.

⁷Ojts näjyëtu'un tyuka'ajëtë ja kajpn mëti'ipë xyëëwajtëpën En-rimón, Éter ets Asán, mëët ja nyikajpnëty mutskjatyëtypë,

⁸ets ja mutsk kajpn mëti'ipë jam yajpatëpën ma ja it naaxwiinyëtë txëëwatyën Baalat-beer, ma näjyëtu'un yajtijyën Ramat, jampë wyi'imyën ma txëëwatyën Négueb. Ya'atë jëtu'un ja naaxwiinyëtë mëti'ipë ojts tyuka'ajëtën ja myëkunaax myëkukajpn ja Simeón.

⁹Ja mëti'ipë ojts tyuka'ajëtën jam ënäty wyi'imy ma ja Judá ja nyaaxjotmën, jä'ä ko Judá mëj ojts ja naaxwiinyëtë tyuka'ayë, paaty ojts wäänë yajmooytyëpë ja Simeón ja'ay.

¹⁰Ja mëtëkëëkpë ja it naaxwiinyëtë mëti'ipë ojts yaj'ijxpëtsëmyën, yë'ë ojts tyuka'ajëtë ja Zabulón ja jyä'äy. Yë tsyëpa'anëty jampaat nyäjxy Sarid,

¹¹nyijkxy a'oytsyow ets jyä'ty Maralá, jam tsyoony jatëkok ets jyä'ty Dabéset, nyäxy jam ets jyä'ty ma ja Jocneam wokën.

¹²Ya'atë tsëpa'an mëti'ipë jam tso'onpën Sarid, jamtsow nyijkxy a'oytsyow, tyimja'ty ma txëëwatyën Quislot-tabor, nyäxy jam Daberat ets wyimpäjtë'ëky ma txëëwatyën Jafía.

¹³Jamts jatëkok tsyoony ets nyijkxy a'oytsyow, jyä'ty jam Gad-héfer, tyimnaxy jam Itá-casín, jyä'ty Rimón ets y'ëwtijtë'ëky jam Neá.

¹⁴Ja tsëpa'an jampë anëkëjxmtsowën jam ënäty nyäxy Hanatón, jam tsyoony ets jyä'ty Jefté-el.

¹⁵Ma tääpë naaxjotmën majkmäjtsk ijty jam yë kajpn mëjëtypë, ëpëky ja myutsk kajpnëty. Ya'atë kajpnëty jä'ä txëëwatë Catat, Nahalal, Simrón, Idalá ets Belén.

¹⁶Ya'atë ojts ja it naaxwiinyëtë pyaatëtë ja ja'ayëty mëët ja jyiiky myëku'ukëty mëti'ipë jyä'äy'äjtypyën yë Zabulón, ëpëky ja myutsk kajpnëty mëti'ipë yë'ëjëty nyitënaaytyëpën.

¹⁷Ja majktaxkpë ja it naaxwiinyëtën mëti'ipë ojts yaj'ijxpëtsëmyën yë'ë ojts tyuka'ajëtë ja ja'ayëty jënu'un ënäty tyu'kjëëky'at tyu'kmëku'uk'atën mëti'ipë jyä'äy'äjtypyën yë Isacar.

¹⁸Ojts tjä'ä'atë ja naax kajpn mëti'ipë xyëëwajtëpën Jezreel, Quesulot, Sunem,

¹⁹Hafaraim, Sihón, Anaharat,

²⁰Rabit, Quisión, Ebes,

²¹Rémet, En-ganim, En-hadá ets Bet-pasés,

²²Ja tsëpa'an jampaat ënäty nyäxy ma ja kajpn yajtijtën: Tabor, Sahasimá ets Bet-semes ets jam jyëjpkëxy ma ja Jordán mëjnëëjën. Jä'ä nyiwinë'ajty ja kajpn majkmokx tu'uk, ëpëky ja mutsk kajpnëty.

²³Ya'atë jëtu'un it naaxwiinyëtë mëti'ipë ojts yajmo'otën ja ja'ayëty jënu'un tyu'kjëëky'at tyu'kmëku'uk'atën, mëti'ipë yë Isacar jyä'äy'ajtën ets ja naaxwiinyëtë aakmëët ja myëjkajpnëty ets ja myutsk kajpnëty.

²⁴Ja mëmëkoxkpë ja it naaxwiinyëtë mëti'ipë yaj'ijxpëtsëëmën, yë'ë ojts tyuka'ajëtë ja ja'ayëty jënu'un tyu'kjëëky'at tyu'kmëku'uk'atën mëti'ipë jyä'äy'äjtypyën ja Aser.

²⁵Ojts tjä'ä'atë ja naax kajpnëty mëti'ipë xyëëwajtëpën: Helcat, Halí, Beten, Acsaf,

²⁶Alamélec, Amad ets Misal, jä'ä mëti'ipë jam najxpën a'oytsyow ets jyä'ty ma ja Carmel kopkën ets Sihor-libnat.

²⁷Ja tsëpa'an jampë nyäxyën a'oytsyow, yi'iyëm ënäty jam nëjkxp anëkëjxmtsow, jyä'ty jam ma txëëwatyën Bet-dagón, näpyatëp mëët ja nyaaxëty mëti'ipë yë Zabulón yë jyä'äyëty jyä'ä'ajtëpën, tä ja joyjyotmën mëti'ipë xyëëwajtëpën: Jefté-el, ma ënäty ja kajpnëtyën mëti'ipë xyëëwajtëpën: Bet-émek, Neiel ets jampaat jyä'ty ma txëëwatyën Cabul,

²⁸jyä'ty jam Abdón, Rehob, Hamón ets Caná, tyimja'ty jam ma Sidón mëj kajpnën.

²⁹Jam tsyoony ja tsëpa'an Sidón ets nyajxë'ëky jam Ramá, jyä'ty ma ja Tirë kajpnën napotsypë, ets nyijkxy ma txëëwatyën Hosá, jyä'ty jam ma ja Mejyën Naax'akujkpyë, mëët ja Mahaleb, Aczib,

³⁰Umá, Afec ets Rehob, jä'ä nyiwinë'atë ja kajpn i'px mäjtsk, ëpëky ja mutsk kajpn kanaak mëti'ipë mëët nyämyëwinkon'atëtën.

³¹Ya'atë jëtu'un ja it naaxwiinyëtë mëti'ipë ojts tyuka'ajëtën ja ja'ayëty jënu'un tyu'kjëëky'at tyu'kmëku'uk'atën mëti'ipë ja Aser jyä'äy'äjtypyën.

³²Ja mëtëtujkpë ja it naaxwiinyëtë mëti'ipë ojts yaj'ijxpëtsëmtën, yë'ë ojts tyuka'ajëtë ja ja'ayëty jënu'un tyu'kjëëky'at tyu'kmëku'uk'atën mëti'ipë ja Neftalí jyä'äy'äjtypyën.

³³Ja y'it nyaaxwiinyëtëty jampaat ënäty jyä'ty ma ja kajpn txëëwatën Hélef, Elón-saanánim, Adamí-néqueb ets Jabneel,; nyäxy jam Lacum ets jyä'ty ma Jordán nëëjën.

³⁴Ma ja anajnytsyowpë wyi'imyën jampaat nyäxy ma txëëwatyën Aznot-tabor ets nyijkxy ma txëëwatyën Hucoc ets jam ëpa'tkë'ëmtsow yë'ë mëët nyäpyäätyë yë Zabulón yë nyaaxjotëty. E a'oytsyow yë'ë mëët nyäpyäätyë yë nyaaxjotëty yë Aser yë jyä'äyëty. E a'oytsyow yë'ë mëët nyäpyäätyë yë nyaaxjotëty yë Neftalí jyä'äy tyimja'ty ma ja Jordán nëëjën.

³⁵Ja kajpnëty mëti'ipë ënäty naapotsyëtyën mëti'ipë yë'ë yajmooytyën, yë'ë ojts y'itë mëti'ipë xyëëwajtëpën Sidim, Ser, Hamat, Racat, Quinéret,

³⁶Adamá, Ramá, Hasor,

³⁷Quedes, Edrei, En-Hasor,

³⁸Irón, Migdal-el, Horem, Bet-anat ets ja Bet-semes. Ja kajpnëty jä'ä nyiwinë'atë majkmokx majktaxk, ëpëky ja mutsk kajpnëty mëti'ipë mëët nyämyëwinkon'atëtën.

³⁹Ya'atë it naaxwiinyëtë jëtu'un ojts tyuka'ajëtë yë ja'ayëty jënu'un tyu'kjëëky'at tyu'kmëku'uk'atën mëti'ipë yë Neftalí jyä'äy'äjtypyën, ojts tjä'ä'atë ja mëj kajpn mëët ja mutskjatyëtypë.

⁴⁰Ja mëwëxtujkpë ja it naaxwiinyëtë mëti'ipë ojts yaj'ijxpëtsëmyën, yë'ë ojts tyuka'ajëtë ja ja'ayëty jënu'un tyu'kjëëky'at tyu'kmëku'uk'atë mëti'ipë ja Dan jyä'äy'äjtypyën.

⁴¹Ma ya'atë it naaxwiinyëtën jam ënäty yajpaatë ja kajpnëty mëti'ipë yajtijtëpën Zorá, Estaol, Ir-semes,

⁴²Saalbim, Aialón, Jetlá,

⁴³Elón, Timnat, Ecrón,

⁴⁴Eltequé, Guibetón, Baalat,

⁴⁵Jehúd, Bené-berac, Gad-rimón,

⁴⁶Mejarcón ets ja Racón mëët ja it naaxwiinyëtë mëti'ipë mëët nyäwyinku'ixëtyën ja Jope.

⁴⁷E jä'ä ko ja Dan ja'ayëty ka'ap myääyëtë tniwa'aktëty ya'atë naax, paaty ojts tninëjkxtë ja Lésem kajpn ets tnitëjkëtyë, wa'ats tyaj'o'ktaaytyë mëti'ipë ënäty jam tsënaaytyëpën. Jëtu'un'äämpy ojts jam yë'ëjëty tsyënaaytyaknpëktë ets ja kajpn xëëw ojts tyajtëkatstë, jä'ä txëëwmooytyë Dan ets jëtu'un ja'amyetsy y'itëty ja xyëëw ja y'ap y'okëty.

⁴⁸Ya'atë it naaxwiinyëtë jëtu'un ojts tyuka'ajëtë tä ënäty tyu'kjëëky'at tyu'kmëku'uk'atën mëti'ipë ja Dan jyä'äy'äjtypyën, ojts tjä'ä'atë ja mëj kajpnëty ets ja mutsk kajpnëty.

⁴⁹Ko ja Israel ja'ayëty tyajwa'kxtaaytyë ja it naaxwiinyëtë ma ja ja'ayëtyën jënu'un nitu'ukjaty tyu'kja'ay'atën, ënät ojts näjyëtu'un tukniwë'ëmtëpë ja Josué ja jyä'äy, ma ja myëku'uktëjk ënäty ja nyaax të tpëktën.

⁵⁰Jëtu'un tä ënäty ja Wintsën të tni'ënä'ämën yë'ë ojts tmo'otë ja kajpn mëti'ipë xyëëwajtypyën Timnat-sérah, jam wyi'imy ma ja kopkjotmën mëti'ipë yë Efraín jyä'äy nyitënääpyën, mëti'ipë ojts yë Josué t'amëtoyën. Ja Josué ojts tampë ja kajpn tkoj'oyë ets jam tsyënaaytyaknpëjky.

⁵¹Tëkokyë ya'atë it naaxwiinyëtë mëti'ipë yam të yajnimëtyä'äkyën, yë'ë ojts tyajwa'kxtë yë teety Eleazar, Josué ets mëjja'aytyëjkëty, aak ojts t'ijxpëtsëëmta'atë tä ënäty nitu'ukjaty tyuka'ajëtën, jam Wintsën wyintum ma ja wit tëjk yajnitëkën ma ja näpyaatë y'ityën mëët yë Wintsën. Ya'atë jam ojts tyunyë jyätyë ma ja it naaxwiinyëtë txëëwatyën Siló. Jëtu'un'äämpy ja Israel ja'ayëty tëkokyë ja y'it nyaaxwiinyëtë tpëjktaaytyë.