Read Biblia Mixe de Quetzaltepec Josue 21 Bible Online

Josue 21 - Biblia Mixe de Quetzaltepec bible

Josue 21

¹Ënät ja mëjja'aytyëjkëty mëti'ipë Leví ja'ayëtyën ojts nyëjkxtë jam ma Siló kajpnën, ma ja Canaán itën, ets mëët myëtya'aka'antë ja teety Eleazar, Josué ets ja mëjja'aytyëjkëty mëti'ipë mëj'äämpy ijtëpën ma ja Israel kajpnën. Tä t'ënëmaaytyë: Tëëyëp ojts yë Wintsën t'ënëëmë yë Moisés ko ëëtsëty nyajmo'otëty yë nkajpnëtyës maas ntsëënëtëyën ets näjyëtu'un mëët ja nyinaax maas ja njëyujk ntsajpkaa tyänëtëtyën.

³Paatykyëjxm ja Israel ja'ayëty ojts ja kyë'ëmkajpn tpuyaktë ets tmooytyë ja Leví ja'ayëty jëtu'un tä ënäty ja Wintsën të tnikäjpxyën.

⁴Jëyëjp ojts yaj'ijxpëtsëmtë pën jëyëjp tuka'ajëp ja naax ets yë'ë ojts jëyëjp yaj'ijxpëtsëmy yë Quehat yë y'u'unk y'ëna'k. Ja Quehat ja y'u'unk y'ëna'k mëti'ipë yë teety Aarón y'u'unk'ajtyp y'ok'ajtypyën, majktëkëëk ojts tyuka'ajëtë ja naax kajpn, jä'ä ja mëti'ipë ënäty jyä'ä'ajtëpën ja Judá ja'ayëty, Simeón ets Leví.

⁵Ja wiinkpë ja ja'ayëty mëti'ipë ja Quehat y'u'unk'ajtyp y'ëna'k'ajtypyën, majk ojts ëpëky ja kajpn jyaak tuka'ajëtë mëti'ipë Efraín, Dan ets kujkwä'kxy ja Manasés jyä'äy'ajtëpën.

⁶Ënät yaj'ijxpëtsëëmy ja it naaxwiinyëtë mëti'ipë ojts tyuka'ajëtën ja Guersón ja y'u'unk y'ëna'k; majktëkëëk ojts ja kajpn tyuka'ajëtë mëti'ipë ënäty nyitënaaytyëpën ja jyä'äyëty ja Isacar, Aser ets Neftalí ets kujkwä'kxypyë ja Manasés ja jyä'äy jampë yajpaatën Basán.

⁷Ja ja'ayëty jënu'un tyu'kmëku'uk'atën mëti'ipë y'ap'ajt y'ok'ajtëpën ja Merarí majkmäjtsk ojts ja kajpn tyuka'ajëtë mëti'ipë ënäty nyitënaaytyëpën ja jyä'äyëty ja Rubén, Gad ets Zabulón.

⁸Ja Israel ja'ayëty ijxpëtsëmy ojts tyajwa'kxtë ja naax kajpn mëët ja nyinaax ma ja jëyujk tsajpkaa tyänëtëtyën, jëtu'un tä ënäty ja Wintsën të tuk'ëne'emyën ja Moisés.

⁹Ya'atë kajpn mëti'ipë yam yajnikajpxaanpën yë'ë ojts yajmo'otë yë Judá ets Simeón yë jyä'äy.

¹⁰E ko ojts xyëëw yaj'ijxpëtsëmtë yë'ë ojts tyuka'ajëtë ja Quehat ja jyä'äy mëti'ipë ja Aarón y'u'unk'ajtyp y'ok'ajtypyën, jä'ä ko yë'ë ojts ëka'any tyuka'ajëtë.

¹¹Ma ja kopkjotmën mëti'ipë yë Judá nyitënääpyën yë'ë ojts tyuka'ajëtë ja kajpn mëti'ipë yajtijpën Hebrón, ma ijty ja Anac ja'aypyajkyeny ja y'u'unk y'ok tsyëënëtën mëët ojts yajmo'otë ja nyinaax nyikam ma ja jyëyujk tsyajpkaa tyänëtëtyën.

¹²Jä'ä tëy ja myëjnaax ets ja mutskëtypë ja kajpn yë'ë ojts tmo'otë ja Caleb, ja Jefuné ja myaank.

¹³Ja Hebrón kajpn mëti'ipë tsoktakn waanpën ets jam ja ja'ay kyäktso'oktëty mëti'ipë ja myëku'uk ka'ap tsyokyëty të tyaj'ookyën, yë'ë ojts yajmo'otë yë Aarón ja y'u'unk y'ok ojts ëpëky yajmooytyë ja Libná kajpn,

¹⁴Jatir, Estemoa,

¹⁵Holón, Debir,

¹⁶Aín, Jutá ets ja Bet-semes. Ya'atë taxtujkpë ja kajpn ëpëky ënäty tmëëtëty ja nyinaax nyikam ma tjëkyepyën tyänëtëty ja jëyujk tsajpkaa.

¹⁷Tääts näjyëtu'un ojts yajmooytyëpë mëti'ipë ja Benjamín nyaax'ajtyp kyam'ajtypyën, ja kajpn jä'ä txëëwatë Gabaón ets Gueba,

¹⁸Anatot ets Almón, taxk ja kajpn jam yajpaaty ets tu'ukjaty aakmëët yë nyinaax nyikam ma tjëkyepyën ja jëyujk tsajpkaa tyänëtyën.

¹⁹Tää yajja'akyukë ko ja kajpn mëti'ipë yajmooytyën ja Aarón ja y'u'unk y'ok, jä'ä wyinë'ajtë majktëkëëk, tu'ukjaty ja kajpn aakmëët ja nyinaax nyikam ma tjëkyepyën ja jëyujk tsajpkaa tyänëtëty.

²⁰Ëpëky ojts yaj'ijxwa'kxpë ja naax kajpn mëti'ipë yë Efraín nyitënääpyën ets yajmooy ja wiinkëtypë ja Leví ja'ayëty mëti'ipë ënäty ka'ap ja nyaax tpëktënëm, nän yë'ë yë Quehat yë y'u'unk y'ok.

²¹Ma ja kopkjotmën mëti'ipë yë Efraín nyitënääpyën yë'ë ojts yajmo'otë ja Siquem kajpn ets jam ja ja'ay kyäktso'oktëty mëti'ipë ënäty ka'ap tsyokyëty ja myëku'uk të tyaj'ookyën, ëpëky näjyëtu'un ojts yajmo'otë ja kajpn mëti'ipë yajtijpën Guézer.

²²Näyjyëtu'un ja Quibsaim ets ja Bet-horón, taxk ja kajpn nyäpyäätyë ets tu'ukjaty aak jyëkyejpy ja jëyujk tsajpkaa tyänëtëtyën.

²³Ma ja Dan ja'ay ja nyaaxjotëtyën yë'ë ojts yajmo'otë ja kajpn mëti'ipë yajtijtëpën Eltequé, Guibetón,

²⁴Aialón ets ja Gad-rimón, taxk nyäpyäätyë ja kajpn ets aakmëët ja nyinaax nyikam ma tjëkyepyën ja jëyujk tsajpkaa tyänëtëtyë.

²⁵E ma ja mëti'ipë nyitënaaytyëpën ja kujkwä'kxypyë ja Manasés ja jyä'äy yë'ë ojts yajmo'otë ja naax kajpn mëti'ipë xyëëwajtëpën: Taanac kajpn ets Gad-rimón kajpn; je'eyë mäjtsykyë y'ijty ets aakmëët ja nyinaax nyikam ma tjëkyepyën tyänëtëty ja jëyujk tsajpkaa;

²⁶Tä yajja'akyukë ko jä'ä ojts wyinë'aty ja kajpn majk mëti'ipë ja Quehat ja'ayëty jyä'äy'ajtën ets tu'ukjaty aakmëët ja nyinaax nyikam ma tjëkyepyën tyänëtëty ja jëyujk tsajpkaa.

²⁷Ja Leví ja'ayëty mëti'ipë yë Guersón y'u'unk'ajtyp y'ok'ajtypyën, ojts näjyëtu'un yajmo'otë yë nyaax kyajpnëty, yë'ë ojts tjä'ä'atë mäjtsk ja naax kajpn mëti'ipë ënäty nyiwantëpën yë Manasés yë jyä'äy ets aakmëët yë nyinaax nyikam ma tjëkyepyën tyänëtëty ja jëyujk tsajpkaa; ja kajpnëty jä'ä mëti'ipë yajtijtëpën Golán, jampë yajpaatyën Basán, mëti'ipë tsoktakn wyantëpën ets näjyëtu'un ojts yajmo'otë ja Beesterá kajpn.

²⁸Ja kajpnëty mëti'ipë ënäty nyitënaaytyëpën ja Isacar ja jyä'äyëty ets yë'ë yajmooytyë yë Leví ja'ayëty jä'ä ja Quisión, Daberat,

²⁹Jarmut ets ja En-ganim kajpn, jä'ä nyäpyäätyë ja kajpn taxk, aakmëët ja nyinaax nyikam ma tjëkyepy ja jëyujk tsajpkaa tyänëtëtyën.

³⁰E ja kajpn mëti'ipë yë Aser yë jyä'äy nyitënaaytyëpën jä'ä ojts yajmo'otë ja Misael, Abdón,

³¹Helcat ets ja Rehob, jä'ä nyäpyäätyë taxk ja kajpn ets aakmëët ja nyinaax nyikam ma ja jëyujk tsajpkaa tyänëtëtyën.

³²E ma ja Neftalí ja nyaaxjotën tëkëëk ojts jam ja kajpn yajmo'otë aakmëët yë nyinaax nyikam ma tjëkyepyën ja jëyujk tsajpkaa tyänëtëty: tu'uk txëëwaty Quedes mëti'ipë jamën Galilea ets tsoktakn kajpn wya'anëty, tääts ja Hamot-dor ets ja Cartán näjyëtu'un;

³³tä yajja'akyukë ko ja kajpn mëti'ipë ojts ja Guerso ja'ayëty tyuka'ajëtën, jä'ä wyinë'aty majktëkëëk; tu'ukjaty aakmëët ja nyinaax nyikam ma tjëkyepyën ja jëyujk tsajpkaa tyänëtëty.

³⁴Ja Leví ja'ayëty mëti'ipë ka'ap ja nyaax tpëktënëm, tä ja Merarí ja y'u'unk y'okën, yë'ë ojts yajmo'otë ja naax kajpn mëti'ipë Zabulón yë jyä'äy nyitënaaytyëpën: yë Jocneam, yë Cartá,

³⁵yë Dimná ets ja Nahalal, taxk wyinë'aty ja kajpn mëët ja nyinaax nyikam ma ja jëyujk tsajpkaa tyänëtyën.

³⁶E ma ja nyaaxjotmën ja Rubén ja jyä'äy yë'ë ojts yajmo'otë ja kajpn mëti'ipë yajtijtëpën Béser, Jahas,

³⁷Cademot ets ja Mefáat, jä'ä wyinë'aty ja kajpn taxk aakmëët ja nyinaax nyikam ma tjëkyepyën tyänëtëty ja jëyujk tsajpkaa.

³⁸Ma ja it naaxwiinyëtën mëti'ipë yë Gad yë jyä'äy nyitënaaytyëpën yë'ë ojts jam yajmo'otë ja naax kajpn mëti'ipë yajtijtëpën Ramot jampë Galaad yajpaatyën ets wya'anëty tsoktakn kajpn, tä ja Mahanaim,

³⁹Hesbón ets Jazer kajpnën; jä'ä nyäpyäätyë ja kajpn taxk ets aakmëët ja nyinaax nyikam ma tjëkyepyën tyänëtëty ja jëyujk tsajpkaa.

⁴⁰Tä yajja'akyukë ko ja Leví ja'ayëty mëti'ipë ënäty ka'ap ja nyaax tpëktënëm, ijxtëm ja Merarí ja y'u'unk y'ëna'kën, jä'ä ojts wyinë'aty ja kajpn mëti'ipë yajmooytyën majkmäjtsk.

⁴¹Ja kajpn mëti'ipë yajmooytyën ja Leví ja'ayëty ma ja Israel ja'ayëty ënäty të tniwa'aktën ja it naaxwiinyëtë jä'ä wyinë'ajty wëxtyikxy tyuktujk aakmëët ja nyinaax nyikam ma tjëkyepy tyänëtëtyën ja jëyujk tsajpkaa.

⁴²Ja naax kam ma ja jyëyujk tsyajpkaa tyajtänëtëtyën aakjam ënäty yajpaaty kajpnpa'a kajpnux. Aakjëtu'un oymyëti'ipë kajpnëty.

⁴³Jëtu'un'äämpy ojts ja Wintsën tkuuytyuny ja y'aaw y'ayuk ko tmooytyääy ja Israel ja'ayëty ja nyaax kyam, jëtu'un tä ënäty të tukwinwanën ja y'ap y'okëty. E ma tääpë ja it naaxwiinyëtën jam ojts tu'ukyë tsyënaaytyaknpëjknëtë.

⁴⁴Yë Wintsën ojts jëtu'un tuny tä ënäty të twinwanën, jotkujk ja nyaax kyajpn ojts tyajwë'ëmy ma tääpë it naaxwiinyëtën. Ja myëtsiptëjkëty ka'ap ojts myäyëtë jä'ä ko ja Wintsën ojts kë'ëm tyimkuwa'anëtë.

⁴⁵Nitu'uk ojts ja Wintsën ja y'aaw y'ayuk tkaninaxy, tu'kë'ëyë tkuuytyuuntaay tä ënäty të tnikäjpxyën ets të twinwanën ma ja Israel ja'ayëtyën.