Read Biblia Mixe de Quetzaltepec Josue 5 Bible Online

Josue 5 - Biblia Mixe de Quetzaltepec bible

Josue 5

¹Tëkokyë yë yajkutujkpëtëjk mëti'ipë ënäty jam yajpatëpën xëëwkëtä'äkytsyow ma ja Jordán mëjnëëjën, ets ja yajkutujkpëtëjk Canaán ja'ayëty, jampë tsyëënëtën winkon ma ja naax mejy'itkujkpyën; ojts nijawëtë ko ënäty ja Tios ja Jordán mëjnëë të tyajtë'ëtsy ma ja Israel ja'ayëty nyajxtën, paaty ojts tsyë'ëkëtë ets ka'ap tnipëtë'ktë ja Israel ja'ayëty.

²Ënät yë Wintsën t'ënëmaay ja Josué: Oytyun mäjtsk tëkëëkën yë tsujkn, yë tsaa mtuk'oytyunëp ets xynyatsujk'ëwtijtëty ja ye'etyëjkajtën ja Israel ja'ayëty mëti'ipë ka'ap ja nätsyukë tpaatënëm.

³Tä ja Josué ja tsujkn tjanty'oytyuuny ets ojts tnatsujk'ëwtijta'ay ja ye'etyëjk'ajtënëty ja ye'etyëjktëjk jam ma ja Aralot kopkën.

⁴Ya'atë nätsyukë paatykyëjxm ojts jëtu'un tuny, jä'ä ko ja ja'ayëty mëti'ipë jap tso'ontën Egiptë tëë ënäty ja xyëëw jyëmëjt tpatnëtë ets nyëjkxtëty tsiptuunpë, ojts ja y'o'ktaaynyëtë jam të'ëts'itjotm.

⁵Ja Israel ja'ayëty mëti'ipë jap Egiptë tso'ontën oy ënäty aak tsuky jyayajpaatë, ja mëti'ipë mëxu'unk'ajtën jam të'ëts'itjotm ka'ap ënäty tsyuky'atë.

⁶Yë Israel ja'ayëty wëxtyikxy jëmëjt jam jyëtijtë të'ëts'itjotm, ja ja'ayëty mëti'ipë jap tso'ontën Egiptë tëë ënäty y'o'ktaaynyëtë, mëti'ipë jyëkyäjpnëtëp tsyiptuntëty. Tääpë ja'ayëty ka'ap ënäty të tmëmëtowtë ja Wintsën, paaty ojts yajxon tyim'ënëmxëtë ko ka'ap nëjkx tyëkëtë ma ja it naaxwiinyëtën mëti'ipë të yaj'ëwaanëtën ja y'ap y'okëty ko yë'ë yajmo'oja'antë ja it naaxwiinyëtë ma ja jë'kxy pëky ka'ap y'ëmaaytyä'äkyën.

⁷E paaty kyëjxm jëtu'un yë Josué natsujk'ëwtijtaay ja ye'etyëjktëjk ja ye'etyëjk'ajtënëty mëti'ipë ënäty ok të myintën naaxwiiny, mëti'ipë ja Tios pyëjktakën kutëkats ma ja mëti'ipë të y'ooktën, jä'ä ko yë'ëjëty ka'ap ënäty tsyuky'atë, jä'ä ko tu'ujoty yajpaatë.

⁸Ko ojts yajtsujkta'atë ojts t'ëmaay'atë kanaak xëëw koonëm yajxon tsyoktaaytyë.

⁹Ënät yë Josué y'ënëmaayë Tios: Mëët ya'atë nätsyukë yë'ëjës mëët të njëpëky ja tsëtyu'un ma Egiptë ja'ayëtyën. E paatykyëjxm tampë it naaxwiinyëtë yajtijy Guilgal.

¹⁰Yë Israel ja'ayëty jam ojts tsyënaaytyaknpëktë Guilgal, e ko myajkmajkts'aany ja po'o jää ojts tnixëëwtuntë ja ëmaayxyëëw, ma ja mëj joyën mëti'ipë Jericó kajpn jyä'ä'ajtypyën.

¹¹Jä'ä xëëw ojts tkaytyë ja tsajpkääky ka'apë tsyooymyëëtëtyën ets näjyëtu'un yë tsajpmoktë'ëts; e ko komjëpom yë'ë ojts tjë'kxnëtë mëti'ipë ijtp wintëëpën ma tampë ja it naaxwiinyëtën.

¹²Jä'ä xëëw ojts t'ëxmajtsnëtë ja maná, ka'ap ojts t'ëkaaynyëtë. Ja jë'kxy pëky mëti'ipë jam yajpatpën ma tääpë it naaxwiinyëtën jä'ä ojts tjë'kxnëtë.

¹³Tëkok ojts jyäty kyëpety, jam ënäty yë Josué yajpaaty winkon ma Jericó kajpnën, ko tu'uk yë ja'ay nyimiinë mëët yë yenypyujxn jam kyë'ëkëjxm, ënät ja Josué ojts tninëjkx ets tyajtëëy: ¿Wi'ix miny ëëts xypyutëkëjantëpë ëkë mëtsip mputëkëjäämpyë?

¹⁴Ënät ja ja'ay y'ëtsooy: Ka pënës nkaputëkëja'any. Ëjts Tiosës xykyäjxjëtijtp, yë'ëjës niwintsën'ajty yë kyukäjpxytyëjkëty. Paaty ojts yë Josué ënätyë nyäkyoxtënaaytyä'äkyë ets tyajtëëy: ¿Tii yë Wintsën mtukmëkäjxëyëp maas ëjtsën?

¹⁵Ënät ja Tios ja kyukäjpxy nyiwintsën, y'ëtsooy: Jän yë mkë'ëk, jä'ä ko tääpë it naaxwiinyëtë mëti'ipë mtukte'empyën ëmaay yë'ë. Ënät ja Josué ojts tjantyjyeny ja kyë'ëk.