Read Biblia Mixe de Quetzaltepec Josue 9 Bible Online

Josue 9 - Biblia Mixe de Quetzaltepec bible

Josue 9

¹Yë yajkutujkpëtëjk mëti'ipë jam ënä'ämtëpën ma Hit ja'ayëtyën, Amor ja'ayëtyën, Canaán ja'ayëtyën, Ferez ja'ayëtyën, Heve ja'ayëtyën ets Jebús ja'ayëty ojts tnijawëtë wi'ix ënäty të jyäty të kyëpetyën jam Aí. Ya'atë yajkutujkpëtëjk jam ënäty tsyëënëtë anajnytsyow'äämpy ma ja Jordán mëjnëëjën ets tëkokyë ma ja kopkjotmën, ma ja joyjyotmën ets jampaat ma ja Mejyën Naax'akujkpyë pya'ajën ets tyimja'ty jam ma ja Líbano y'itjotmën.

²Ënät ojts tu'ukyë nyämyatsëtë aak yë'ëjëty ets tkäjpxy'atë ko tsyiptuna'antë mëët ja Josué ets tëkokyë ja Israel ja'ayëty.

³E ja Heve ja'ayëty mëti'ipë tsënaaytyëpën Gabaón ojts tnijawëtë wi'ix ënäty të y'ëti'ityën ja Josué jam Jericó ets Aí.

⁴Ënät tuknipëjktakëtyë ets twin'ëëna'antë. Tää tyu'utëjkëtyë ma kyëruktsëtyën. Yë'ë tyukniwë'ëntë tuk xa'k, näjyëtu'un po'o ak a'ukën këëtspë ets axuyëpë.

⁵Ojts ja wyitëty kyë'ëkëty tuktëkëtë mëti'ipë këëtsën ets axuyën jä'ä myëtso'ontë ja tsajpkääky mëti'ipë tëë tyëtstaaynyën ets të nyi'ëëxyoonën.

⁶Paaty ko jam jyajtë Guilgal ma ja Josué ets tëkokyë ja Israel ja'ayëty ënäty jam të tsyënaaytyaknpëktën, tyaa t'ënëmaaytyë: Jëkäm'it ëëts ntsoontë ets miits yaa nimintë ntsoktës tu'uk ja mëyajtën xytyuntëty ja käjpxytyu'unën mëët ëëtsëty.

⁷Ja Israel ja'ayëty tyaa t'ëtsoowtë ja Heve ja'ayëty: Ëëtsëty wi'ixës n'uknijawëtëty pën janty jëkäm'itën mtsoontë, wä'änxyëp muum winkon mtsëënëtë; ¿E wi'ix jëtu'un ja käjpxytyu'unën ëëts n'ëktuntëty mëët miitsëty?

⁸Tä yë'ëjëty t'ënëmaaytyë ja Josué: Wintsën, tyaa mijts të nimintë, mijts ix tii xytyuktunantëpës. Tääts yajtëëwëtë: ¿Mpënxë miitsëty? ¿Maajën mtsoontë?

⁹Tää y'ëtsoowtë: Ëëtsëty jëkäm'it ntsoontës, nimintë yaa miitsëty mëët ko ja mWintsën Tios mëj'äämpy yajnikäjpxy jamtsow muum, tëëjës nijawë'atë ko ojts ja myëj'ajtën tyaj'ixyë mëjwiin këjää jap Egiptë,

¹⁰ets näjyëtu'un wi'ix tuunyën ja yajkutujkpëtëjk mëti'ipë Amor ja'ayëtyën jampë yajpaatën nëë'awinaxy ma Jordán mëjnëë jyënäkyën. Jä'ä ja Sihón mëti'ipë jam kukajpn'ajtpën Hesbón ets ja Og jampë y'ëne'emyën Basán mëti'ipë tsënaayën jam Astarot.

¹¹Paaty ëëts yë nmëjja'aytyëjkëty ets nmëkunaax nmëkukajpnëty të xy'ënëëmëtës: Nipëjktaakëtë ets ixtë mëti'ipë mëtu'uye'eytyëpën ets nëjkx xy'ixtë ma jam yajpaatën ets xy'ënëëmëtëty ko yë'ë mnimiintëp ets yë'ë nyija'ap tii xytyuktuna'anëmë ets pën kyupëjkpy ets jeexyë ja käjpxytyu'unën mëët ntu'unëmë.

¹²Koos ntso'ontë jam maas nkukajpn'atën, ya'atë tsajpkääky an ets oy ënäty, e tyam, tëë tsyëtstaaynyë ets tëë nyipu'taaynyë.

¹³Näyjyëtu'un ya'atë po'oxuy koos nyaj'ujtstë mëët yë tsatym nyëë aak oynyëm ënäty, e tyam tëë kyë'tsnë. E näjyëtu'un ëëts ja nwit ntujkxyëty, tëë kyë'tstaaynyë jä'äkyëjxm ko ja në'ë tu'u kyëjääjëty ets jekyëpës jam ntso'onëtë.

¹⁴Ja Israel ja'ayëty ojts tjanty y'ixtë ja jyi'kxy pyikyëty ja Gabaón ja'ayëty mëti'ipë myëmiintën ko janty jëtu'un ënäty tä y'ëna'antën, ja Wintsën ka'ap ojts jëyëjp tyajtëwtë.

¹⁵Josué ojts jëtu'unpë ja aaw ayuk tkupëky ets tuuny ja käjpxytyu'unën mëët yë'ëjëty, ënät nyäy'ënanëtë ko ka'ap maa tsip käjpxy tmëët'ata'antë ets jëtu'un ojts tnima'kxtë ja jyuuky'ajtënëty. Näyjyëtu'un ja Israel mëjja'aytyëjkëty ojts t'a'ixëtë.

¹⁶Kom tëkëëk xëëw ja Israel ja'ayëty tnija'awëtyë ko ja Gabaón ja'ayëty wiinkontëm ënäty tsyëënëtë.

¹⁷Ko jëtu'un tnija'awëtyë ënät tnitso'ontë, kom tëkëëk xëëw jam jyajtë ma ja kyajpnëtyën ja Gabaón ja'ayëty, jä'ä ja kajpn txëëwatë Gabaón, Quefirá, Beerot ets Quiriat-jearim.

¹⁸E ja Israel ja'ayëty ko jam jyajtë ka'ap ojts tyaj'ooktë ja Gabaón ja'ayëty, jä'ä ko ja kopktëjkëty tëë ënäty jëtu'un tukwinwanëtë ja Wintsën mëti'ipë Tyios'ajtëpën ja Israel ja'ayëty ko tnimä'kxa'antë ja jyuuky'ajtënëty. Paatykyëjxm ja mëjja'aytyëjkëty ojts tyukjoot'anpëkëtë ja Israel kajpn.

¹⁹Ets ja mëjja'aytyëjk y'ënantë: Tëës n'ënëmaaynyëtë mëët yë Wintsën yë xyëëw ko ka'ap nyaj'ooka'anëmë. Tyam ka'ap tjëkyepy tii ntu'unmëty mëët yë'ëjëty.

²⁰Kopkpëky ko nimä'kxmëty yë jyuuky'ajtënëty, jä'ä ko ka'ap jëtu'un ntu'unmëty, yë Wintsën nëjkxëp xytyukjoot'anpëjkëmë.

²¹Paatykyëjxm ja mëjja'aytyëjkëty ojts t'ënëëmëtë ja Israel ja'ayëty ets këtii ni pën tyaj'ooktëty, je'eyë tëy tyajtuntëty, tyajja'axypyuxtëty ets tyajnëëniwitstëty, tmëtuntëty ja naax kajpn. Jëtu'un'äämpy ja mëjja'aytyëjkëty tpatuuntë ja y'aaw y'ayukëty mëti'ipë ënäty të twinwanëtën.

²²E ja Josué ojts tyajtëy ja Gabaón ja'ayëty ets t'ënëmaay: ¿Tiijës ko të xywyin'ëëntë ko m'ëna'antë ko jëkäm'it mtsoontë ets pën yääyëtëm winkon mtsëënëtë?

²³Paaty yam n'ënëëmëtë ko miitsëty poky mwë'ëma'antë ets xëmë je'eyë mëtuntëty. Yë'ë xëmë mtuunk'atëp; yë ja'axynyipujxk ets nëëkoonk mëti'ipë tunëpën ma Wintsën yë jyëën tyëjkën.

²⁴Ënät t'ëtsoowtë ja Josué: Ëëtsëty paatykyëjxmës jëtu'un të n'ëtë'ëtstë, jä'ä ko miits ënäty ntsë'këtyëp, koos xy'ëkyaj'o'ktaaynyëtëty, jä'ä ko tëëjës nijawëtë ko yë Moisés ojts yë Tios y'ënë'ëmxëty, ko tëkokyë ya'atë it naaxwiinyëtë tniwa'kta'ajëty ets tyajkutëkoyëty tu'kë'ëyë jënu'un yaa ja'ay tsyëënëtën.

²⁵E ëëtsëty tyaajës nyajpaatë mijts mwintuuy, mijts ix tiijës xytyuktunantëp, oy tii xytyuk'ënä'ämtëtyës, ëëts jëjp'ixy ntimyajpaatës.

²⁶Jëtu'un'äämpy ojts yë Josué ka'ap t'ëwa'atsy ets Israel ja'ayëty tyaj'ooktëty yë Gabaón ja'ayëty.

²⁷Yë'ë ojts tuknipëky ets tuunk'atëty yë nija'axk, nëëkoonk nëëwijtsk ets tyuntëty maa ja naax kajpnën ets ma ja wintsë'këntyaknën jam ma ënäty ja Wintsën të twin'ixyën. Tyampaat yë Gabaón ja'ayëty yë'ë jëtu'unpë tyuunk'ajtëp.