Read Biblia Mixe de Quetzaltepec 1 Timoteo 1 Bible Online

1 Timoteo 1 - Biblia Mixe de Quetzaltepec bible

1 Timoteo 1

¹Ëjts Pablo, Kristë Jesús ja y'ayuk kajpxwa'kxpë, mëti'ipës yë Tios Yajknitsokpë të xytyuk'ëne'emyën ets ja Kristë Jesús, mëti'ipë njëjp'ijxëmën,

²yajkajpxpo'kxy ja Timoteo mëti'ipë mëtëy yaj'u'unk'ajtpën ma mëpëjkënën. Wä'än ja Tios Teety ets ja Wintsën Jesukristë mmo'oyë ja kënu'kxën, pa'ëyo'owën ets ja jotkujk'ajtën.

³Ijxtëm ojts mijts nnëëmën koos nnëjkxany jam Macedonia y'itjotm, wë'ëm jam Éfeso ets xy'akajpxtukëty yë ja'ayëty këtiipë tëkatsy yaj'ijxpëktëty ets wiink ja winma'any tmëtëkëtëty,

⁴ets ka'ap tmëtoow'ittëty ja apmëtyä'äky tëëyëpë tyunyë jyätyën. Jëtu'unpë mëtyä'äky je'eyë nëkoo yajtsiptuny ets ka'ap pyutëkë ma ja Tios yajjot'atyën ko yajmëpëky.

⁵Jä'äkyëjxm tääpë ënä'ämën jyääjëty ets winpity atëjy nnätsyojkëmëty nixim niyam mëët ja oyjyot oywyinma'any ets ja mëtëypyë ja mëpëjkën.

⁶Tëë jënaakën t'ëxmajtsnëtë ja mëpëjkën ets të tpatëjkënëtë ja aaw ayuk ka'apë tsyoowpaatyën.

⁷Jyatsojktëp ets jeexyë yaj'ixjpëktë ets nimëtya'aktë ja Tios ja y'ënä'ämën tyiyajtën, je'eyëp ko tkawinjawëtë yë'ëpaat ka'ap tukjotkujk'atë mëti'ipë nyimëtyaktëpën.

⁸Nnija'awëm ko ja Tios ja y'ënä'ämën oy yë'ë, ko yajpatuny ijxtëm pyaat'atyën.

⁹Näy nija'awëm ko ka'ap yë'ëjëty ja ënä'ämën të yajtuknipëjktaakëtë mëti'ipë ja oypyë tyuuntëpën. Yë'ë të yajtuknipëjktaakëtë mëti'ipë ëxëëk ja'ay'ajtëpën, mëti'ipë kakäjpxymyëtoowtëpën, mëti'ipë ja Tios kyamëjpëjktaktëpën, mëti'ipë pokyjyä'äyëtyën, mëti'ipë y'ëxëëk'ijxtëpën ja Tios ja jyä'ä, mëti'ipë ka'ap twintsë'ëkëtën ja Tios, mëti'ipë ja tyaak tyeety yaj'o'ktëpën, mëti'ipë yajja'ay'o'ktëpën,

¹⁰mëti'ipë yajwintsë'këntëkooytyëpën ja pëjkën ukën, mëti'ipë ja myëye'etyëjk ëkë myëto'oxytyëjk myëët'ajtëpën, mëti'ipë ja'amyä'tstëp, mëti'ipë win'ë'ëntëp, mëti'ipë ja Tios yajkajpxtëpën mëët ja antakën, ni'ëmukë jënu'un tmëtsip'atën ja mëtëypyë ijxpëjkën.

¹¹Ya'atë mëtëypyë ijxpëjkën yë'ë mëët nyäpyäätyë ja oy aaw oy ayuk mëti'ipës të xytyuknipëkyën ja Tios kënu'kxypyë.

¹²Nkukajpxëpës ja nWintsën'ajtëm Jesukristë koos të xymyo'oy mëk'ajtën, yë'ëjës të xyajnaxy wa'ats ja'ay etsës të xywinwitsy etsës nmëtunëty,

¹³oyës ënäty ëxëëkjaty nnikäjpxy nimëtyä'äky ja Tios etsës n'ixjëtity npajëtity ja Jesús ja myëpëjkpëtëjk. E ojtsës ja Tios xypya'ëyoy, jä'ä ko ka'anëm ënäty nmëpekyës ets ka'anëmës ënäty nnijawë tiis ntuunpy.

¹⁴Jëtu'un ja Wintsën ja mëjmëyajtën të tuny maas ëjtsën etsës të xymyo'oy ja mëpëjkën, tsojkën ja'awën mëti'ipë nmëët'ajtëmën ko tu'ukyë ja Kristë Jesús të nmëpëjkëmë.

¹⁵Tëyajtën ya'atë, mëpëktë ni'ëmukë: Kristë Jesús yë'ë të myiny naaxwiiny ets të tyajtso'oky ja pokyjä'äytyëjk, maas ëjts jëyëjp ntuktso'ontä'äkyën.

¹⁶Paaty ja Tios të xypya'ëyoyës ets ja Jesukristë tyaj'ixëtëty ma ëjtsën ja myä'kxtujkën. Jëtu'untsës nyajnikëxë'ëky ma ja mëpëjkpëtëjkëtyën ko yajpaata'any ja juukyajtën xëmëkyëjxmëpë.

¹⁷Mëjjaw jaantyjawë ja Tios y'itëty, yë'ë tu'ukyë Tios'ajtp, mëti'ipë xëmëkyëjxm ijtpën, mëti'ipë ka'ap y'ookyën ets ka'ap yaj'ixyën. Oy jyëtu'un'atëty.

¹⁸Timoteo, u'unk maay; mijts yam ntuknipëjkpy ets ja tsip xy'atänëty mëët ja mëpëjkën ets ja jot winma'any, jëtu'un ijxtëm ojts ja käjpxynyajxpëtëjk mnimëtyä'äkyën. Jënaakën, mëti'ipë ojts ka'ap tja'akyukën ja jyot wyinma'any, tëë nyäyajtu'utëkoyëtë.

²⁰Jëtu'un jyajtë ja Himeneo ets ja Alejandro, mëti'ipës të ntukë'ëtëkëtën ja mëjku'u ets tyukwij tyukäjëtëty ets ka'ap ja Tios tnäkymyëkajpxtëkoytyëty.