Read Biblia Mixe de Quetzaltepec 1 Timoteo 3 Bible Online

1 Timoteo 3 - Biblia Mixe de Quetzaltepec bible

1 Timoteo 3

¹Tëyajtën ya'atë: Pën jää pën t'atsoky ja kutuunk'ajtk, oytyuunk y'atsojkpy.

²Paaty, jëtu'unpë ja ja'ay ka'ap tjëkyëpy wi'ix yaj'ojëty. Tu'ukyë mëpaat ja tyo'oxytyëjk tmëëttsëënë ets mëtëy jyuuky'atëty; niwijy ets mëët. Yajja'ajta'akëp ja jëpyaat jëpyo'kxy ma tyëjkën; ets jyatëp wi'ix yaj'ixpëkëtyën;

³ka'ap y'uukëty myu'ukëtëty, ka'ap tsyipja'ay'atëty, mä'kxtukëp, ka'ap meeny t'ook'atëty.

⁴Jyatëp y'ënä'ämëty tyëkoty, ets jyatëp wi'ix tu'uwinwowëtyën ja y'u'unk y'ëna'k mëtëy, wi'ix myëmëtowtëtyën ets wyintsë'këtëtyën;

⁵jä'ä ko pën ka'ap tu'uk ja ja'ay tjaty yajkutukëty tyëkoty, ¿wi'ix tkëwent'ata'any ja Tios ja myëpëjkpëtëjk?

⁶Paaty ka'ap mëpaat yë'ë kyutuunk'aty ja ja'ay mëti'ipë naamnëm Tios mëpëjkpën; këtiipë nyämyëjpëjkta'akëtëty ets kya'ajëty ëxëëktum ijxtëm jyäjtyën ja mëjku'u.

⁷Näyjyëtu'un wiinkutsë'ëkëtëp ja mëpëjkpëtëjk, këtiipë nyipäxëtëkëty ets ja mëjku'u yajtëkoyëtëty.

⁸Näyjyëtu'un ja mëpëjkpëtëjk mëti'ipë ja tuunk të yajtuknipëktën jap tsajptëkoty, yë'ë mëti'ipë jyëkyejpy yajwintsë'ëkëty, mëti'ipë ka'ap y'ëëwtëkoy kyajpxtëkoytyën, ka'apë y'uuktën myu'ukëtën ets ka'apë yi'iyë wit meeny tpa'ix tpawoontën.

⁹Ja tëyajtën tyuk'o'kpätëp mëti'ipë të nnija'awëmën ko të nmëpëjkëmë ets wa'ats tmëët'atëty ja jot winma'any.

¹⁰Jëyëjp mëpaat yaj'ixy yajnijawë pën ka'ap tii tuuntëkoy ets pën ka'ap tii tëko'oyën tmëtëkë, jyëkyejpy yajmo'ojëty ja tuunk ma ja mëpëjkpëtëjkëtyën.

¹¹Näyjyëtu'un yë tyo'oxytyëjk wiinkutsë'ëkëtëp ja ja'ay, ka'ap pyi'tskajpxëty, mëtëy tyu'uye'eyëty ets oy winë tunëty.

¹²Tu'uk ja mëpëjkpë mëti'ipë yajtuunkmo'ojëpën tsajptëkoty tu'ukyë mëpaat tmëët'aty ja tyo'oxytyëjk ets tyukjatëp wi'ix ja y'u'unk y'ëna'k t'ënä'ämëtyën ma ja jyëën tyëjkën.

¹³Jä'ä ko ja mëpëjkpëtëjk mëti'ipë tuunk mëëtëtyën jap tsajptëkoty, wintsë'ëkë mëpaat ja tyuunk tyajtu'uye'eytyë, mëj'äämpy ets wa'ats yajpaaty ma tyuntën, jëtu'un jotkujk yajpaatëty ko të tmëpëktë ja Kristë Jesús.

¹⁴Tsojk nëjkx njaku'ixëja'any. Tyam ntuknijayë ya'atë noky,

¹⁵ets pën poxpës, mnijawëp wi'ix mëpaat ja ja'ay jyä'äy'äty mëti'ipë yajpatpën ma ja Tios ja jyëën tyëjkën, ma nyiye'eypyätën ja mëpëjkpëtëjkëty mëti'ipë ja juuky Tios y'ëwtajtëpën, mëti'ipë myëët'ajtypyën ets kyuwäänpyën ja tëyajtën.

¹⁶Tëy jëtu'un ko ja tëyajtën mëti'ipë të nyikëxë'ëkyën ko të nmëpëjkëm ja Tios jä'ä ja mëjwiinpë këjääpë: Kristë ojts nyäyajnikëxe'ekyë tä ja'ayën, ojts myëtä'äky jëtu'un tä ja Kënu'kxymyëk'ajtënën ets ojts ja anklëstëjk y'ixyë. Ojts yajnimëtyä'äky ma ja naax kajpnën, yajmëpëjk naaxwiiny ets yaj'ëxajëy mëët ja mëj'ajt oyajtën.