Read Biblia Mixe de Quetzaltepec 1 Timoteo 6 Bible Online

1 Timoteo 6 - Biblia Mixe de Quetzaltepec bible

1 Timoteo 6

¹Yë mëtuunpëtëjkëty mëti'ipë nitookyën, myëmay myëtajtëp ko ja wyintsënëty patëtëp ets yawintsë'ëkëtëty, këtiipë tëkatsy ja Tios ja xyëëw yajnimëtya'akëty ets näjyëtu'un mëti'ipë ëëts n'ijxpëjkëmën.

²Pën jää pën twintsën'aty ja mëpëjkpë, ni'ikyë mëpaat twintsë'ëkëtë ko myëpëky. Ni'ikyë mëpaat oy tmëtuntë, jä'ä ko ja mëti'ipë myëtuuntëpën mëpëjkpë jä'ä ets jëëky mëku'uk ja nyäxy. Tuk'ijxpëk ets kajpxwa'kx ya'atë.

³Pën jam pën tyaj'ijxpëky ja wiink ijxpëjkën ets ka'ap tyu'knaxë mëët ja Wintsën Jesukristë ja y'ijxpëjkën ets mëti'ipë ëëtsajtëm nmëpëjkëmën,

⁴jëtu'unpë ja ja'ayë je'eyë nëkoo nyämyëjjawëty ets ka'ap tii tnijawë. Ko nmëëtmëtyakmëty jëtu'un nyäjyawëty tä jeexyë pya'ampetyën ets myëtsiptsoony, y'ëxëëk'ixy, y'ojy yä'äxy ets ka'ap tjëkyepy wi'ix yaj'oyjyawëty,

⁵je'eyë nyätsyiik nyäkyoxëtë jä'ä ko ëxëëk ja jyot wyinma'anyëty ets ka'ap nijawëtë ja tëyajtën, paaty myëpëktë ko nyäyajkumeenytya'aka'anëtë.

⁶Tëy ko mëj oyajtën yajpatp ko nmëpëjkmëty, je'eyëp ko, ënät ko ntukjotkujk'ajtmëty yi'iyë mëti'ipë nmëët'ajtëmën.

⁷Ko ojts nmëxu'unk'ajtëm yaa naaxwiiny, ka'ap ojts tii nmëmi'in nmëja'ajtëm; ko n'o'kmëty nän ka'ap tii nmënëjkxa'anëmë,

⁸pën nmëët'ajtëm ja ka'ayën ukën ets ja wit xox, jotkujk ëëts nnäyjya'awëmëty.

⁹E mëti'ipë wit meeny je'eyë y'ixk'ajtypyën, jëtu'un kyuka'ajëtë ëxëëktum ijxtëm tii jëyujk kyukääkën ma y'o'ktaknën, ets ëxëëk jyäty kyëpety ko t'atsoky winë, ja atsojkën yë'ë ja'ay ëxëëk yajjajtyp yajkëpejtyp.

¹⁰Yë meeny atsojkën ëxëëk ja'ay tyajjaty tyajkëpety;; tää ja'ay tëëpë ja myëpëjkën t'ëxmajtsnën ets o'ktëy të nyätyunyë.

¹¹E mijts Timoteo, Tios yë y'u'unk, mkukä'äkëp yë jëtu'unpë. Mëtëy mjuuky'atëty, mpa'ëyowëp, mëpëkëp, mmëët'atëp yë tsojkën ja'awën, mëk myajpaatëty ma ja ëyo'onën ets yu'unk naxym winë'aaw winëjot.

¹²Nitsiptun ja mëpëjkën, këtii xy'ëxmatsëty ja juukyajtën xëmëkyëjxmëpë; jä'ä ko paaty ja Tios të mwoowtsoyë ets xynyikajpxëty ja mmëpëjkën ma ja mayjyä'äyën.

¹³Ja Tios, mëti'ipë myoopyën ja juukyajtën oy tyimtiijëty jam Jesukristë wyintum, mëti'ipë ojts näjyëtu'un nikäjpxyën jam ma ja Poncio Pilato, mijts yam ntuknipëjkpy

¹⁴ets xytyunëty ja tuunk mëti'ipë ntuk'ëne'empyën, ets oy ets wa'ats mjuuky'atëty ijxtëm ka'ap tjëkyäpëtyën wi'ix pën mpoky'ixëtëty, koonëm ja Wintsën Jesukristë myinëty.

¹⁵Jëtu'un jyatëty ko ja xëëw jëmëjt tpaatëty mëti'ipë ja Tios të tuknipëjktaakën. Kënu'kxy yë'ë, yë'ë tu'ukyë yajkutujkp, ma ja yajkutujkpëtëjkën ets mëti'ipë nyiwintsën'ajtypyën ja wintsëntëjk.

¹⁶Yë'ë tu'kpajk ka'ap ja o'kën të myëmëtä'äkyë mëti'ipë juukyajtpën të'kxëntyuuy ets ka'ap tjëkyepy pën myëwinkonëtëty. Ni pën të kya'ixyë ets ka'ap tjëkyepy pën y'ixëtëty. Yë'ë xëmëkyëjxm jyä'ä'ajtyp ja mëj'ajt oyajtën ets ja kutujkën. Oy jyëtu'un'atëty.

¹⁷Pën yaa kumeeny'ajtëpën naaxwiiny, t'ënëëmë ets ka'ap yë'ë nyätyukyajmëjnaxëtëty ets ka'ap yë'ë tuk'ijxpätëty,; jä'ä ko yë kumeenyajtën këjxp najxp yë'ë. Wä'än ja Tios yë'ë tuk'ijxpätë, jä'ä ko yë'ë yajktääpy oy tyimtiijëty ets akëtä'äky jotkëtä'äky nwë'ëmëty.

¹⁸Tuk'ënä'äm, wä'än tuntë ja oypyë, wä'än tjotkujkta'aktë ko tuntëty ja oypyë tuunk, pyutëkëtëp mëti'ipë tii ka'ijtxëtëp.

¹⁹Ko jëtu'un tuntëty, pyaatëp ja kuma'ayën mëti'ipë miimp wiinkoonpën ets pyaatantëp ja mëtëypyë ja juukyajtën.

²⁰Timoteo, këwent'at mëti'ipë të myajktuknipëkyën. Këtii xymyëtoow'itëty ko ja'ay oy wi'ix myëtya'aktëty mëti'ipë ka'ap maa tyunyën, mëti'ipëty ënantëpën ko tnijawëtë ja tëyajtën.

²¹Pën tääpë jëtu'unpë tuk'ijxpëjktëp, tëë tyu'utëkoytyë jä'äkyëjxm ko ja mëpëjkën të t'ëxmatstë. Wä'än ja Tios mkënu'kxëtë.