Read Biblia Mixe de Quetzaltepec 2 Timoteo 1 Bible Online

2 Timoteo 1 - Biblia Mixe de Quetzaltepec bible

2 Timoteo 1

¹Ëjts Pablo, Jesukristë y'ayuk kajpxwa'kxpë mëët ko Tios jëtu'un të tuknipëjktaakë, mëti'ipës të xykexyën ets nkajpxwa'kxëtyës ja juukyajtën tëëpë twinwanën ko tu'ukyë n'ijtëm mëët ja Jesukristë.

²Tyam ya'atë noky ntuknijayë mijts u'unk maay Timoteo. Wä'än ja Tios Teety ets ja Wintsën Jesukristë mmo'oyë ja kënu'kxën, pa'ëyo'owën ets ja jotkujk'ajtën.

³Xëëny kootsës yë Tios nmëkäjpxy ko mijts nja'amyetsy, etsës nkukajpxë ja Tios, mëti'ipës nmëtuumpyën wa'ats wiin wa'ats jot, näjyëtu'un ijxtëm tmëtuuntën ja n'aptëjkës.

⁴Nja'amyejtsypës xëmë ja mjë'ëyën myaxën, njaa'ixäämpy etsës jeexyë njotkujkë.

⁵Jä'ä ko nja'amyejtsypës wi'ix mijts ja mëpëjkën xymyëët'atyën. Ja mëpëjkën mëti'ipë ja mtaak mëjja'ay Loida myëët'ajtën ets ja mtaak Eunice, ets nija'apës ko mijts nän yë'ë jëtu'unpë ja mëpëjkën mëët'ajtyp.

⁶Paaty yam ntuknipëky ets ja mtuunk xyajmëjëty mëti'ipë ja Tios të mmo'oyën ko ojts nkë'ënixajy.

⁷Tios ka'ap yë'ëjëty të xymyo'oyëm ja jot ja'awën mëti'ipë yajtsë'këpën, yë'ë të xymyo'oyëmë ja kënu'kxymyëk'ajtën mëti'ipë myëët'ajtypyën ja mëk'ajtën, nätsyok näjyawë ets wijy'ajt kujk'ajtën.

⁸Këtii mtsëtyunëty ko ja Jesukristë xynyikajpx xynyimëtya'akëty ets ëjts nän këtiis xytyuktsëtyunëty koos yap tsumy nku'itë ja Wintsën. Nikë yë'ë mmëmay mmëtaj ja mëk'ajtën mëti'ipë ja Tios mmooyëpën ets xymyëmëta'akëty ja ëyo'on jotmay mëti'ipë mpatypyën mëët ko ja oy'aaw oy'ayuk të xypyääty.

⁹Tios të xyajtsokëm ets të xywoowtso'owëm tääts npatmëty ja juukyajtën wa'atspë, ka'ap yë'ëkyëjxmëty ko tii oy ntu'unëm, yë'ë ko jëtu'un tëëyëp tuknipëjktaakë mëët ja Kristë Jesús.

¹⁰Tëë ja Tios tyam tyaj'ixyë mëjwiin këjää ja tsyojkën ko të myiny ja Jesukristë Yajknitsokpë, mëti'ipë myëmëtakën ja o'kën ja kyutujkën, ets të tyajnikëxë'ëky ja juukyajtën xëmëkyëjxmëpë.

¹¹Tios të xytyuknipëkyës ets ya'atë y'aaw y'ayuk nkajpxwa'kxëtyës, tëëjës xykyexy ayukkajpxwa'kxpë ets nyaj'ijxpëkëtyës ja ja'ay.

¹²Paatyës tyam nku'ëyowë ya'atë. Je'eyëp ko ka'apës ntuktsëtyuny, jä'ä ko nnija'apës koos yë'ë ntuk'ijxpety; ets nnija'apës ko yë'ë myëët'ajtyp ja mëk'ajtën es tpëjkë'ëkëty ja kuma'ayën jekpyaat mëti'ipës të xytyukwinwanën.

¹³Yajtu'uye'ey ya'atë mëtëypyë ijxpëjkën mëti'ipë të xy'ëxajën ma ëjtsën, ets juuky'at ma ja mëpëjkënën mëët ja nätsyok näjyawë mëti'ipë nmëët'ajtëmën ko mëët ja Kristë Jesús tu'ukyë n'ijtëmë.

¹⁴Mëët ja Kënu'kxymyëkajtën ja pyutëjkën mëti'ipë ijtpën ma ëëtsajtëmën, këwent'at ja oypyë ijxpëjkën mëti'ipë të myajtuknipëkyën.

¹⁵Tëë xynyijawë ko tëëjës xynyikäkta'atë ja Asia ja'ayëty, ja Figelo ets ja Hermógenes.

¹⁶Wä'än ja Tios tpa'ëyoy ja Onesíforo ja y'u'unk y'ëna'k, y'u'unk tyo'oxytyëjk, jä'ä ko kanaak okës të xynyiminy ets të xyajjotkujktä'äkyës ets yë'ë ka'apës të xytyuktsëtyuny oyës yap tsumy n'ity.

¹⁷Yë'ë ko jyä'äjty Roma ënetyës ojts xy'ixta'ay ets ni kyapo'kxy koonëmës xypyäty.

¹⁸Tios pa'ëyowëtëp ko myinëty ja Jesús. Mijts wa'ats xynyijawë wi'ix ojts xypyutëjkëmën jam Éfeso.