Read Biblia Mixe de Quetzaltepec 2 Timoteo 3 Bible Online

2 Timoteo 3 - Biblia Mixe de Quetzaltepec bible

2 Timoteo 3

¹Timoteo, mnijawëp näjyëtu'un ko tpatnëty ja tiempo ma ja Wintsën Jesukristë myina'anyën, tsip jää nëjkx y'ijnë ja xëëw jëmëjt.

²Yi'iyë nëjkx ja'ay tmëmaay tmëët'ajnë yë kyë'ëm juukyajtën, wit meen, mëj këjxm, pyatëp nyaxtëp ja Tios, ka'ap ja tyaak tyeety t'ëktmëmëtoownëtëty; nitii nëjkx tka'ëktukjotkëtaknëtë, ka'ap twintsë'ëkëja'antë ja Tios ja y'ijxpëjkën.

³Ka'ap nëjkx t'ëkmëët'ajnëtë ja pa'ëyo'owën, je'eyë pyi'tskajpxanëtë, ka'ap nëjkx tkumä'kxëtë ja y'ëxëëk winma'anyëty, ëxëëk ja'ay y'ita'antë ets myëtsip'atantëp tu'kë'ëyë ja oypyë.

⁴Kyë'ëyakantëp ja myëku'ukëty, tyimtuna'antëp winë ijxtëm ja jyot wyinma'anyëtyën, jëtu'un winë tuna'antë ijxtëm tsojkën'atën ets ka'ap ja Tios t'ixta'aja'antë.

⁵Jëtu'un nyäpyëjkta'aka'anëtë ijxtëm jeexyë myëpëktën, je'eyëp ko ma winë tuntën aakjä'ä ma'atpë ets tëkatsypë. Këtii jëtu'unpë ja'ay xykyutëkëtëty. Janty mëpëjkpë ja'ay nyäyajnaxa'anëtëty, jëtu'unpë ja'ay këtii xymyëjwa'kpätëty.

⁶Jëtu'umpë ja'ayëty, yë'ë tëjktëjkëtyëp muum ets twin'ëëntë ja to'oxytyëjk mëti'ipë pokyjotm ijtëpën, ets ja ëxëëkpë tuntë tkajpxtë mëët,

⁷xëmë yaj'ixtë y'ijxpëktë, je'eyëp ko ka'ap tja'akyukëtë wi'ix ja Tios ja tyiyajtën jya'ëna'anyën.

⁸Ets jëtu'un ijxtëm ja Janes ets Jambrés tmëtsippëjktën ja Moisés, näjyëtu'un tääpë ja'ayëty tmëtsippëktë ja tëyajtën. Ma'at yë wyinma'anyëty ets tëë ja myëpëjkën tyajtëkooynyëtë.

⁹Je'eyëp ko ka'ap yë jyä'ä myëjtëkëja'antë, jä'ä ko nyijawëjantëp yë ja'ay ko tsuu ets kunëpap yë'ëjëty, näjyëtu'un ijxtëm jyaajtën ja nimäjtskpë ja ja'ayëty mëti'ipë myëtsippëjktën ja Moisés.

¹⁰Mijts tëë oy xypyanëjkxy yë n'ijxpëjkënës, wi'ixës njuuky'ätyën, tiis ntunäämpyën, wi'ixës nmëpekyën, wi'ixës nmä'kxtukyën, wi'ixës ja ja'ay ntsoky njawën ets wi'ixës nmëët'atyën ja mëjaaw etsës nmëtänë ja ëyo'on jotmay,

¹¹tëë näjyëtu'un m'ëyoy maajës nyaj'ixjëtity nyajpajëtityën ets maajës ëxëëk njaty nkëpetyën. Mnija'ap wi'ixës njajtyën jam Antioquía, Iconio ets Listra, koos nyajpajëtijtäky. E ja Wintsënës ojts xyajpëtsëmy ëyo'ontum.

¹²Tëyajtën yë'ë ko ni'ëmukë mëti'ipë ja ja'ay juuky'atantëpën oy ma Kristë Jesusën näjyëtu'un yaj'ixjëtita'an yajpajëtita'antë;

¹³E ja ëxëëkja'aytyëjkëty ets ja win'ë'ëmpëtëjkëty ni'ikyë y'o'ktëwa'antë, win'ëënantëp ni'ikyë ets näjyëtu'un yajwin'ëëna'antë.

¹⁴Mijts mëk ja mwinma'any xymyëët'atëty ma ja mëti'ipë të xyjyätyën ets xymyëpëkyën. Mnija'ap pën të myaj'ijxpëkyën.

¹⁵Ja'amyäts ko mutsknëm të xynyijawë ja Tios ja y'aaw y'ayuk mëti'ipë të myajwijy të myajkejyën, mëti'ipë mtu'uwinwowanëpën ets xypaatëty ja nitsokën ko ja Kristë Jesús të xymyëpëky.

¹⁶Tu'kë'ëyë ja Tios ja y'aaw y'ayuk mëti'ipë këxja'ay miinpën aak Tios të tnikajpxta'ay, ets tuunp ma ijxpëjkënën, ma kajpxwijënën, ma tu'uwinye'eyën, ma jëjpwijtswinpijtën ets ma tëyajtënën,

¹⁷jëtu'unts ja Tios ja jyä'äy winma'anymyëët yajpaatëty ets nijawëty wi'ix oypyë tunëtyën.