Read Biblia Mixe de Quetzaltepec Hebreos 1 Bible Online

Hebreos 1 - Biblia Mixe de Quetzaltepec bible

Hebreos 1

¹Tëëyëp, kanaak ok ojts ja Tios tmëkäjpxy ja n'ap'ajt n'ok'ajtëm ets kanaakjëjp ja winma'any tja'ixtaay ko ojts tjayajkäjpxy ja käjpxynyajxpëtëjk.

²Tyam ma kyëxanën ja xëëw jëmëjt, tëë xymyëkajpxëmë mëët ja y'U'unk, mëti'ipë ojts mëët tyajkojyën ja naax tsajp, mëti'ipë të tukumaaytyä'äyën winë.

³Yë'ë kyujäjpy kyutë'kxyp ets yajknikëxë'kpy ja Tios ja myëj'ajt y'oyajtën. Jëtu'un ijxtëm ja Tios Teety, tim näjyëtu'un ja y'u'unk, ja y'u'unk tu'kë'ëyë winë wyijts'ijtääpy mëët ja y'aaw y'ayuk mëk'ajtënmëëtpë. Ko të xyajpokywyatsëmë, tääts të nyaaxweetsy tsajpjotm Tios pyë'aay aka'any'äämpy.

⁴Wäänë mëj ja Tios U'unk të nyäxy këtiinëm ja anklëstëjk, jä'ä ko tëë yajtukumay wäänë mëjpë ja kutujkën këtiinëm ja anklëstëjkëty.

⁵Nijëna'a ja Tios të tkanëëmë nitu'uk ja tsajpjotmëtë kukäjpxy: Mijts n'u'unk'ajtyp, tyamës n'ëna'any ko xytyeety'atëtyës. Ets nijëna'a ja Tios të tkanëëmë nitu'uk ja tsajpjotmëtë kukäjpxy: Ëjts xytyeety'atëp, yë'ëjës n'u'unk'atëp.

⁶Näyjyëtu'un wiinktsow y'ënä'äny ko tkejxy yaa naaxwiiny ja y'u'unk, mëti'ipë ijtpën ijxtëm ja kä'äxkopkën, ko tu'kë'ëyë ja Tios ja y'anklës t'ëwtatëty ja Tios U'unk.

⁷Ets ko ja Tios tnimëtyä'äky ja tsajpjotmëtë kukäjpxy, jëtu'un y'ënäny: Jëtu'un tpëjktä'äky ja y'anklës ijxtëm ja pojën, ja myëtuunpë ijxtëm ja jëënyä'änkën.

⁸E ko ja y'U'unk tnimëtyä'äky, jëtu'un y'ënäny: Mijts Tios, xëmëkyëjxm ja mkutujkën y'ity, myajkutukëp mijts mëët ja tëyajtën.

⁹Ko mijts të xytsyoky ja oypyë ets të xy'ëxëëk'ixy ja ëxëëkpë; paatykyëjxm ja Tios mijts të mwin'ixyë, mëti'ipë mTios'ajtypyën, ets të mmo'oyë wäänëni'ik ja xoontakën këtiinëm ja mmëku'uktëjk.

¹⁰Näyjyëtu'un y'ënäny: Mijts, Wintsën, ka'anëm ënäty tiinëm ko xy'oytyuuny ja naaxwiinyëtë, mijts kë'ëm myajkoj ja tsajp.

¹¹Këxaanp naxaanp tu'kë'ëyë winë, e mijts xëmëkyëjxm m'ity. Jëtu'un tëkokyë jyajta'aja'any ijxtëm ja wit tyukyën;

¹²ets xy'anä'äka'any ijxtëm tu'uk wit yaj'ane'ekyën, ets xyajtëkatsa'any ijxtëm pën nyäjyääntëkatsyën. E mijts, m'ijtp xëmë, nijëna'a ja mjuukyajtën kyakëxa'any.

¹³Tios ka'ap ojts nitu'uk t'ënëëmë ja tsajpjotmëtë kukäjpxy: Yaa u'unyë n'aka'any'äämpyës koonëm ja mmëtsip nmëmëta'akëtyës, ets npëjkta'akëtyës maas yë nteky'ixpo'kxën.

¹⁴Jä'ä ko ja tsajpjotmëtë kukäjpxy aak poj yë'ëjëty mëti'ipë Tios myëtuuntëpën ets yë'ë yajkäjxtëp ets nëjkx tputëkëtë mëti'ipë ja nitsokën të yajtukumaytyën.