Read Biblia Mixe de Quetzaltepec Hebreos 11 Bible Online

Hebreos 11 - Biblia Mixe de Quetzaltepec bible

Hebreos 11

¹Yë'ë mëpëjkën'ajtp ko njëjp'ijxmëty mëti'ipë tunan jatanëpën ijxtëm yajjëjp'ixyën ets ko tu'ukyë nmëpëjkmëty mëti'ipë ka'ap n'ijxëmën.

²Ja nteety'ajt n'ap'ajtëmë ojts ja Tios tyukjotkëta'akëtë ko myëpëjktë.

³Mëpëjkën ojts mëët nnija'awëmë ko ja Tios ojts tyajkojy ja naaxwiinyëtë mëët ja y'aaw y'ayuk, paaty mëti'ipë tyam n'ijxëmën, ka'ap ijty tëëyëp yaj'ixy ma ka'ap kyojynyëmën.

⁴Mëpëjkën mëët ja Abel ojts tmo'oy ja Tios tu'uk ja wintsë'kën mëti'ipë ni'ik tsoowpatën këtiinëm ja Caín ja jyä'ä, paaty ja Tios ojts tyijyë wa'ats ja'ay ets ojts kyupëjkxëty ja wyintsë'kën. Oy ja Abel të jya'o'knë, jëtu'un jä'ä ijxtëm jeexyë kyäjpxyën, jä'ä ko ojts myëpëky.

⁵Mëët ko myëpëjky ja Henoc ojts yajmënëjkxy juuky këtiipë y'ookëty, kä'äp ojts maa y'ëkyajpat y'ëkyajk'ijxnë, jä'ä ko tëë ënäty ja Tios myënëjkxyë. Jëtu'un y'ënä'äny ja Tios ja y'aaw y'ayuk ko ja Henoc tyuun mëti'ipë Tios tyukjotkëtäkpyën ka'anëm ënäty yajmënëjkxynyëm.

⁶Ka'ap tjëkyepy oy nmëtu'unmëty yë Tios pën ka'ap ja mëpëjkën yajmëëtëty. Ko nmëwinkona'anmëty ja Tios, kopkpëky ko nmëpëjkmëty ko Tios jyääty ets ko tkumay mëti'ipë ixtaayëpën.

⁷Noé ojts myëpëky, paaty ojts ja kepy nëëwinye'epyë tyajkojy ko ja Tios y'ënëmaayë ko ja ëyo'on y'ita'any ets jëtu'un ja y'u'unk y'ëna'k, y'u'unk tyo'oxytyëjk tyajtsoky. Ya'atë jëtu'unpë mëpëjkën yë'ë ojts ja Noé tuk'ixy ja naax kajpn paaty ojts yajtukumay ja tëyajtën mëti'ipë yajpatpën mëët ja mëpëjkën.

⁸Mëët ko myëpëjky ja Abraham paaty ojts ja Tios tmëmëtoy ko y'ënëmaayë ets pyëtsëmëty ma ja nyaax kyajpnën, ënät tsyo'ony ets ojts nyijkx ma ja Tios ënäty ja naax tyukumayä'änyën. Ko tsyo'ony ma ja nyaax kyajpnën, ni tkanijawë maa ënäty nyijkx.

⁹Mëët ko myëpëjky jëtu'un tsyënaay tä jaaypyaat jaaypyo'kxyën wiink naax wiink kajpn, ma ja Tios ënäty të tyukwinwanëtyën. Yë'ë tyuktsënaay yë wit tëjk, ujts tëjk, näjyëtu'un ja Isaac ets ja Jacob mëti'ipë y'ëxajëtyën ja waantakën.

¹⁰Jä'ä ko ja Abraham jyëjp'ijxyp ënäty ets tääpë kajpn ta'tspëky yajpaatëty, ma ja Tios yë'ë yajpaatyën ijxtëm tu'uk ja tëjk kojpën.

¹¹Abraham myëpëjk ja Tios. Paaty ja Sara ja u'unk maay tyajmiiny naaxwiiny, oy ënäty të jyamëjja'ayënëtë nimäjtsk. Abraham ojts myëjaawpëky ets teety nyaxëty, jä'ä ko tmëpëjky ëmuumtu'ukjot ko Tios kyuuytyuunpy mëti'ipë të twinwanën.

¹²Jëtu'un ja Abraham, oy ënäty të myëjja'ayënë, ojts ja y'u'unk y'ok tpaaty ets nimay tä maymyëtsa'a kyëxë'ëkyën jam tsajpwinm, tä jinën mejypyë'am, ka'apë tjëkyepyën wi'ix nmëtsyo'owmëtyën.

¹³Tëkokyë ya'atë ja'ayëty ojts y'o'kta'atë ets kä'äpyëm t'ëxajëtyë mëti'ipë ja Tios ënäty të tyukwinwanëtën; je'eyëp ko mëët ko myëpëjktë ojts jëkämpaat myäytyë tyajtë ets jotkujk nyäjya'awëtë jä'ä ko jëtu'un yaa najxëmë naaxwiiny jaaypyaat jaaypyo'kxyën.

¹⁴Mëti'ipë jëtu'un ënantëpën ko jyääypyo'kxyjyä'äy'atë, jëtu'un yajmëtoowkujkëy ko tsyënaaytyakn t'ixta'atë.

¹⁵Ko jeexyë yë'ë tmëmaay tmëtajtë ja nyaax kyajpnëty ma ënäty të tsyoontën, tsojk jeexyë jatëkok nän jam wyimpijtë.

¹⁶E yë'ëty, yë'ë tsyojktë ja it wäänë oypyë, mëti'ipë tsajpjotmën, paaty ja Tios ka'ap tuktsëtyuny ko Tios'atëtë, jëtu'unts tnipëjktaakë tu'uk ja mëj kajpn.

¹⁷Ja Abraham, ko ja Tios wyinma'any'ixanë, mëët ko myëpëjky, yajk ja y'u'unk Isaac ets wyintsë'kën'atëty. Oy ënäty jyajä'äjëty mëti'ipë ja Tios ojts tyukwinwanëtyën ko y'ënëmaayë:

¹⁸Isaac nëjkx mtuk'ixyë ja m'u'unk m'ok.

¹⁹Paaty ja Abraham jëtu'un tuuny ko ojts myäy tyäjy ko Tios myëët'ajtyp yë mëk'ajtën ets o'kpë paat tyajuukpyëkëty, paaty ja Abraham ja y'u'unk jatëkok t'ëxajëy ets ojts yë'ë wyi'imy ijxpät.

²⁰Mëët ko myëpëjky ja Isaac, ojts ja y'u'unk Jacob ets Esaú tukwinwanë ja kënu'kxën.

²¹Ko ja Jacob ënäty y'ookanë, mëët ko myëpëjky ojts tukwinwanën ja näkyënu'kxën ja José ja y'u'unk y'ëna'k ets ja Tios tmëjja'aw tjaantyja'awëy je'eyë nyäkyëxmëtakë ma tyäjkyën.

²²Ko José ënäty y'ookanë, mëët ko myëpëjky ojts jyaak'ëna'any, ko ja Israel ja'ay pyëtsëma'antë ok jap Egiptë y'itjotm ets ojts tyajwë'ëmy ja ayuk ets ja wyääy pyajk jap yajmëtsoonëty.

²³Mëët ja mëpëjkën, ko ja Moisés myëxu'unk'ajty, ojts ja tyaak tyeety yu'utsyë tëkëëk po'o; kä'äp tsë'këtyë oy ënäty ja yajkutujkpë të tjani'ënä'ämë ets ja mëxu'unktëjk y'o'kta'atëty mëti'ipë ye'etyëjkën.

²⁴Ko ja Moisés ojts y'apäjnë, mëët ko myëpëjky ka'ap tkupëjky ets yajtijëty ko yajkutujkpë nyëëx y'u'unk'atyë,

²⁵wäänëni'ik ojts t'atsoky ets yajtëytyunëty mëët ja Tios ja jyä'äy këtiinëm ko jeexyë pokyjotm xyoontä'äky, mëti'ipë tsojkyë najxpën.

²⁶Paaty tyimwinmaay nikë oy ko ja Yajnitsokpë tku'ëyowëty ets këtii ko tukjotkujk'atëty ja mëj'ajtën jaanty'ajtën mëti'ipë japën Egiptë, jä'ä ko ja wyinma'any ojts tpëjktä'äky ma ja kuma'ayënën mëti'ipë ja Tios yakäämpyën.

²⁷Mëët ko myëpëjky ja Moisés ojts tsyoony jap Egiptë, ka'ap tsyë'këy, oy ja yajkutujkpë jya'ekyë, tu'ukyë ja jyot wyinma'any tpëjktäky ijxtëm jeexyë tim'ixyën ja Tios, mëti'ipë ka'ap yaj'ixyën.

²⁸Mëët ko myëpëjky ja Moisés tyuun ja ëmaayxyëëw ko t'ënëmaay ja Israel ja'ayëty ets ja ne'pyny nëjkx tuknikoytyë ja tyëjk aaw ets ja yajja'ay'o'kpë mëti'ipë Tios kyäjxën ka'ap tyaj'ooktëty ja kä'äxkopk mëti'ipë Israel ja'ayëtyën.

²⁹Mëët ko myëpëjktë ja Israel ja'ayëty, tyuknajxtë ja Tsaptsmejy të'ëts naaxkëjxy. Ko ja Egiptë ja'ayëty näjyëtu'un jyanaxantë, ojts nyëëji'kxta'atë.

³⁰Mëët ko myëpëjktë, ojts ja Jericó kajpn napotsypë kyëtäy ko ja Israel ja'ayëty wëxtujk xëëw ja kajpn tna'ëwtijtë.

³¹Ets ko myëpëjky ja ku'into'oxy Rahab ka'ap ojts y'ooky mëët mëti'ipë ja Tios kyamëmëtoowtëpën, jä'ä ko tëë ënäty oy tsuj tyajjajtä'äky mëti'ipë ja Israel ja'ay kyäjxtën ijxpë tuunpë.

³²¿Tiis njaakmëtya'akëp? Ka'ap ja tiempo nëkoo y'ëkyajmëët'ajnë ets jeexyë njaaknimëtyä'äkyës ja Gedeón, ja Barac, ja Sansón, ja Jefté, ja David, ja Samuel ets ja Tios ja kyäjpxynyajxpëtëjk.

³³Mëët ko myëpëjktë ojts tmëmëta'aktë ja myëtsip wiink kajpnëpë, ojts oy nyipaye'eytyë ijxtëm pyaat'atyën, ko të tpaatë mëti'ipë ja Tios ënäty të tyukwinwanëtën, ko ja kaa të tyajmujkëtë ja y'aaw,

³⁴ko të tyajpi'itstë ja mëj jëën, ko të kyä'äktë ma yajpuxa'an yajpoota'antë, ko të jyotmëkpëktë oy ënäty tsyë'ëkëtë ets ko të tmëmëta'aktë ja myëtsip mëti'ipë wiink it tso'ontëpën.

³⁵Ojts y'itë ja to'oxytyëjkëty mëti'ipë jyiiky myëku'uk juuky pyatën mëti'ipë ënäty të y'ooky'itën. Wiinkëtypë ojts y'ooktë ëyo'onjëjp'am, ets ka'ap tkupëjktë ets y'ëwaatsëpëtsëmtëty, jä'ä ko yë'ë tsyojktëp ets jatëkok jyuukpyëktëty ma wäänë oypyë juukyajtënën.

³⁶Ojts wiinkpë yajnëxi'ik yajtukxi'iktë ets yajwojp yajka'tstë, wiinkëtypë pujxntejpxy yajtuktsuumtë ets pujxn tëkoty yajpëjktaktë.

³⁷Wiinkpë ojts y'ooktë kuka'atsy ets ojts yajjë'ëtwa'ktë kujkm, ëkë kupuxy mëët ja mëtyäät. Tam mëti'ipë ja wyit xyox kakaajtën, tsajppax ak kupixyny jyaak wit'ajtëp ets yaj'ëyow yaj'ama'at jyëtijtë wyimpäjtë jyëjptaktë.

³⁸Ka'ap jëtu'un jyapaat'ajtëtë ets ja ja'ay ëxëëk tyunëtëty. Jëtu'unyë kyuye'ey kyunajxëtyë të'ëts'itjotm, käätsjotm ets aankjoty tsaajoty jyuuky'ajtë.

³⁹E yë'ëjëty, nitu'uk ojts tka'ëxajëtë mëti'ipë ënäty ja Tios të twinwanën. Oy ojts oy jyamëpëktë,

⁴⁰jä'ä ko ja Tios nän tam ënäty ëëtsajtëm xyjyot'ajtëmë, jawäänë oypyë ënäty të tuknipëjktaakë ëts mëët tu'ukyë yë'ëjëty npatmëty ja oyajtën ets ja wa'atsajtën.