Read Biblia Mixe de Quetzaltepec Hebreos 2 Bible Online

Hebreos 2 - Biblia Mixe de Quetzaltepec bible

Hebreos 2

¹Paatykyëjxm wäänëni'ik nmëjpëjktakmëty mëti'ipë të nmëto'owëmën ets ka'ap n'ëxmajtsmëty mëti'ipë të nmëpëjkëmën.

²Ja ënä'ämën mëti'ipë ja Tios tëëyëp yajkën mëët ja y'anklës, myëët'ajtyp ijty ja mëk'ajtën ets yajpatunëty; mëti'ipë pokytyuuntën ets ka'ap tpatuuntë, ojts yajtsaatsytyuntë ijxtëm pyaat'atyën.

³¿Paaty wi'ix ëëtsajtëm nkuukäkmëty ja tëytyu'unën pën ka'ap nmëjpëjktakëm ja mëj nitsokën? Wintsën ojts kë'ëm tnikäjpxy jëwyiin ya'atë nitsokën; ets mëti'ipë ojts tmëtoow'itën, yë'ë të tnikajpxtë ma ëëtsajtëmën.

⁴Näyjyëtu'un ja Tios ojts tnikäjpxy mëët ja ijxpäjtën, mëj'ajtën ets kanaakpëky ja y'oyajtën, mëët ja Kënu'kxymyëkajtën, mëti'ipë kanaakjëjp të nyajmo'oyëmën ijxtëm yë'ë të tuknipëjktaakën.

⁵Ka'ap ja Tios të tmo'oy ja anklëstëjk ja mëk'ajtën ets y'ënä'ämtëty ma ja xëëw jëmëjtën mëti'ipë wiinkoonpën, mëti'ipë tyam nikajpx nimëtyakëmën.

⁶E tap tu'kpëky jaaypyety myiny ma tu'uk ja ja'ay y'ënä'änyën: ¿Pën yë naaxwiinyëtë ja'ay ko xyjyä'äymyetsy ets tim pën yë'ënë ko mjotmaytyunyë?

⁷Tëë tu'ktiempë naxym xypyëjktä'äky këtiinëm ja anklëstëjk, je'eyëp ko tëë xymyo'oy ja kutujkën, ja mëj'ajt oyajtën ets ja wintsë'kën;

⁸mijts të xypyëjktakta'ay jam winë ma tyekpya'tkën. E ko të xypyëjktakta'ay winë ma tyekpya'tkën, ka'ap ja Tios tii të tyajwë'ëmy ëpëky mëti'ipë yë'ë ka'ap tnijawën. E kajts n'ijxëmnëm ko aakjam yajpata'ay winë ma yë'ëjën.

⁹E Tios të xytyuk'ijxëm ja Jesús, mëti'ipë ja Tios tu'kxëëw tu'kjëmëjt pyëjktakën naxym këtiinëm ja anklëstëjk, tëë yajmo'oy ja kutujkën ets ja mëj'ajt oyajtën, mëët ko tmënajxy tyajnajxy ja o'kën. Tios mëët ja tsyojkën jya'awën yë'ë ojts tuknipëjktaakë ets ja o'kën tpaatëty ets tuk'oy'atëty ja mayjyä'äy.

¹⁰Tu'kë'ëyë mëti'ipë jää'ajtpën aak Tios jyä'ä'ajtääpy ets yaj'ijtääpy, jä'ä ko tsyojkpy ets ja y'u'unk y'ëna'k näjyëtu'un tpaatëty ja myëj'ajtën y'oyajtën; Tios ojts tyaj'awinpity ja Jesukristë wa'ats ko y'ëyooy, mëti'ipë të yajnitso'okëtën.

¹¹Ja mëti'ipë yajkënu'kxtën ets mëti'ipë kënu'kxpën, tu'ukyë ja Tyeetyëty, ja Tios Teety. Paaty ja Tios U'unk ka'ap tuktsëtyuny ets xytyijmëty mëkä'äx.

¹²Ijxtëm y'ënä'änyën ja Tios ja y'aaw y'ayuk këxja'aypyë myinyën: Mijts nnikajpxäämpy nimëtya'akäämpy maas ja nmëku'uktëjkën, jëtu'un nmëjjawëja'any njaantyjyawëja'any koos n'ëwëty ma ja mëpëjkpëtëjk ye'eymyuktën.

¹³Ets näjyëtu'un y'ënä'äny: Tiosës ntuk'ijxpätäämpy, näjyëtu'un y'ënä'äny: Tyamës ja u'unk ëna'k mëët nyajpaaty mëti'ipës ja Tios të xymye'eyën.

¹⁴Jëtu'un ijxtëm ja ja'ay tu'kjëëky tu'kmëku'ukpë ja jot ne'pyny tmëët'atën, jëtu'un ja Jesús y'ijty mëët ja Tios ets mëët ja o'kën tmëmëtaktaay ja ëxëëkpë, mëti'ipë ijty o'kën tëko'oyën myëët'ajtypyën.

¹⁵Jëtu'un nyitso'oktëty ni'ëmukë mëti'ipë o'kënjëjp'am ijtëpën, mëti'ipë juuky'ajtëpën ijxtëm ja mëtuunpë nitookpyën.

¹⁶Tëyajtën ka'ap yë'ëjëty ja Wintsën Jesukristë tnimiiny ets tputëkëty ja anklëstëjk, yë'ë nyimiin mëti'ipë ja Abraham y'u'unk'ajtyp y'ok'ajtypyën.

¹⁷Paatykyëjxm näjyëtu'un kopkpëky yajpëjktäky ijxtëm ja myëku'uktëjkën ets jam Tios wyintuuy y'itëty teety wintsën oypyë ets pa'ëyoopë ets ja Tios ja ja'ay tpokmyä'kxëty mëët ja wintsë'kën.

¹⁸Mëët yë'ë ko ja Jesús y'ëyoow ets yajwinma'any'ijxy ets jeexyë pyokytyuny, tyam jyëkyejpy tputëkëty mëti'ipë ja mëjku'u yajkpokytyunanëpën.