Read Biblia Mixe de Quetzaltepec Hebreos 3 Bible Online

Hebreos 3 - Biblia Mixe de Quetzaltepec bible

Hebreos 3

¹Paaty mëku'uktëjkëty, ninu'un ja Tios mja'ay'atëtën, tëëpë yajyaxtsowtën, pëjkta'aktë mjootjoty mwinma'anyjyotyëty ja Kristë Jesús, ja ayukkajpxwa'kxpë, ja mëj teety wintsën.

²Jä'ä ko ja Jesús kyuuytyuun ja tuunk mëti'ipë ja Tios tuknipëjkën, näjyëtu'un ijxtëm ja Moisés tkuuytyuunyën ja tuunk mëti'ipë ja Tios ojts tyuknipëkyën ma ja nyaax kyajpnën.

³Je'eyëp ko ja Jesús wäänëni'ik ja mëj'äämpy të nyäxy këtiinëm ja Moisés, jëtu'un ijxtëm tu'uk ja tëjkojpën wäänëni'ik yajmëjpëjktä'äky këtiinëm ja tëjk.

⁴Tu'kë'ëyë ja jëën tëjk aak ja'ay kyojtääpy; e ja Tios yë'ë yajkojtaay tu'kë'ëyë mëti'ipë jää'ajtpën.

⁵Jëtu'unts ja Moisés y'ijty ijxtëm tu'uk ja tuunpën ma tu'uk ja tëjkën, oy tyuuny ma ja Tios ja kyajpnën ets ojts tnikäjpxy mëti'ipë ja Tios ënäty kyajpxäämpyën.

⁶E ja Kristë, jëtu'un jä'ä ijxtëm tu'uk ja u'unkën, oy tmëtuny ja Tios ma ja jyä'äyën, ëëtsajtëm yaj'antijëm; pën nmëpëjkëm ëmuumtu'ukjot mëti'ipë njëjp'ijxëmën.

⁷Paaty, ijxtëm y'ënä'änyën ja Kënu'kxymyëkajtën: Pën tyam mmëtoow'ijtëp wi'ix ja Tios y'ënä'änyën,

⁸këtii ja mjot mwinma'any juun xypyëjkta'aktë ijxtëm y'ëtëtstën ja m'aptëjkëty ko ja Tios ojts tukjoot'anpëktë jam të'ëts'itjotm ets tjawinma'any'ixantë.

⁹Jam ojts xywyinma'any'ixtës miits ja m'aptëjkëty oy ënäty të tja'ixtë ja ntuunkës wëxtyikxy jëmëjt.

¹⁰Paaty ojts ntukjoot'anpëktës tääpë ja'ayëty, ets n'ënanyës: Xëmë tëkatsy yë jyot winma'any tmëët'atë, ka'ap tkupëktë ja nnë'ë ntu'ujës.

¹¹Paatyës ojts nnikäjpxy koos xyajjoot'anpëjktë: Nijëna'a kyatëkëtëty maas ja npo'kxtaknën.

¹²Mëku'uktëjkëty, näkyëwent'atëtë këtiipë nitu'uk ja mjot mwinma'any xymyëët'atëty ëxëëk, mëti'ipë tuk'ëxmajtspën ja Tios Juukpyë, ko ënäty xykyamëpëktë.

¹³Näjyjyotmëkmo'ojëtë nixim niyam winjëpom naam jaakjäänëm ja xëëw, mëti'ipë nyikäjpxypën ja Tios ja y'aaw y'ayuk, këtiipë pën yajwin'ëënëty ets juun ja y'aaw jyot tpëjkta'akëty.

¹⁴Tëë mëët ja Kristë npatëm ja oyajtën, mëët yi'iyë ko ntukjotkujk'ajtmëty mapaat njuuky'ajtëmën ijxtëm të nyajtso'ontakëmën.

¹⁵Ijxtëm y'ënä'änyën: Pën mmëtoowtëp tyam ja Tios ja y'aaw y'ayuk, këtii ja mjot mwinma'any juun xypyëjkta'aktëty ijxtëm y'ëtëtstën ja m'aptëjkëty ko ja Tios tukjoot'anpëjktë.

¹⁶¿Pën ojts ja Tios tnipëtë'ëktë oy tjamëtoowtë ja y'aaw y'ayuk? Yë'ë mëti'ipë ja Moisés wyoowpëtsëëmën jap Egiptë, ¿këtiijë?

¹⁷¿E pën jëtää ja Tios tyukjoot'anpëjk wëxtyikxy jëmëjt? Yë'ë mëti'ipë pokytyuuntën jam të'ëts'itjotm ets y'o'ktë, ¿këtiijë?

¹⁸¿E pën jëtää ja Tios tyij ko y'ënäny ko nijëna'a kyatëkëtëty ma Tios ja pyo'kxtaknën? Yë'ë mëti'ipë ka'ap myëtoowtën, ¿këtiijë?

¹⁹Jëtu'unts nwinja'awëmëty ko paaty ka'ap tyëjkëtyë jä'ä ko ka'ap myëpëjktë.