Read Biblia Mixe de Quetzaltepec Hebreos 5 Bible Online

Hebreos 5 - Biblia Mixe de Quetzaltepec bible

Hebreos 5

¹Ni'ëmukë teety wintsën, aak ja'ayjoty yajwin'ixtë ets ja naax kajpn tkutänëty Tios wyintum ets tyaktëty ja wintsë'kën ets ayajk ako'onën mëti'ipë ja poky yajtuknikëpäjtutpën.

²Jä'ä ko näjyëtu'un ja teety wintsën pyokyjyä'äy'atë, jyëkyejpy tpa'ëyowëty mëti'ipë kyanija'awëtëpën ets mëti'ipë tëkooytyëpën.

³Jä'äkyëjxm ja wintsë'kën tyäky ko pyokyjä'äyëty ets näjyëtu'un ko ja ja'ay pyokyjyä'äy'atë.

⁴Ni pën kë'ëm kyanäpyëjktä'äkyë ets y'itëty wintsë'ëkë ko ënäty y'ity teety wintsën. Tios wyin'ijxyp pën pyëjkta'akäämpyën teety wintsën, jëtu'un ja Aarón ojts yajwinwitsy.

⁵Tim näjyëtu'un ja Kristë ka'ap ojts kë'ëm nyäpyëjktä'äkyë teety wintsën, ja Tios ojts myo'oyë ja mëj'ajtën jaanty'ajtën ko y'ënëmaayë: Mijts n'u'unk'ajtyp, tyamës n'ëna'any ko mijts n'u'unk'ajtyp.

⁶Ets nän jap jatu'kpëky myiny kuja'ay mëti'ipë ënaanpën: Mijts xëmëkyëjxm mteetywyintsën'ajtp ijxtëm ja Melquisedec y'ijtyën.

⁷Ko Kristë jyuuky'äjty yaa naaxwiiny mëk'äämpy ojts tmënu'kxtä'äky ets tmëjë'ëy tmëyä'äxy ja Tios, pën mëpaat yaj'ëwaatspëtsëmyë ma ja o'kënën, e ja Tios wa'ats ojts myëtoyë jä'ä ko kyäjpxykyupëky.

⁸Oy ja Kristë jya'u'unk'atyë ja Tios, tyukjajt wi'ix myëtowëtyën ko y'ëyooy.

⁹Ets ko ojts tyaj'apaatë ja tyuunk, ënät ojts nyäxy yajnitsokpë xëmëkyëjxm ma ja mëti'ipë mëmëtoowëpën,

¹⁰ets ja Tios pyëjktakë teety wintsën, jëtu'un ijxtëm ja Melquisedec y'ijtyën.

¹¹May ya'atë aaw ayuk kyayajnimëtyä'äkynyëm, je'eyëp ko tsip ets yajkajpxtë'kxëty, jä'ä ko ëtyä'äkyë miits tii xyjyä'äkyukëtë.

¹²Tam kanaak jëmëjt nyëjkxnë ets jeexyë miits ja Tios ja y'aaw y'ayuk xyaj'ijxpëjkëtë. Myaj'ijxpëjknëtëp jeexyë miitsëty, je'eyëp ko yë'ë jatëkok mtsojktëp ets wäänëni'ik mjaaktukyaj'ijxpëktëty mëti'ipë ka'ap tsyipëtyën ma ja Tios ja y'aaw y'ayukën. Jëtu'un miitsëty ijxtëm ja pi'k ëna'kën mëti'ipë tsi'tstëpnëm, ka'apë tjatën wi'ix kyäytyëtyën.

¹³Pën yajpatëp ijxtëm ja pi'k ëna'kën mëti'ipë tsi'tstëpnëm, ka'ap tnijawëtë mëti'ipë oy ëkë mëti'ipë ëxëëkën.

¹⁴E ja mëti'ipë yajpatëpën ijxtëm yë mëjatyjyä'äyën mëti'ipë kaaytyëp uktëpën, yë'ë mëti'ipë të tmëyujtën ets nyija'awëtyëp mëti'ipë oy ka'oyën.