Read Biblia Mixe de Quetzaltepec Hebreos 6 Bible Online

Hebreos 6 - Biblia Mixe de Quetzaltepec bible

Hebreos 6

¹Tsojk nyajtu'uye'eyëm ja Tios ja y'aaw y'ayuk koonëm kä'pxy nnija'awëmëty mëti'ipë ja Tios tsyojkpyën. Ka'ap yi'iyë ntukjotkujk'ajtmëty mëti'ipë të nyajtukni''ijxëmën ko Kristë ojts ëka'any nmëpëjkëmë. Ka'ap jatëkok n'a'ijxpëjkëmëty, wi'ix ja ja'ay jootwinpittëty, wi'ix t'ëxmatstëty ja ëxëëk juukyajtën mëti'ipë tukpatpën ja o'kën, ëkë wi'ix tmëët'atëty ja mëpëjkën ma Tiosën,

²ëkë ja nëëpäjtën, wi'ix ja mëpëjkpëtëjk yajkë'ënixajtëtyën, wi'ix ja o'kpë jyuukpyëktën ets yajpaye'eytyë ja nyëë pyokyëty xëmëkyëjxmëpë.

³Yë'ë jää jëtu'unpë ntu'unmëty ko Tios tyajkutukëty.

⁴Ja ja'ay mëti'ipë të tnijawëtën ja Tios ja jyä'ä, mëti'ipë të tuntën ja Tios ja tyuunk ets nän tëë ja Kënu'kxymyëkajtën t'ëxajëtë,

⁵ets tëë tjawëtë wi'ix ja Tios ja y'aaw y'ayuk xyu'kxëtyën ets ja kutujkën mëti'ipë miimp wiinkoonpën,

⁶ko jatëkok pyokykya'atëty, ka'ap t'ëkjëkyäjpnëty ets jatëkok jyootwinpitëty ma Tiosën. Jëtu'un nëjkx tpaaty ijxtëm jeexyë ja Tios U'unk jatëkok tyajkruutspätën ets ijxtëm ja Tios ja jyä'ä yajnëxi'iky yajtukxi'ikyën.

⁷Jëtu'un yë'ëjëty ijxtëm ja naax t'ukta'ayën ja tuu nëë mëti'ipë naxmëtu'ujëpën: ko oyëtypë pëjktä'äky y'ity, ja yuupë tuunpë pyaatëp ja Tios ja kyënu'kxën.

⁸E pën aak äpny aak ëxëëk ujts mujxp, ka'ap tsyowpaaty, kajpxpoky ja Tios yaj'itëtë ets ok yajnino'oktë.

⁹Mëku'uktëjkëty, oy miits yam jëtu'un nnimëtya'aktë, nija'awëtyëpës ko miits jam myajpaatë ma ja oyajtënën, yë'ë yajtijp ko tëë ja nitsokën xypyaatë.

¹⁰Jä'ä ko yë Tios mëtëy nyipaye'ey, ka'ap tja'atyëkoyä'äny mëti'ipë të xytyuntën ets wi'ix të xypyutëkëtën ja Tios ja nyaax kyajpn ijxtëm tyampaat xytyuun'ëtë'ëtstën.

¹¹Ntsojktëpës ets miits nitu'ukjaty xyaj'ixëtëty ja mëpëjkënëty mëët ja xoontakën, koonëm ja oyajtën xypyaatëty mëti'ipë mjëjp'ijxtëpën.

¹²Ka'apës ntsoktë ets miits ni'ikyë nuux m'awinpijnëtëty, yë'ëjës ntsojktëp ets xynyi''ijxtu'utëty ja oyjyuuky'ajtën mëti'ipë yajpatpën ma ja ja'ayëtyën tëëpë t'ëxajëtën ja kuma'ayën mëti'ipë ja Tios të tyukwinwanëtën.

¹³Ko ja Tios tyaj'apatëy ja waantakën ma ja Abrahamën, kë'ëm ojts nyäxyëëwkukäjpxyë, jä'ä ko ka'ap ënäty pën wiinkpë wäänë mëjpë ijxtëm yë'ëjën.

¹⁴Jëtu'un yajnëmaay ja Abraham: Nmo'ojäämpy ja kënu'kxën mëjwiin këjää ets nyajmayëjä'änyës ja m'u'unk m'ok.

¹⁵Abraham mëët ja mä'kxtujkën ojts y'ëwxity ets t'ëxajëy mëti'ipë ënäty ja Tios të tyukwinwanëtyën.

¹⁶Ko ja ja'ay tii tyajtëytyëkëja'antë, yë'ë kyajpxpatëp mëti'ipë ni'ik mëj'äämpyën këtiinëm yë'ë kë'ëmëty ets ko jëtu'un tii tyajtëytyëkëtë ka'ap t'ëkjëkyäjpnë wi'ix jyaak yajnimëtya'akëty.

¹⁷Tios ojts jëtu'un tuknipëjktaakë ets tyajnikëxë'ëka'any pën y'ëxajëjantëpën ja kuma'ayën mëti'ipë të ënäty të twinwanën, ka'ap nijëna'a tyëkatsyën. Paatykyëjxm ojts kë'ëm nyäxyëëwkukäjpxyë ko ja waantakën tpëjktäky.

¹⁸Ya'atë mäjtskpëkpyë mëti'ipë ka'ap tyëkatsyën ets ka'ap tjëkyepyën yë Tios wyin'ëënëty, paaty të n'ëxajëm ja jotkujk'ajtën, ko të n'ixta'ayëm ja Tios myajts'ijtën ets të ntukjotkujk'ajtëm ja ëwxijt mä'kxtujkën mëti'ipë të xymyo'oyëmën.

¹⁹Ya'atë ëwxijt mä'kxtujkën yë'ë mëk yaj'ijtyp ja njoot'ajt nwinma'any'ajtëm, jëtu'un ijxtëm ja pujxnën nëëjotypë two'on'ityën ja kepy nëëwinye'epyë. Yë'ë ja ëwxijt mä'kxtujkën mëti'ipë të tuknaxyën ja wit'atëëytyuk japë tsajptëkoty yajpaatyën mëti'ipë tsajpjotm ijtpën,

²⁰ma ojts tyëkën tëëyëp ja Jesús ets ja në'ë tu'u tyaj'ëwatsy, jëtu'un nyäjxy xëmëkyëjxm Teety Wintsën, ijxtëm ja teety wintsën Melquisedec y'ijtyën.