Read Biblia Mixe de Quetzaltepec Santiago 1 Bible Online

Santiago 1 - Biblia Mixe de Quetzaltepec bible

Santiago 1

¹Santiagë, Tios mëtuunpë ets ja Wintsën Jesukristë. Tkajpxpo'kxy ja Israel ja'ayëty, mëti'ipë yajpatëpën oymyaakajpnëty naaxwiinyëtë apëtsëmy.

²Mëku'uktëjkëty, akujk jotkujk miits mnäjyawëtëty ko xymyënax xyajnaxtë ja ëyo'on jotmay kanaakjëjp.

³Jä'ä ko miitsëty mnija'awëtyëp ko ja mmëpëjkën yaj'ijxp pën mëk, ënät xymyëwij xymyëkäjtë wi'ix xymyëtänëtëty amëk jotmëk ja ëyo'on jotmay.

⁴Yë'ë tsojkëp ets xyjyatëty wi'ix winë xymyëtänëtëty, jëtu'unts m'itëty këxy kä'pxy ijxtëm ja Tios tsokyën ets këtiipë tii mtëkoy'ajtxëtëty.

⁵Pën jam miits jënaakën ka'ap xymyëët'atë ja wijyajtën kejyajtën, amëtowtë Tios ets mmo'ojëtëty. Aak Tios yäjkpy oy tyimtiijëty, ka'ap tii tukwintuk'ooky.

⁶Mëët yë mëpëjkën tii t'amëtowëty ets ka'ap kyumay kyutajëty; jä'ä ko pën kuma'ay kutajëp jëtu'un yë'ë ijxtëm yë nëë jyä'tsminy jyä'tsxëpyën, ko pyojminy pyojxëpy.

⁷Pën jëtu'un'ajtpën, ka'ap tjëjp'ixëty ets ja Wintsën tii myo'ojëtëty,

⁸jä'ä ko tyam wiink ja winë tmëmay tmëtajy ets jëpom wiink ënäty myääykyoj tyajkojnë, ka'ap tu'ukyë ja jyot wyinma'any tyaj'ity.

⁹Ja nmëku'uk'ajtëm mëti'ipë yaj'ëyow yaj'ama'atën, jotkujk mëpaat nyäjyawëty ko Tios yajmëjnaxyë;

¹⁰ets ja nmëku'uk'ajtëm kumeenypë, wä'än naxym näpyëjktä'äkyë ko Tios yajkumeeny'ätyë, jä'ä ko jëtu'un yë kumeenyjyä'äy ijxtëm ja ujts pëjyën mëti'ipë ka'ap jeky y'ityën.

¹¹Ko ja xëëw pyëtsimy ets mëk jyajtä'äky, ënät ja ujts tyi'itsy, ja pyijy kyä'äy, jëtu'un ja y'oyajtën tyëkoy. Näyjyëtu'un ja kumeenyjyä'äy jyäty ma wyit myeenyën.

¹²Akujk jotkujk ja ja'ay mëti'ipë amëk jotmëk myëtënääpyën ja ëyo'on jotmay; ko tuknaxëty ja ëyo'on yë'ë kyuma'ayën'atäämpy ja juukyajtën mëti'ipë Tios të tukwinwanën ja mëti'ipë tsojkëpën.

¹³Ko pën poky tunëty, ka'ap y'ëna'anëty ko Tios yajpokytyuunëp, jä'ä ko Tios ka'ap tyajmëyäty ets tii ëxëëkpë tunëty ëkë ja poky tunëty, nän ka'ap ja ja'ay ni'ikyë t'ënëëmë ets pyokytyuntëty.

¹⁴Yë'ëkyëjxm yë ja'ay pyokytyuny ko je'eyë y'atsoky ets ko ja ëxëëkpë nyätyukwin'ëënyë.

¹⁵Ets ko ja ëxëëk atsojkën nyätyukmëmëtä'äkyë, ënät pyokytyuny; ets ko pyokytyuny, ënät ja o'kën tyukpaatyë.

¹⁶Mëku'uktëjkëty, këtii myajwin'ëëntë;

¹⁷tu'kë'ëyë mëti'ipë oyën ets wa'atsën, këjxm yë tsyoony, Tios yë yäjkpy, ja Tios mëti'ipë pyëjktakën winë jam tsajpwinm mëti'ipë ajajp atë'kxpën. Yë Tios ka'ap tyëkatsy, nän yi'iyëm xëmë, ma yë'ëjën ka'ap tii tyëkatsy ets ka'ap tii y'akootsë.

¹⁸Jä'ä ko Tios jëtu'un të tsojkën'aty, paaty të xymyo'oyëm ja juukyajtën mëtëypyë mëët ja aaw ayuk. Tu'kë'ëyë mëti'ipë Tios yajkojën, jëtu'un yë'ë ijxtëm tii tyëëm'atyën ets n'ijtmëty ijxtëm ja aay ujtsën mëti'ipë jëyëjp tëëm'ajtë'kpën.

¹⁹Ja'amyätstë ya'atë mëku'uktëjkëty, a'ijxp jëjp'ijxp miits itë ets xymyëtoowkukëtëty ja oypyë ja aaw ayuk; yë'ë tëy ka'ap ja tsip äkë ets ja joot'an xymyëët'atëty.

²⁰Jä'ä ko ja ja'ay win'äkëpë, ka'ap yë'ë tuny mëti'ipë Tios tsyojkpyën.

²¹Ixmajtsta'atë ja ëxëëk winma'any ets ja ëxëëkajtën mëti'ipë tëë nyipäjnën. Ëxajëtë wintsë'kën mëët ja aaw ayuk mëti'ipë të yajpëjktä'äkyën ma ja mjot mwinma'anyëtyën. Ya'atë aaw ayuk myëët'ajtyp ja mëk'ajtën ets xyajnitsokmëty.

²²E ka'ap tyim yi'iyëty ko yaj'amëtoow'ity ja Tios ja y'aaw y'ayuk, yajtunaanp jëtu'un. Jä'ä ko pën ka'ap tii oy yajtuny nëkoopë je'eyë näwyin'ë'ënëmëty.

²³Pën je'eyë y'amëtoow'ijtyp ja Tios ja y'aaw y'ayuk ets ni tkapatuny, jëtu'un tpaaty ijxtëm ja ja'ay tku'ixën ja wyimpok ijxnjoty.

²⁴Jëtu'un kë'ëm nyäy'ixyë, je'eyëp ko wya'akwinpity ets tja'atyëkoy wi'ix ja wyiin jyëjp të t'ixyën.

²⁵E ja ja'ay mëti'ipë ka'ap tja'atyëkoyën mëti'ipë të tmëtoyën, tu'ukyë ja wyinma'any tpëjktä'äky wi'ix y'ënä'änyën ja ënä'ämën tëyajtën mëti'ipë yajnitsokpën ets xëmë tpatun, jotkujk xëmë y'ita'any.

²⁶Pën näjya'awëyëp ko Tios t'ëwtaty ets ka'ap ja y'aaw tmajts'ity, kë'ëm nyäwyin'ëënyë ets ko jya'ëna'any ko ja Tios tmëpëka'any ka'ap ja tyuny.

²⁷Ja mëpëjkën oypyë ets wa'atspë Tios Teety wintumpë yë'ë ya'atë: yajputëjkëp ja ku'ooky u'unk ets ja ku'ooky tyo'oxytyëjk mëti'ipë maaytyëp tajtëpën, näjyëtu'un yajputëkëty ka'apë nyäyaj'ëxëëkëtyën mëët ja ëxëëkajtën yaapë naaxwiinyëtën.