Read Biblia Mixe de Quetzaltepec Santiago 3 Bible Online

Santiago 3 - Biblia Mixe de Quetzaltepec bible

Santiago 3

¹Mëku'uktëjkëty, ka'ap may xymyëët'atëty ja yaj'ijxpëjkpë. Tëë xynyijawëtë ko ëëtsëty nyaj'ijxpëktë wäänë ni'ikës nyajtukumëtowa'antë koos ënäty tii oy nkayaj'ijxpëktë.

²Oy tyimpënëty aak tuuntëkoopy yë ja'ay; pën jää pën ka'ap pyokytyuny ko tii tkäjpxy, wa'ats ja'ay tääpë, ets jyäjtyp wi'ix tmajts'itëtyën yë nyi'kx kyopk.

³Ko ja kwaay mpëjktakmëty ja y'ajän ënät xymyëmëto'omëty, tu'kë'ëyë ja nyi'kx kyopk jyëkyejpy nmëmëtakmëty.

⁴Tim näjyëtu'un ja kepy nëëwinye'epyë, oy jyamëjëty ets mëk ja poj jyatukja'tyë, ja mëti'ipë yajye'epyën ja yajnëjkxyp ma tsokyën mëët ja kepy mëti'ipë yajtijpën timón.

⁵Näyjyëtu'un jyäty mëët ja aaw yä'än, yi'inëm yajpaaty ma ni'kx kopkën; je'eyëp ko mëj winë tuny. Jëtu'un yë'ë ijxtëm ja jëënën mëti'ipë yi'inëmën ets kyëjääjën tunjoty kopkjoty.

⁶Näyjyëtu'un yë aaw yä'än ijxtëm yë jëënën, ëxëëktuump ko tii oy tkakäjpxy. Yä'änkëjxm ja ja'ay ja nyi'kx kyopk myä'äty. Jëtu'un ja aaw yä'än ijxtëm jeexyë tyooypyikyën ja jëën mëti'ipë ëyoowtaknjoty tso'onpën ets tyooytyä'äy ja ja'ay jënu'un jyuuky'atën.

⁷Yë ja'ay myëmëtaktääpy ja oymyëti'ipë jëyujkëty ëwa'anpë, wä'än tjoonëty, tsa'anyëty ets tjëyujkëty mëti'ipë tsënaaytyëpën mejyjoty,

⁸e yë aaw yä'än ka'ap pën myäyë. Jëtu'un yë'ë ijxtëm yë xëwätën mëti'ipë yaj'o'kpën, yë ni'ik ëxëëkpë.

⁹Näy yë'ë n'aaw'ajt nyä'än'ajtëm mëët nmëjja'aw njaantyja'awëmëty ja Tios, ets nän yë'ë n'aaw'ajt nyä'än'ajtëm mëët nkajpxpojkmëty ja nmëku'uk'ajtëm mëti'ipë Tios të pyëjktä'äkyën tä yë'ë kë'ëmën.

¹⁰Aawjoty pyëtsimy ja ayuk ko ja'ay oy yajnikäjpxy ets ko ja'ay yajkajpxpoky. Mëku'uktëjkëty, ka'ap jëtu'un y'oyëty.

¹¹¿Pëtsëëmp jëtää ja nëë pa'akpë ets ta'ampë ma tu'uk ja nëë kopkënë?

¹²Mëku'uktëjkëty, ¿tëëm'ajtp jëtää ja aceituna ma ja higo kepyënë; ëkë tsatym, tëëm'ajtp jëtää ma ju'u kepyënë? Tim näjyëtu'un ma tu'uk ja nëëkopkën, ka'ap ja pa'akpë jap pyëtsimy ma ja ta'amtspë pyëtsimyën.

¹³Pën jää pën wijypyë kejypyë ma miitsëtyën ëkë ja'akyujkëpë mëtoowkujkëpë, wä'än tyajkwinkëxë'ëky mëët ja y'oyjä'äyajtën, yujy tëtä'äky jyuuky'atëty ijxtëm tii tnijawën.

¹⁴E pën miitsëty je'eyë mnämyëtsip'atëtë, mnäyajjoot'anpëkëtë ets tsipkyëjxm winë xytyuntë; ko jëtu'un m'ëtë'ëtstëty tii mjanätyukmëjjawëtëp, ja tëyajtën ënäty mkawinkutsëkëtyëp.

¹⁵Jä'ä ko ya'atë wijyajtën, ka'ap yë Tios tjä'äjëty, naaxwiinyëtë ja'ay yë wyinma'any ko ja ku'oypyë jëtu'un tyunëtë.

¹⁶Ko ja'ay tii nyätyukmëku''oy'ixëtë ets aak mëj nyäyajnaxa'anëtë, xit ko'ow je'eyë nyäyajjatëtë ko ëxëëk winë tuntë;

¹⁷pën myëët'ajtyp ja wijyajtën kejyajtën mëti'ipë tso'onpën ma Tiosën, wa'ats yajpaatë ma jyuuky'ajtënëtyën; ka'ap maa pën mëët yë tsip tmëët'atë, tëtä'äky jyuuky'atë, yaj'ijxëtëp ja y'oyjyot y'oywyinma'anyëty. Pa'ëyoow najts'ëyo'owëtëp, pyutëjkëtyëp yë ja'ay xim yam, ëmuumtu'ukjot winë tuntë ets oy myäytyë tyajtë.

¹⁸Mëti'ipë tsyojktëpën ets jyää'atëty ja jotkujk'ajtën, yë'ë nyiptëp kyojtëp ja jotkujk'ajtën ets tuk'oy'ata'antë ja oypyë ja nipaye'eyën.