Read Biblia Mixe de Quetzaltepec Santiago 4 Bible Online

Santiago 4 - Biblia Mixe de Quetzaltepec bible

Santiago 4

¹¿Ma jëtää ja tsip tsyoony mëti'ipë miits mtuuntëpën? Jap tsyoony ma ja mjot mwinma'anyëtyën ko winë xytyätytsyojkën'atë.

²M'atsojktëp mëti'ipë ja mmëku'uk myëët'ajtëpën ets ko xykyapaatë ënät ja tsip pyëti'iky ets myajja'ay ooktë. Ka'ap akujk jotkujk m'itë jä'äkyëjxm ko Tios xykya''amëtowtë mëti'ipë mtsojktëpën.

³Ets ko xy'amëtowtë, ka'ap myajmo'otë, jä'ä ko ka'ap oy xy'amëtowtë ets jä'ä ko jam xyajtuna'antë ma ka'ap pyaat'atyën.

⁴Miitsëty, mëti'ipë ja Tios të y'ëxmatstën, ¿tii këtii xynyijawëtë ko ja Tios ka'ap tsoky ets ja naaxwiinyëtë winma'any n'atsojkmëtyë? Oy tyimpënëty mëti'ipë ja naaxwiinyëtë winma'any y'atsojkpyën, ja Tios myëtsipëjkpy.

⁵Tam tii ko ja Tios ja y'aaw y'ayuk këxja'aypyë y'ënä'änyën: Xytsyojkni'ikëm ëëtsajtëm ja Kënu'kxymyëkajtën mëti'ipë Tios të tpëjktä'äkyën ma ja njoot'ajt nwinma'any'ajtëmën, ets ka'ap tsoky ets wiinkpë xyjyä'ä'ajtmëty.

⁶Ets ka'ap yi'iyëty ya'atë, wäänëni'ik ja Tios ja mëyajtën tuny ma ëëtsajtëmën ets xypyutëjkëmë, paaty ja Tios ja y'aaw y'ayuk këxja'aypyë y'ënä'äny: Tios tyukjoot'anpëjkpy ja ja'ay mëti'ipë mëj këjxm nnäyjya'awëyëpën ets pyutëjkëp mëti'ipë yujy tëtä'äky ja'ay'ajtpën.

⁷Näkyë'ëyakëtë ëmuumtu'ukjot ma Tiosën. Ka'ap xykyupëktëty ja mëjku'u, ënät mkukä'äkëtëty.

⁸Mëwinkontë ja Tios ets näjyëtu'un mmëwinkonëtëty. Pokytyuunpë ja'ayëty, ëxmatstë ja mka'oy juukyajtënëty; ets miitsëty mëti'ipë mäjtsk aaw mäjtsk jot ja Tios mtsojktëpën, nänyajwa'atsëtë.

⁹Maytyë tajtë, mëjë'ë mëya'axtë ja mpokyëty, wä'än yë mxikënëty t'awinpity yä'äxy ets m'ijtën mxo'onënëty, ma'ayën tajën.

¹⁰Näypyëjkta'akëtë yujy tëtä'äky ma Tiosën ets yë'ë mëj mpëjkta'akëtëty.

¹¹Mëku'uktëjkëty, këtii mnanyi'ojëtëty nixim niyam. Pën ja myëku'uk nyi'ojëp ets pyoky'ijxyp ja Tios ja y'ënä'ämën ënäty kyamëj'ijxëp; ko pën tkamëj'ixy ja ënä'ämën, tëytyuunpë ets paye'epyë ënäty nyäpyëjktä'äkyë ets ni yë'ë tkapatuny ja ënä'ämën.

¹²Tu'uk je'eyë mëti'ipë ja ënä'ämën yajkën ets ja ja'ay tpaye'eyëty; nän yë'ë yajnitso'okaanp ets yajwintëkoyaanp. E mijts, ¿Mpënmës ko ja mmëku'uk ja pyoky xytyukwinmëtoy?

¹³Mëtoow'itë ya'atë, miitsëty ko m'ëna'antë: Tyam ëkë jëpom nja'amëty wiink kajpn ets jam tu'kjëmëjtën n'aju'uy n'ato'kmëty ets meeny npatmëty.

¹⁴Nijënu'un xykyanijawëtë mëti'ipë jëpom tunan jatanëpën. Jëtu'un miitsëty ijxtëm ja maanikën, wäänë y'ity ets tyëkoy.

¹⁵Nikë jëtu'un n'ëna'anmëty: Pën ënaanp ja Tios, ënät njuuky'ajtmëty, ënät winë ntu'unmëty.

¹⁶Miitsëty, amëj akëjxm tii xykyajpxtë ets ya'atë jëtu'unpë amëj'ajt akëjxmajtën, ka'ap y'oyëty.

¹⁷Pën nyija'ap tunëty mëti'ipë oyën ets ka'ap tuny, pokytyuunp ënäty.