Read Biblia Mixe de Quetzaltepec Santiago 5 Bible Online

Santiago 5 - Biblia Mixe de Quetzaltepec bible

Santiago 5

¹Mëtowtë miits, kumeenyjyä'äyëty. Mëjë'ë mëya'axtë ja m'ëyo'on mjotmayëty mëti'ipë mpaatantëpën.

²Tëë ja mmeeny pyu'ta'ay, tëë ja mwit ja yëm tyuktëjkëtyä'äyë.

³Tëë ja mpu'ts pujxn mpoop pujxn tyowëtyä'äy, ko jëtu'un të jyajta'ay ëxëëk mjata'antë ets jëtu'un mkutëkoya'antë jëtu'un tä tii tyooytyëkoyën. Tëë xynyipëjkpätë ja wit meeny ma ja xëëw kyëxanën.

⁴Ja mtuunpëtëjk mëti'ipë ka'ap të xymyëjuytyën, mëti'ipë të tyajpëtë'ëktën ja mpëjktä'äkyëty, yë'ë jëëytyak nu'kxtaktëp ets miitsëty ëxëëk mjatëty mkëpätëty; e tëë ja Wintsën mëti'ipë maaytyääyëpën winë tmëtoy ko jyiiytya'ak nyu'kxta'aktë.

⁵Akujk jotkujk miits yaa naaxwiiny të myajpaatë, tä tsajpkaajën të mni'kxëtë, tëë timpyääty jëna'a ja tsajpkaani'kx y'ooka'antën.

⁶Tëë miits mtëytyun mtsaatsytyuntë ets tëë xyaj'ooktë ja yujypyë tëtä'äkpyë mëti'ipë ka'ap nyäkyuwa'anyën.

⁷Miits mëku'uktëjkëty mëët'atë ja mä'kxtujkën koonëm ja Wintsën myinëty, ijxtëm ja kam tuunpëtëjk mëët ja mä'kxtujkën t'ëwxitë ja nëë tuu koonëm tyajpëtë'ëky ja pyëjktä'äky.

⁸Näyjyëtu'un miits mëët'atë ja mä'kxtujkën, tu'ukyë ja winma'any xyaj'itëty, jä'ä ko wiinkoonp ja xëëw ma ja Wintsën myina'anyën.

⁹Mëku'uktëjkëty, ka'ap mnämyëkajpx mnäpya'tkajpxëtëty, këtiipë ja Tios mtëytyunëtëty ets mpaye'eyëtëty, jä'ä ko ja Tios, ja tëytyuunpë paye'epyë, tim winkon jä'änë.

¹⁰Mëku'uktëjkëty, ni''ijxtu'utë wi'ix ja Tios ja kyäjpxynyajxpëtëjk tmëtënaaytyën ja ëyo'on jotmay ets näjyëtu'un xytyuntëty.

¹¹Ëëtsëty jä'äs ntijtë ko akujk jotkujk yë ja'ay yajpaatë mëti'ipë myëmëtaktëpën ja ëyo'on jotmay. Miitsëty tëë xymyëtoy'atë wi'ix ja Job tmëtënaayën ja ëyo'on jotmay, ets mnija'awëtëp näjyëtu'un wi'ix ojts ja Tios myo'oyë ja oyajtën ok, jä'ä ko yë Tios myëët'ajtyp yë pa'ëyo'owën najts'ëyo'owën.

¹²Yë'ë tim kopkpëky mëku'uktëjkëty, ko ka'ap xykyajpxpaatëty ja Tios, tsajp, naaxwiinyëtë ets oy tyimtiijëty. Ko tii xykyajpxtëty, tim'ëna'antë oy, pën tëy ënäty; ets ka'ap pën ka'ap ënäty tyiyëty, këtiipë myajpëjkta'aktëty ëyoowtaknjoty.

¹³Pën jam pën myony tyuk ma miitsëtyën, wä'än ja Tios tja'amyetsy. Pën jam pën akujk jotkujk yajpaaty, wä'än ja Tios tkuuy'iy.

¹⁴Pën pëjkëp, wä'än ja mëjja'aytyëjk twoy ets ja Tios tyuknija'amyätsëtëty ets tyukjaaxëtëty ja olivë on Wintsën xyëëwkyëjxm.

¹⁵Ko ëmuumtu'uk ja Tios tja'amyätstëty, tso'okaanp ja pa'amja'ay, yajmëkpëkëtëp ja Wintsën; ets pën tëë pyokytyuny, yajpokmyä'kxaanp jä'ä.

¹⁶Paaty, maaywyatstë ja mpokyëty nixim niyam ets nätyuknija'amyätsëtë ja Tios winpity atëjy ets mtso'oktëty. Tuunp ni'ik ko ja oyjyä'äy Tios tja'amyetsy.

¹⁷Ja Tios ja kyäjpxynyajxpë Elías, näjyëtu'un y'ijty ja'ay ijxtëm ëëtsajtëmën, ko ja Tios tja'amyejtsy ets ja nëë tuu ka'ap myinëty, ka'ap ojts tyu'uy tëkëëk jëmëjt ja kujkm.

¹⁸Koonëm jatëkok ja Tios tja'amyejtsy ets ja nëë tuu myiiny, ënät ja ja'ay ja pyëjktä'äky y'ijtë.

¹⁹Mëku'uktëjkëty, pën jam ma miitsëtyën nitu'uk ja mëku'ukëty nyë'ëtëkoy tyu'utëkoy ets jam pën ja wiinkpë mëti'ipë wyijtswinpijtypyën,

²⁰nijawëtë ko pën ja pokyjyä'äy tyajwinpityp ma pokyjotm yajpaatyën, jap ënäty të tyajpëtsëmy o'ktujk ets yë'ëkyëjxm ja ja'ay may ja pyoky yajnimä'kxa'antë.