Read Biblia Mixe de Quetzaltepec 1 Pedro 1 Bible Online

1 Pedro 1 - Biblia Mixe de Quetzaltepec bible

1 Pedro 1

¹Yë Pedro, Wintsën Jesukristë y'ayuk kajpxnajxpë, tyam mtuknikäxëtë kajpxpo'kxën mëti'ipë kujë kääkë yajpatëpën ma Ponto y'itjotm, Galacia, Capadocia ets Bitinia y'itjotmën,

²mëti'ipëjaty ja Tios Teety ojts wyinwitsëtën tëëyëp ijxtëm yë'ë të tuknipëjktaakën. Ja Tios ja myëk'ajtën miits të mwinma'anymyo'ojëtë ets xymyëmëtowtëty ja Jesukristë ets wa'ats mwë'ëmtëty mëët ja nye'pyny. Wä'än ja Tios ni'ik mmo'ojëtë ja kënu'kxën ets ja jotkujk'ajtën.

³Tsojk nmëjja'aw njaantyjya'awëm ja Tios, ja Wintsën Jesukristë Tyeety, ko të xypya'ëyo'owëmë ets ja nwinma'any'ajtëm të tyaj'ajämë mëët ko ja Jesukristë të jyuukpyiky. Jëtu'un ëëtsajtëm nija'awëmë ko nmëët'ajtëm ja juukyajtën.

⁴Paaty ëëts njëjp'ijxmëty ëmuumtu'ukjot ko ja Tios xymyo'oja'anëmë ja kuma'ayën mëti'ipë pëjkë'ëky yaj'ijtypyën jam tsajpjotm, mëti'ipë ka'p kyutëkoyën, y'ëxëëkën ets xyootsyën.

⁵Jä'ä ko xymyëpëktë ja Tios, paaty mkëwent'atëtë mëët ja myëk'ajtën ets xypyaatëty ja nitsokën mëti'ipë jap yaj'ëwxijtypyën ets jää yajnijawëty ko ënäty ja naaxwiinyëtë kyixy.

⁶Paatykyëjxm miits akujk jotkujk mnäjyawëtëty, oy tyam ja ëyo'on jotmay xy'ëkyajnaxtë.

⁷Jä'ä ko jëtu'un miits ja mëpëjkënëty ijxtëm ja pu'ts pujxnën mëti'ipë jëwyiin nitoopyën ets yaj'ixy pën oy. Ja mëpëjkpë mëti'ipë myëtënääpyën ja ëyo'on jotmay, yë'ë wäänëni'ik tsoowpatp këtiinëm ja pu'ts pujxn mëti'ipë wintëkoopyën; ko miits näjyëtu'un myaj'ijxmatstëty ets xymyëtänëtëty ja ëyo'on jotmay, kumay miits mnaxa'antë, mëj'äämpy ets wyintsë'ëkë ko ënäty ja Jesukristë myiny.

⁸Mtsojktëp miits ja Jesukristë oy të xykya'ixtë; e tyam mëët ko xymyëpëktë oy të xykya'ixtë, ni'ikyë mxoonta'aktë mëj këjää mëët ja mëj'ajt oyajtën mëti'ipë ka'ap yajmë'ayukpaatyën wi'ix yajnikajpxëty.

⁹Jä'ä ko të xypyaatë ja mëpëjkën mëti'ipë ja nitsokën tukpatpën.

¹⁰Tëëyëp ja Tios ja kyäjpxynyajxpëtëjk ojts tpamay tpatajtë ya'atë nitsokën ets ojts nikajpxtë mëti'ipë ënäty ja Tios mmo'ojanëtëpën ko tmëët'aty ja oyjyot oywyinma'any.

¹¹Ja Kristë ja myëk'ajtën yë'ë ijty tyuknija'ap ja käjpxynyajxpëtëjk wi'ix ja Kristë y'ëyowa'anyën ets ja mëj'ajtën oyajtën mëti'ipë ok minaanpën; yë'ëjëty ojts tjanijawëja'antë ja xëëw po'o jëna'a jëtu'un jyata'any kyëpäta'any mëti'ipë ja Kristë ja myëk'ajtën ënäty jyanikäjpxypën.

¹²Tios tyuk'ijx tyuknija'awëy ja kyäjpxynyajxpëtëjk ko ka'ap yë'ëjëty tuk'oy'ata'antë mëti'ipë kyajpxwa'kxtëpën, miits mtuk'oy'atantëp. Tëë ënät tyam miits xy'ixtë xypyaatë mëti'ipë ojts yë'ë tkajpxwa'kxtën ko ojts yajtuk'ëwaanëtë ja aaw ayuk oypyë Kënu'kxymyëkajtën mëët mëti'ipë tsajpjotm tso'onpën. Kukäjpxy paat ojts jëtu'unpë tjanijawëja'antë.

¹³Paaty miits a'ijxp jëjp'ijxp myajpaatëty ets wijy kujk mjuuky'atëty. Nämyëmëta'akëtë, jëjp'ixtë ëmuumtu'ukjot ja mëyajtën mëti'ipë ja Tios tyunäämpyën ko ja Jesukristë myinëty jatëkok.

¹⁴Jëtu'un m'itëty ijxtëm ja pi'k ëna'kën mëti'ipë tyeety myëmëtoowtëpën. Këtii jëtu'un mjuuky'atëty ijxtëm të m'itën ko ja Tios ijty xykyanijawëtë.

¹⁵Juuky'atë wa'ats, jä'ä ko ja Tios mëti'ipë të mëkajpxëtën wa'ats yë'ë.

¹⁶Jëtu'un ja Tios ja y'aaw y'ayuk këxja'aypyë y'ënä'äny: näjyëtu'un miits wa'ats itë ijxtëmës ëjts nwa'atsëtyën.

¹⁷Pën miitsëty Tatë, xynyëëmëtë ja Tios, mëti'ipë paye'epyën mëtëy ets ka'ap wyin'ixy wyinkexyëty, kopkpëky ko xywinkutsë'ëkëtëty xëmë mapaat yaa naaxwiiny mjuuky'atën.

¹⁸Tios miitsëty të myajpëtsëmëtë ma ja juukyajtën najtspëkëpë mëti'ipë ojts mtukumayëtën yë m'ap m'okëty; ets wa'ats xynyijawëtë ko tëë këjää tsyowpaaty ko të m'ëwaatsëpëtsëmtë. Ka'ap yë'ëjëty meeny, pu'ts pujxn ets poop pujxn të yajtukujuy mëti'ipë ma'tpën ets tëkoopyën,

¹⁹yë'ë mëët ja Kristë nye'pyny, mëti'ipë të wyintsë'kën'atyën ijxtëm tu'uk ja kupixyny u'unkën mëti'ipë ka'ap tii ma'atpë ëxëëkpë tmëëtëtyën.

²⁰Jëtu'un ojts tëëyëp ja Tios tuknipëjktaakë ka'anëm ënäty ja naaxwiinyëtë kyojnyëm. Tyam tëë ja myiny jyä'ty ets miits xytyuk'oy'atëty.

²¹Mëët yë'ë ko yë Kristë të xymyëpëktë paaty ja Tios näjyëtu'un xymyëpëktë, mëti'ipë të tyajjuukpyikyën ja Kristë jatëkok ets të tmëjjaw të tjaantyjyawë, jëtu'unts të xypyëjkta'aktë ja mjot mwinma'anyëty ma Tiosën ets xy'a'ix xyjyëjp'ixtë.

²²Mëku'uktëjkëty, jä'ä ko xymyëmëtowtë ja tëypyë jaantypë, näyajwa'atsëtë ets nätsyokëtë nixim niyam winë aaw winëjot ets amëk jotmëk.

²³Tëë miits jatëkok mëxu'unk'atë; ka'ap yë'ëty ko jam xymyëët'atë ja mteety mtaakëty mëti'ipë o'ktëpën, yë'ë ko ja Tios ja y'aaw y'ayuk të xymyëpëjkëtë, mëti'ipë xëmëkyëjxm ijtpën ets juukyën.

²⁴Jä'ä ko jëtu'un ja Tios ja y'aaw y'ayuk këxja'aypyë y'ënä'äny: Tëkokyëty yë ja'ay aakjëtu'un ijxtëm ja aay ujtsën, ets ja myëj'ajtën jëtu'un ijxtëm ja pëjyën. Tëtsp ja aay ujts ets ja nyipëjy kyatska'ay;

²⁵e ja Tios ja y'aaw y'ayuk ijtëëp ja xëmëkyëjxm. Yë'ë ya'atë ja aaw ayuk mëti'ipë miits të myajtukmëmëtya'aktën.