Read Biblia Mixe de Quetzaltepec 1 Pedro 4 Bible Online

1 Pedro 4 - Biblia Mixe de Quetzaltepec bible

1 Pedro 4

¹Jëtu'un ijxtëm ja Kristë jyot nyini'kx y'ëyooyën, jëtu'un mëpaat miits xykyupëktë ja ëyo'on. Mëti'ipë të y'ëyoyën ma ja nyi'kx kyopkën, tëë ja poky tpojtuky,

²ets jyuuky'atëty ijxtëm ja Tios tsokyën mapaat yaa naaxwiiny yajpaatyën ets ka'ap jyëtu'unëty ijxtëm kë'ëm tsokyën.

³Jeky ojts miitsëty jëtu'un winë xytyuntë xykyajpxtë ijxtëm ja ja'ayëtyën ka'ap ja Tios tnijawëtën, jä'ä ko jam ijty mjuuky'atë ma ja ëxëëkpën; ma yaj'atsokyën winë, ma tëkatsy ja winma'any jyä'tyën, ma ja'ay ja kyë'ëm winma'any tyajtuntën, ma ja'ay y'uuktë myu'ukëtën, kyäytyë y'uuktën ku'uxyë jotkëtä'äky, tyuuntëkoytyë kyajpxtëkoytyë, twintsë'ëkëtë ja tsaa ets kepy.

⁴E tyam, ko miits ka'ap xy'ëkpuwa'kënëtë ma ëxëëk jyuuky'atën, ëxëëk tjawëtë, paaty mnikajpxtë ëxëëkjaty.

⁵E kë'ëm nëjkx nikajpxtë tii të tuntën Tios wyintum, ko ënäty tpaye'ey ja juukpyë ookpyë.

⁶Paatykyëjxm ojts näjyëtu'un yajtukmëmëtyaktë ja oy aaw oy ayuk mëti'ipë të y'ooktën ets ja y'anëmë jyuuky'atëty ijxtëm ja Tios tsokyën, oy ja nyi'kx kyopk të jya'ooktë.

⁷Winkoomp ja xëëw ma ja naaxwiinyëtë kyëxanën, paaty miits wijy kujk itë ets ja'amyätstë ja Tios.

⁸Yë'ë tim kopkpëky ko ni'ik mnätsyokëtëty nixim niyam, jä'ä ko yë nätsyokë myä'kxtääpy yë poky.

⁹Ëxajëtë nixim niyam ko pën jya'ajta'akëty ma ja mjëën mtëjkëtyën, ka'ap ok xynyikajpx xynyimëtya'aktëty.

¹⁰Këëkjä'ä miits xytyuntëty ja mtuunk ijxtëm ja Tios të mmo'ojëtën. Näpyutëkëtë nixim niyam wi'ixëty ja Tios ja kënu'kxën mtukpaatëtën.

¹¹Pën jää pën kyäjpxy myëtyä'äky, jëtu'un kyajpxëty ijxtëm ja Tios ja y'aaw y'ayuk y'ënä'änyën. Pën jää pën myëku'uk tii tukputëkëja'any, yajtunëp ja myëjaaw mëti'ipë ja Tios mooyëpën. Tu'kë'ëyë tiijaty mtuuntëp mkajpxtëp, tuntë winë ijxtëm mëpaat ja Tios yajmëjjaw yajjaantyjawën ma ja Jesukristë ja xyëëwën, mëti'ipë ijta'ayxyëyëp ja mëj'ajt oyajtën. Jëtu'un y'itëty.

¹²Mëku'uktëjkëty, këtii xymyëkjawëtë ko ja ëyo'on jotmay xypaatëty, ijxtëm jeexyë ka'ap pën timmyëmëta'akëtyën.

¹³Ni'ikyë mëpaat jotkujk myajpaatë ko xymyënax xyajnaxtëty ja ëyo'on jotmay mëti'ipë ja Kristë näjyëtu'un myënajx yajnajxën, ets näjyëtu'un mxoonta'aktëty ko ënäty nyikëxë'ëky ja mëj'ajtën oyajtën ko Kristë myinëty.

¹⁴Xoonta'aktë pën jää pën ëxëëk mnikajpx mnimëtya'akëtë ko ja Kristë xymyëpëktë, jä'ä ko ja Tios Jya'awën ijtëëp jam ma miits ja mjot mwinma'anyëtyën.

¹⁵Pën jam pën y'ëyoy ma miitsëtyën, ka'ap yë'ëkyëjxmëty ko ënäty të yajja'ay'ooky, ko mmäätstë ëkë ko ëxëëk m'ëtë'ëtstë, ëkë ko tiitsip xytyuktëkëtë ka'apë mpaatëtën.

¹⁶E pën yë'ë mku'ëyo'onpatëtëp ko Kristë xypyanëjkxtë, ka'ap xytyuktsëtyuntëty, nikë wäänëni'ik ja Tios xyajmëjnaxtëty ko ja xyëëw jëtu'un xykyujajtëtëty.

¹⁷Tëë ja tiempo tpaaty ma ja Tios tpaye'eyä'änyën ja jyä'äy. Ets pën jam ja paye'eyën tsyo'ontä'äky ma ëëtsajtëmën, ¿Wi'ixpëm jëtää jyata'antë mëti'ipë kyamëmëtoowtëpën ja oy aaw oy ayuk?

¹⁸Pën tsip yë oyjyä'äy nyäyajtso'okyë, ¿wi'ixpëm jëtää ja pokyjä'äytyëjk ets ja ëxëëkja'aytyëjk?

¹⁹Paaty, pën ëyoop ijxtëm ja Tios të tuknipëjktaakën, wä'än tuun'ëtë'ëtsy ja oypyë ets ja jyot jya'awën tpëjkta'akëty ma Tiosën mëti'ipë të yajkojyën, jä'ä ko yë'ë oypyë xëmë tyuunpy.