Read Biblia Mixe de Quetzaltepec 2 Pedro 1 Bible Online

2 Pedro 1 - Biblia Mixe de Quetzaltepec bible

2 Pedro 1

¹Simón Pedro, Wintsën Jesukristë tyuunpë ets y'ayuk kajpxnajxpë, mtuknijayëtë ya'atë noky miitsëty, mëti'ipë ja Yajnitsokpë Jesukristë nTios'ajtëmë të tmëpëktën.

²Ëxajëtë mëjwiin këjää ja kënu'kxën ets ja jotkujk'ajtën jä'äkyëjxm ko xynyijawëtë ja Tios ets ja nWintsën'ajtëm Jesús.

³Mëët ja Tios ja myëk'ajtën, tëë xymyo'oyëmë tëkokyë mëti'ipë nyajmëyajtëmën ets ntukjuuky'ajtmëty ijxtëm tsokyën, ets n'ixy'ajtmëty ja mëti'ipë të xymyëkajpxëmën mëët ja myëj'ajtën kyutujkën ko winë të tyaj'ixyë.

⁴Ets mëët ja jëtu'unpë tëë xytyukwinwa'anëmë ja këjääpë ets tsowpë, yë'ëkyëjxm xypyata'antë ja Tios ja y'oyajtën, myëj'ajtën ets xykyukä'äktëty ja mëti'ipë këjxp najxpën, yääyëpë naaxwiinyëtën.

⁵E paaty ja mëpëjkënëty yë'ë mëët xyajka'pxtëty ko tii oy xytyuntëty; ko tii oy xytyuntëty yë'ë mëët xyajka'pxtëty ja ja'aykyujkën;

⁶ja ja'aykyujkën, nämyajts'itë, mä'kxtujkën; ets ja mä'kxtujkën mëët ja wiinkutsë'ëkën,

⁷ets ko m'itë ijxtëm ja Tios tsokyën, ënät xytsyoktëty ja mëku'uktëjkëty; ets ko ënäty xytsyoktë ja mëku'uktëjkëty, ënät näjyëtu'un xytsyoktëty ni'ëmukë ja ja'ay.

⁸Ko jëtu'un ya'atë tu'kë'ëyë xyajmëjtëkëtëty, ënät ja mjuukyajtën nëjkx wyinkëxë'ëktë ko ka'ap nyëkoopëty xynyijawëtë ja Wintsën Jesukristë.

⁹Pën ka'ap tyajmëjtëkë ja jëtu'unpë oywyinma'any, jëtu'un ja jyatë ijxtëm tu'uk ja ja'ay wiintspën ëkë mëti'ipë ka'ap jëkämpaat y'ixyën, jä'äkyëjxm ko të tja'atyëkoytyë ko ja Kristë të yajpokywya'atsëtë ma ijty pyokytyuntë.

¹⁰Mëku'uktëjkëty, yë'ëkyëjxm ko ja Tios të mtsokëtë ets të mwin'ixëtë, yajkopkpëktë ja oypyë winma'any këtiipë ja poky xy'ëktuunëtëty.

¹¹Jëtu'un akujk jotkujk mtëkëtëty ma ja Wintsën Jesukristë Yajnitsokpë kyutujktaknën ets jam m'itëty xëmëkyëjxm.

¹²Paaty miitsëty xëmë ntukja'amyätstë oy të xyjyanijawëtë ja Tios ja tyiyajtën ets oy xyajtuntë mëti'ipë të ntuk'ijxpëktën.

¹³Maas njaak juuky'ätynyëm, xypyatpës ets ntukja'amyätstëty ya'atë kajpxwijën.

¹⁴Tëë ja Wintsën Jesukristë xytyuknijawës wäänë jyaak ijty ets ya'atë juukyajtën n'ëxmatsa'anyës;

¹⁵je'eyëp ko mëjwiin jëjääjës yam winë njaaktuna'any ets yë'ë xyjyä'ämyätstëty ko ënäty ëjts të n'o'knë.

¹⁶Ja ijxpëjkën mëti'ipë tmooytyën ko ja Wintsën Jesukristë myina'any yaa naaxwiiny jatëkok mëët ja myëk'ajtën, ka'apës kë'ëmwinma'any ojts nma'kxtë etsës jëtu'un n'ëna'antëty, nwiinës mëët ntimy'ijxtë ja Wintsën ja myëj'ajtën jyääntyajtën.

¹⁷Ojts n'ijxëm ko ja Tios Teety myooyë ja mëj'ajtën oyajtën, ko ja Tios Teety ja y'aaw y'ayuk y'ënäny: Ëjts ya'atë n'u'unk, mëti'ipës të nwin'ixyën.

¹⁸Ojts kë'ëm nmëto'owëmë ja ayuk mëti'ipë tso'onpën tsajpjotm, tam ënäty nyajpatëmë mëët ja Wintsën ma ja kënu'kxykyopkën.

¹⁹Yë'ë ya'atë aaw ayuk yajtëytyëjkëy mëti'ipë tëëyëp ja Tios ja kyäjpxynyajxpëtëjk nyikajpxtën ets tyam miitsëty të xymyëpëktë. Ya'atë aaw ayuk jëtu'un yë'ë tä tu'uk yë kutë'kxnën akootstuuy, koonëm xyiinyëty ets ja jaayxyëëw pyëtsëmëty mëti'ipë kyutë'kxëpën ja jot winma'any.

²⁰Yë'ë tim kopkpëky ko xyjyä'äkyukëtëty, ko nitu'uk ja Tios ja y'aaw y'ayuk kë'ëmwinma'any oy nkaja'akyujkëmëty.

²¹Jä'ä ko ka'ap ja kyäjpxynyajxpëtëjk ojts yë'ë tnikajpxtë mëti'ipë kë'ëm myääytyëp tyajtëpën, kënu'kxymyëk'ajtën ojts winma'any myo'ojëtë.