Read Biblia Mixe de Quetzaltepec 1 Juan 3 Bible Online

1 Juan 3 - Biblia Mixe de Quetzaltepec bible

1 Juan 3

¹Ixtë wi'ix ja Tios Teety mëj këjää të xytsyojkëmën ko të xy'u'unkniwa'anëmë. Paaty ka'ap xy'ixy'ajtëm ja ja'ay mëti'ipë tyuuntëpën ja yääyëpë naaxwiinyëtë kyixy nyäxyën, jä'ä ko ja Tios tka'ixy'atë.

²Mëku'uktëjkëty ninu'un miits ntsoktën njawëtën, Tios ëëts tyam xy'u'unk'ajtënëp. Oy nkanija'awëmë wi'ix ok nyajpaata'anëmën, tëë nnija'awëm ko ja Jesukristë myina'any jatëkok jëtu'un nëjkx n'awinpijtëmë tä yë'ëjën; jä'ä ko nëjkxëp n'ijxëmë wi'ix y'ixëtyën.

³Pën yë'ë y'a'ijxyp jyëjp'ijxyp, wa'ats nyäyaj'ityë, jëtu'un ijxtëm ja Jesukristë wya'atsëtyën.

⁴Pën pokytyuunp, ëxëëk winë tuny; jä'ä ko yë poky yë'ë ëxëëkpë tuktuump.

⁵Tëë miits xynyijawëtë ko ja Jesukristë, yë'ë të tniminy yaa naaxwiiny ets xyajpokywyatsmëty, yë'ë, ka'ap tii poky tmëëtëty.

⁶Paaty, pënjaty ijtëp mëët ja Kristë, ka'ap y'itë pokyjotm; e pën ijtp pokyjotm, ka'ap ja Kristë nijawë ets ka'ap t'ixy'äty.

⁷Miits, u'unk maayëty, këtii pën mnätyukwin'ëënëtëty; pën ja nipaye'eyën oypyë tyuunpy, wa'ats ja yajpaaty ijxtëm ja Jesukristë wya'atsëtyën.

⁸Pën xëmë pokytyuunp, ja mëjku'u jä'ä'ajtëp; jä'ä ko yë mëjku'u ojts tyajtso'ontä'äky yë pokytyu'unën. Paatykyëjxm ja Tios U'unk të myiny yaa naaxwiiny ets tyajkutëkooytya'aja'any tu'kë'ëyë ja mëjku'u ja tyuunk.

⁹Ka'ap pyokytyuny mëti'ipë ja Tios u'unk'ajtëpën, jä'ä ko tap nye'pnyjoty tmëët'aty ja juukyajtën mëti'ipë ja Tios yäjkpyën; ka'ap tjëkyepy pyokytyuun'ëtë'ëtsëty, jä'ä ko Tios u'unk'ajtëp.

¹⁰Nikëxë'kp ja ja'ay mëti'ipë ja Tios u'unk'ajtëpën ets mëti'ipë ja mëjku'u u'unk'ajtëpën. Pën ja oypyë kyatuumpyën ëkë ka'ap ja myëku'uk ttsoky tjawë, ka'ap ja Tios y'u'unk'atyë.

¹¹Yë'ë ya'atë yë Tios y'aaw'ajtyp y'ayuk'ajtyp mëti'ipë ojts miits ëka'any xymyëtowtën, ko nätsyojkëmëty nixim niyam.

¹²Ka'ap jëtu'un nja'ay'ajtmëty ijxtëm ja Cainkën, mëti'ipë ijty ja mëjku'u ja'ay'ajtëpën ets ja y'uty tyaj'o'ky. ¿Tii ko ojts tyaj'ooky ja Caín ja y'uty? Jä'ä ko ka'ap y'oyëty mëti'ipë tyuunën, yë'ë oy mëti'ipë ja y'uty tyuunën.

¹³Mëku'uktëjkëty, këtii xymyëkjawëtë ko mkatsokëtë mëti'ipë kyuuyjyuuky'ajtëpën ja naaxwiinyëtë winma'any.

¹⁴Nnija'awëm ëëtsajtëm ko nmëët'ajtëm ja xëmëkyëjxmëpë ja juukyajtën, jä'äkyëjxm ko nätsyojkëm nixim niyam. Pën ja myëku'uk kyatsojkpy, o'kën kyë'ëjotm ja y'ity.

¹⁵Pën ja myëku'uk kyatsojkpy kyame'kxyp, jëtu'un ja tpaaty ijxtëm jeexyë yaja'ay'ookyën, miits mnija'awëtëp ko yë yaja'ay'o'kpë ka'ap tmëëtëty ja xëmëkyëjxmëpë ja juukyajtën.

¹⁶Nnija'awëm wi'ix ja Jesukristë xytsyojkëmën ëmuumtu'ukjot, paaty të xykyu'o'këmë. Näyjyëtu'un ëëts nkë'ëyajkmëty ja njuukyajtën'ajtëm ets nku'o'këmëty ja nmëku'uk'ajtëmë.

¹⁷Ko pën jam tii tmëëtëty winë ets ka'ap tmo'oy ja myëku'uk, oy tjatim'ixy ko ja myëku'uk tii tyajm'ëmaatyä'äky, ¿wi'ix y'ëna'ana'any ko ja Tios tsoky?

¹⁸Miitsëty, u'unk maayëty, yaj'ixëtë ja nätsyok näjyawë, këtii je'eyë nëkoo m'ëna'antëty ko ja mmëku'uk xytsyoktë.

¹⁹Jëtu'un ëëtsajtëm nnija'awëmë ko ja Tios xyjyä'ä''ajtëmë ets akujk jotkujk n'ijtmëty Tios wyintum

²⁰pën nja'awëm jootjoty winma'anyjoty ko ka'ap tii oy ntu'unëmë, Tios wäänë mëj yë'ë këtiinëm ja njoot'ajt nwinma'any'ajtëmë, wa'ats nijawë tii ënäty oy nkatu'unëm.

²¹Mëku'uktëjkëty, ko ja njoot'ajt nwinma'any'ajtëm ëmuumtu'uk npëjktakmëty jam ma Tiosën, ka'ap ntsë'këmëty Tios wyintum;

²²ets yë'ë xymyo'oja'anëm winë tii ënäty n'amëto'ow npëjktso'owëmën, jä'ä ko npatu'unëm ënäty ja y'ënä'ämën ijxtëm tsokyën.

²³Yë'ë ni'ik nyi'ënä'ämëp ets ja y'u'unk Jesukristë nmëpëjkmëty ets ko nixim niyam nätsyojkëmëty ijxtëm ja Jesukristë të tni'ënä'ämën.

²⁴Pën ja y'ënä'ämën pyatuunëp, yë'ë ënäty ja Tios mëët tu'ukyë y'ity. Ja Kënu'kxymyëkajtën mëti'ipë të xymyo'oyëmën, yë'ë xytyuknija'awëm ko yë'ë mëët tu'ukyë nyajpatëmë.