Read Biblia Mixe de Quetzaltepec Jueces 10 Bible Online

Jueces 10 - Biblia Mixe de Quetzaltepec bible

Jueces 10

¹Ko ojts y'o'knë yë Abimélec, ënät jam tu'uk pyëtsiimy yë ja'ay mëti'ipë xyëëwajtypyën Tolá, yë'ë myaank yë Puá, y'ok'u'unk yë Dodó; ojts tnitsiptuny yë Israel kajpn ets tyajtsoky. Jam ijty tsyëënë Samir ma ja kopkën mëti'ipë nyitënääpyën yë Efraín ja'ay.

²Tolá jä'ä ojts jam y'ëne'emy ma Israel kajpnën i'px tëkëëk jëmëjt, jëtu'un ojts y'ooky ets jam nyaaxtëjkëy Samir.

³Ok pyëti'ky yë Jair, jam kyukajpnëty Galaad; jä'ä ojts y'ëne'emy ma Israel kajpnën i'px mäjtsk jëmëjt.

⁴Jair jä'ä myaank y'ijty ni''i'px majk, nitu'ukjaty aak jëyujkëjxy ijty jyëtitë, ojts yë kyajpnëty tyaj'ixta'aktë këëktu'uk. Ja ni''i'px majkpë ja kajpn mëti'ipë ojts tyajkojtën tyampaat yë'ë yë Jair yajtukjä'ätijp.

⁵Ko ojts yë Jair y'o'knë, jam nyaaxtëjkëy Camón.

⁶E yë Israel ja'ayëty ojts jatëkok t'ëxmatstë ja Wintsën ja nyë'ë'aaw tyu'u'aaw, jä'ä ojts tpanëjkxtëkëtë ja Baal ets ja Astarté, ka'apë tyiosëtyën mëti'ipë yë Siria ja'ayëty y'ëwtajtëpën; näjyëtu'un yë Sidónja'ayëty, Moab ja'ayëty, Amón ja'ayëty ets filistejë ja'ayëty. Yë Israel ja'ayëty ojts t'ëxmajtsnëtë Wintsën ets ka'ap ojts t'ëkmëjja'awënëtë.

⁷Paatykyëjxm yë Wintsën ojts tyukjot'anpëkëtë ets y'ëxmajtsëtë ma filistejë ja'ayëty ets ma Amón ja'ayëtyën.

⁸Yë Amón ja'ayëty ets filistejë ja'ayëty ëxëëk tuuntë yë Israel ja'ayëty mëti'ipë jam tsënaaytyëpën Galaad, jamtsow awinmtsow ma Jordán nëë jyënäkyën, ma nyaaxjotëtyën yë Amor ja'ayëty.

⁹Yë Amón ja'ayëty ojts tninaxtë yë Jordán mëjnëë ets mëët tsyiptuna'antë ja Judá ja jyä'äyëty, ja Benjamín ja jyä'äyëty ets ja Efraín ja jyä'äyëty; ënät yë Israel jyä'äyëty mëkjotmayjoty ojts nyäyjyawëtë.

¹⁰Paatykyëjxm ojts ja putëjkën t'amëtowtë ma Tiosën ets t'ënëmaaytyë: Wintsën ëëts nja'awëtyëpës ko tëë myajmëtëkoy mëët ko të myaj'ëxmatsy etsës ja wiink tios të npanëjkxtëkëtë.

¹¹Ets ja Wintsën Tios y'ëtsowëtë: Miitsëty ojts ëxëëk mtunëtë yë Egiptë ja'ayëty, Amor ja'ayëty, Amón ja'ayëty ets filistejë ja'ayëty.

¹²Sidónja'ayëty, Amalec ja'ayëty ets Madián ja'ayëty; e koos ijty miits xymyëkajpxtë ënätyë nyajtso'oktë.

¹³E oy njaputëjkëtyë mëjwiin këjää miitsëty ojtsës xy'ëxmatstë ets xypyanëjkxtëjkëtyë wiink tios ets ënät tyam xytsyoktë ets miits nyajtso'oktëtyë, ka'ap maa jëtu'unpë.

¹⁴Nëjkx yë'ë amëtowtë yë putëjkën ja tiosëty mëti'ipë miits kë'ëm të xywyin'ixtën. Wä'än yë'ë myajtso'okëtë ma tyam amaayjoty jotmayjoty myajpaatën.

¹⁵Tääts ja Israel ja'ayëty t'ëtsoowinpijtë ja Wintsën: Poky ëëts të ntuntë mëjwiin këjää, mijts ix wi'ixës xytyuna'antë, je'eyëp ko tun mëyajtën yajtsoktëkës tyam.

¹⁶Ënät ja Israel ja'ayëty ojts tyajma'ta'atë ets tukpu'ujëtyääytyë ja wiink tios, ets ja Wintsën t'ënëmaaytyë ko yë'ë t'ëwtata'antë tu'ukyë, ko jëtu'un yë Tios t'ijxy ka'ap ojts jeky tmëmëtä'äky ets ja Israel ja'ayëty y'ëyowtëty.

¹⁷Nëjkxëp tëkok ja xëëw jëmëjt tpaaty ets ja Amón ja'ayëty jam nyäpyëjktakëtë Galaad ets ja Israel ja'ayëty ojts näjyëtu'un nyäpyëjkta'akëtë jam Mizpá.

¹⁸Ja Israel ja'ayëty jampë ënäty tsyëënëtën Galaad ets ja mëjja'aytyëjk ets tëkokyëty ja ja'ayëty ojts tkajpxmuktë pën ja tsip nyikopk'atëpën ma ja Amón ja'ayëty mëët tsyiptuna'antën, yë'ë wë'ëmëp ënä'ämpë ma tëkokyë ja ja'ayëtyën jampë tsyëënëtën Galaad.