Read Biblia Mixe de Quetzaltepec Jueces 12 Bible Online

Jueces 12 - Biblia Mixe de Quetzaltepec bible

Jueces 12

¹Ënät ja Efraín ja jyä'äyëty ojts nyäyajmukëtë ets tsyo'ontë, nyinajxtë yë Jordán mëjnëë, jamtsow ënäty nyëjkxtë Zafón, ko jam jyajtë, ënät ojts t'ënëëmëtë ja Jefté: ¿Wi'ix koos të xykyatuk'ëwaanëtë, ko të mnëjkxy tsiptuunpë mëët yë Amón ja'ayëty, tëëyëp mpanëjkxtë? E tyam mëët ko ka'ap të xynyikäjpxy myajnino'okëp ënät mëët yë mtëjk.

²Tä ja Jefté y'ëtsooy: Ëëtsëty mëët yë nja'ayëtyës, tëëjës yë tsip nmëët'atën ma Amón ja'ayëtyën, ko të jyëtu'un'aty miitsëty ojts mjayajmëkajpxtë, e ka'ap miintë etsës jeexyë xykyuwantë.

³E koos n'ijxy miitsëty ka'ap maa mkëxë'ëktë, ënätës ojts kë'ëm ntimnyijkxy tsiptuunpë ma ja Amón ja'ayëtyën, e yë Wintsën ojtsës xyajmëtä'äky. ¿E miitsëty wi'ix ko ënät tyam mintë ets je'eyë mtsip'ixta'atë?

⁴Ënät ja Jefté tyajmujky ja ja'ayëty jampë ënäty tsyëënëtën Galaad ets tsyiptuuny mëët yë Efraín ja'ayëty. Jefté ojts myëtä'äky. Yë Efraín yë jyä'äyëty jëtu'un ënäty y'ëna'antë ko ja Galaad ja'ayëty mëti'ipë jam tsënaaytyëpën ma Efraín mëët yë Manasés nyäpyäätyë, ka'ap ënäty mëët yë Efraín ja'ay y'ëknäy'oyjya'awënëtë.

⁵Yë Galaad ja'ayëty yë'ë ojts tniwa'aktë ja ta'akkam mëti'ipë jamën nëë''ëkë'ëm ma Jordán nëëjën, tääpë ta'akkam yë'ë ijty nyitënaaytyëp yë Efraín yë jyä'äyëty. Paatykyëjxm ko ja Efraín ja'ayëty jam kyäktë tsipjotm ets jyanaxantë, jëyëjp tyajtëëwtë, ¿mijts yë'ë mja'ay'ajtëp yë Efrainkë? E ko y'ëtsoy ka'ap,

⁶tääts t'ëëëmëtë ëna'ants: Shibolet, e ko oy tkakäjpxy ets y'ënä'äny: Sibolet, ënätyë tyaj'ooktë jämyë joyjotm nëëpë'am ma ja Jordán nëë jyënäkyën. Jä'ä xëëw jä'ä jëmëjt yë Efraín yë jyä'äyëty ojts y'ooktë wëxtyikxy mäjtsk mil.

⁷Jefté tëtujk jëmëjt ojts y'ity tsipkop ma ojts twinwoyën yë tsip ko yë Israel ja'ayëty tsyippatë. Ko y'o'ky jam tyajnaaxtëjkëtyë Galaad, ma myëxu'unk'ajtyën.

⁸Ko yë Jefté y'o'ky, yë'ë ojts tu'uwinye'ey yë Israel kajpn ma tsyiptuunyën tu'uk yë ja'ay mëti'ipë xyëëwajtypyën Ibsán, jam kyukajpnëty Belén.

⁹Jä'ä myaank y'ijty ni'i'pxmajk ets nyëëx näjyëtu'un. Ya'atë ëna'këty aakyë'ë ojts tpëktë jaaypyo'kxyjyä'äy. Ibsán jä'ä ojts tsip kopk y'ity jam ma Israel kajpnën wëxtujk jëmëjt.

¹⁰Ko y'o'ky jam tyajnaaxtëjkëtyë Belén.

¹¹Ko yë'ë y'o'ky, yë'ë ojts tyëkë Elón, jä'ä ojts tsyipkopk'aty majk jëmëjt ma Israel kajpnën,

¹²ko yë'ë y'o'ky jam tyajnaaxtëjkëtyë Aialón, ma ja jyä'äy ja naaxjotmën.

¹³Ko yë'ë y'o'ky yë'ë ojts tyëkë yë Abdón, yë myaank yë Hilel, jampë kyukajpnëty Pirtón, jä'ä ojts tyipkopk'aty

¹⁴tuktujk jëmëjt. Abdón jä'ä y'ijty y'ëna'k niwëxtyikxy, ets yë'ë y'okmaank ni''i'px majk; tääpë y'ok'ëna'këty aak kruktskëjxy ijty jyëtitë.

¹⁵Ko y'o'ky jam tyajnaaxtëjkëtyë Piratón ma ja Efraín ja nyaax kyajpnën, ma ja kopkjot mëti'ipë xyëëwajtypyën Amalec.