Read Biblia Mixe de Quetzaltepec Jueces 15 Bible Online

Jueces 15 - Biblia Mixe de Quetzaltepec bible

Jueces 15

¹Jëtu'un nyäjxy ja xëëw jëmëjt, e jää ma ënäty të myëjaawta'ayën ja tsajpmok, jä'ä xëëw ojts nyijkxy yë Sansón jam ma ja tyo'oxytyëjk ja kyajpnën ets t'ixa'any. Ko jam jyä'äjty tä y'ënäny: ¿Jyëkyejpyës naxëtyë? Nto'oxytyëjkës n'ixäämpy jap ma tyëkotën. Ja myë't ka'ap ojts yajnaxyë,

²je'eyë ojts y'ënë'ëmxëty: Oy, ¿yë'ë mnimiinpyë? Ëjts tyaajës n'ënaanpë ko ka'apën ntij xy'uktsojknë ja nnëëxës, paatyës të nmo'oy ja mmëku'uk mëti'ipë mëët oy mnäjyawëtyën. E tyam yë y'uty yë'ë nmo'ojëty. Jaak'oy ni'ik këtiinëm jyëtu'unëty yë tsyë'ë, yë'ë wow ets xymyëëtsëënëty.

³Tä ja Sansón y'ëtsooy: Tyam ka'apës ëjts npoky'atëty pën ëxëëkës yë filistejë ja'ayëty ntuny.

⁴Ënät ojts nyijkxy jam kamjotm ets twinmajtsmujky tëkëëk mëko'px yë wax. Mäjtskjaty ojts t'atsuummuky ets tuk'ixtsu'umëtyääy yë ujtstë'ëts ma pyi'ixyëtyën.

⁵Ënät tjëën'ixko'onëy ets tuk'ixtë'ëyëtyääy ja wax jam kamjotm ma ënäty ja filistejë ja'ayëty ja pyëjktä'äky tyaj'itën. Ko ja wax tmëpëyë'ktso'ontë ja jëën wa'ats tno'ktaaytyë ja tsajpmok mëti'ipë ënäty jam nipëjkpety ijtpën ets mëti'ipë ënäty ka'ap yajwixynyëmën; yë'ëpaat ojts tyooytyä'äy yë tsatsymkyam ets olivë kam.

⁶Ko yë filistejë ja'ayëty t'ijxtë, ënät ojts tpaye'eytya'aktë pën ënäty të y'ëti'itsyën. Tääts tnija'awëtyë ko yë'ë Sansón, jä'äkyëjxm ko ënäty ja myë't ja tyo'oxytyëjk të pyëjkëty ets ënäty të yajmo'oy ja myëku'uk mëti'ipë mëët oy nyäjyawëtyën. Ënät ojts tninëjkxtë ja Sansón ja myë't ets tyajnitooytyë mëët tëkokyë ja y'u'unk y'ëna'k, yë'ëpaat ja to'oxytyëjk mëti'ipë ënäty ja Sansón të tjapëkyën.

⁷Ënät ja Sansón y'ënäny: Tyam miits yajxon ntimy'ënëëmëtë ko ka'apës yë po'kxën n'ixëty koonëm n'ijxnajxta'atëty mëët mëti'ipë të xytyuntën.

⁸Ënät ojts tyëkë tsiptuunpë mëët yë'ëjëty, nitu'uk yë ja'ay ojts tkayajwë'ëmy. Ko jëtu'un kyijxy nyäjxy ja tsip, ënät tyimkeky, tyimtso'ony jampë ja itjotmën ets ojts nyijkxy ma ja aankën mëti'ipë yajtijpën Etam.

⁹Yë filistejë ja'ayëty mëk ojts tjawëtë ya'atë ëyo'on, paaty tyu'ukmujktë ets tsyo'ontë, jyajtë jam ma Judá nyaaxjotmën, jam nyäpyëjktakëtë ets tyajwintujktë ja it naaxwiinyëtë jampaat Lehi.

¹⁰Ënät ja Judá ja'ayëty yajtëëwëtë: ¿Tii ko miits mintë tsiptuunpë mëët ëëtsëty? Tääts y'ëtsoowtë: Yë'ëjës nimiintëp yë Sansón etsës nmatsa'antë ets tkujuyëty ja npëjktä'äkyëtyës mëti'ipë të tyajwintëkoyën.

¹¹Ko jëtu'un tmëtoowtë, ënät ojts yë Judá jyä'äy tsyoontë nitëkëëk mil ets nyëjkxtë jam Etam ma ja aankën mëti'ipë ja Sansón tyuktsëna'ayëpën, ko jam jya'ajtë tä ja Sansón t'ënëmaaytyë: Tii këtiijën xytyimnijawë ko yë filistejë ja'ayëty mëk ni'ikëty këtiinëm ëëts'ajtëmë. ¿Wi'ix ko nëkoo xymyëma'ayëpë etsës je'eyë tsipjoty xypyëjkta'aktës? Ënät ja Sansón y'ëtsooy: Ëjts ka'apës maa yë'ë nmëtëkoytyë, yi'iyës ntukukëpäjtëp ijxtëmës të xytyimtuntën.

¹²Tä y'ëtsoowtë yë'ëjëty: E ëëtsëty paatykyëjxm të nmintës ets mijts nmatsa'antë ets nkë'ëyaka'antë ma filistejë ja'ayëtyën. Tää yë Sansón y'ëtsoowinpijty: Nikajpxtë yajxon Tios wintum ko miitsëty ka'ap xyaj'ooka'antës.

¹³Ënät y'ëtsoowtë: Ka'ap, ka'ap nyaj'ooka'antë, je'eyë nmatsa'antë ets nkë'ëyaka'antë ma yë'ë filistejë ja'ayëtyën. Ënät ojts tkë'ëtsumtë jap ma aankën ma ënäty yu'utsy me'ty y'ityën.

¹⁴Ko jam jyajtë Lehi, ënät yë filistejë ja'ayëty tyëjkëtyë yaxpë jojkpë mëët yë xoontakën. E yë Sansón ënätyë ojts yë Wintsën yë myëk'ajtën tyukëtä'äkyë ets jëtu'unyë tnujktaktaay ja tejpxy tä witooyën ma kyë'ë tyekyën.

¹⁵Ënät jam tkajpë'ky tu'uk yë pajk, yë krukts apak mëti'ipë ënäty ka'ap pyu'utynyëmën ets mëët tyaj'o'ky nitu'kmil yë filistejë ja'ayëty.

¹⁶Tääts y'ënäny: Mëët tu'uk yë krukts apajk, tu'k'it mäjtsk'it ojts nyajnipetyës; mëët tu'uk ja krukts apajk nitu'kmilës yë ja'ay të nyaj'ooky.

¹⁷Ko kyajpxtaay tää ojts t'ijxjëpijpkojnë ja pajk, paatykyëjxm ojts tampë it naaxwiinyëtë xyëëwpety Ramat-lehi.

¹⁸E yë Sansón yajxon ënäty tsyëtsënë, ënät ojts tmëkäjpxy yë Wintsën ets t'ënëmaay: ¿Wintsën wi'ixpëmës nja'awëkyëtä'äky koos mijts të xyajmëtä'äky maas të ntsippaatyën, e ka'ap yowë tyim'oy'ajnë etsës ënät mijts tyam xyaj'ookëty mëët yë nëëtëëtsë ma ya'atë ëxëëkja'ayëtyën yë kyë'ë y'aawëtyën ka'apë m'ëwtatyën?

¹⁹Paatykyëjxm ojts yë Tios jam tu'uk yë nëëjut tyaj'ëwa'atsy Lehi ets Sansón nyëë'uky, ko nyëë'uktaay janty ku'uxyë ojts nyäjyawëty; paaty ja nëëjut ojts xyëëpety En-hakore, ja jampë tyampaat yajpaatyën Lehi.

²⁰Sansón jä'ä ojts y'ëne'emy ets tnitsiptuuny yë Israel kajpn i'px jëmëjt, jää xëëw ma ënäty yë Israel ja'ayëty y'ënä'ämtën jam ma ja jampë it naaxwiinyëtën.