Read Biblia Mixe de Quetzaltepec Jueces 17 Bible Online

Jueces 17 - Biblia Mixe de Quetzaltepec bible

Jueces 17

¹Jam ma ja kopkjotmën mëti'ipë yë Efraín jyä'äy nyitënääpyën, jam ijty tu'uk yë ja'ay tsyëënë jä'ä xyëëwajtyp Micaías.

²Ojts ja tyaak tuk'ëwaanë ets t'ënëmaay: Nanë, ja meeny mëti'ipë m'antijpyën ko tëë yajmeetsy ets mëët yë'ëkyëjxn ja mä'tspë të xypyoky. Ja poop pujxn meeny mëti'ipë m'antijpyën, ëjtsës yë nmä'ts, e tyamts jatëkok nmo'oy, jä'ä ko okës të nijawë ko ja Wintsën ënäty mtuknipëjkë'këp ets tu'uk xyaj'oyëja'any yë awinax oytyuny mëët yë poop pujxn. Ko ja poop pujxn meeny tkë'ëyäjky, ënät ja tyaak janty jotkujk nyäjya'awëyë ets mëk yujk'ënany: Tios mkënu'kxëtëp mëjwiin këjää u'unk maay.

⁴Ko yë Micaías tmooy yë tyaak ja poop pujxn meeny, yë tyaak ojts tukë'ëtëky mäjtsk mëko'px ja poop pujxn meeny, tu'uk yë poop pujxn'oytyuunpë ets tyajkojëty ja awinax oytyuny yajxon ets tuknikoyëty yë poop pujxn, ko kyojtaay jap ojts tpëjktä'äky ma ja Micaías ja tyëjkën.

⁵Micaías myëët'ajtyp ijty tu'uk tëjk ma Tios t'ëwtatyën. Ojts tu'uk yë wit t'oytyuny mëti'ipë ja teety pyëjktaktëpën, kanaakpëky yë tios tyajmëjnajxy, tu'uk ja myaank tuknipëjky ets tyeety'atëty.

⁶E tëëyëp yë Israel ja'ayëty ka'ap ënäty yë yajkutujkpë tmëët'atënëm, paaty ijxtëm ja wyinma'any timpyaatën jëtu'un winë tuntë.

⁷Jam Belén jam ijty tu'uk tsyëënë yujkyeeky'ëna'k, Judá jyä'äy, Leví y'u'unk y'ok.

⁸Ya'atë yujkyeeky'ëna'k ojts jam tsyoony Belén ets ojts nyijkxy wiinktsow, t'ixta'ay ma y'ëktsënaaytyaknpëkëty. Ko jam jyä'äjty ma kopkjotmën mëti'ipë yë Efraín nyitënääpyën, jam ojts jyajtä'äky ma ja Micaías ja tyëjkën.

⁹Ets yajtëëwë ¿Maaxëtëm mtsoony? Jam Belén. Jëtu'un y'ëtsooy ja yujkyeeky'ëna'k. Leví ja'ayës, yë'ëjës yë it naaxwiinyëtë n'ixtääpy maas n'ëk tsënaaytyaknpëkëty.

¹⁰Yaa mtsëënëty, mëët ëëtsëty. Jëtu'un ja Micaías y'ënäny, ets mijts yaa mtunëty teety ets jëtu'un njawëty tä jeexyë mijts nntimtyeety'ätyën. Nmëjuyëp näjyëtu'un, majk yë poop pujxn meeny ntukmëjuyëty tu'kjëmëjtpë, ëpëky nyajkay nyaj'uukëty ets nmo'ojëty yë mwit mtujkxy.

¹¹Ja Leví ja'ay ojts tkupëky ko jam wyë'ëma'any ma ja Micaías ja tyëjkën tsënääpyë ets jëtu'un yë Micaías jya'awëyë tä jeexyë y'u'unk'atyë myaank'atyën.

¹²Micaías ojts yajnaxyë teety ets jëtu'un ojts jam wyi'imy tsënääpyë.

¹³Tääts ja Micaías ojts myäy tyäjy ko ja jyëën tyëjk ets ja jyuukyajtën jëjp'ixy ënäty tmëët'ajnë ja Tios ja kyënu'kxën, jä'ä ko yë'ë ënäty jam teety'ajtp ma ja tyëjkën tu'uk yë Leví ja'ay.