Read Biblia Mixe de Quetzaltepec Jueces 18 Bible Online

Jueces 18 - Biblia Mixe de Quetzaltepec bible

Jueces 18

¹Jä'ä xëëw jä'ä jëmëjt, yë Israel ja'ayëty ka'ap ënäty yë yajkutujkpë tmëët'atënëm; yë Dan yë jyä'äy ka'ap ënäty yë nyaax kyam tpaatënën ma tsyënaaytya'aktëtyën; paaty yë'ëjëty jëtu'unyë ënäty jyëtitënëm, t'ixta'atë maa y'ëkwë'ëmtëty.

²Paatykyëjxm yë ja'ayëty mëti'ipë Dan jyä'äy'äjtypyën, jampë yajpaatën Sorá ets Estaol. Nimëkoxk tkäjxtë myëku'uk ets nëjkx t'ixtë tuntë ja it naaxwiinyëtë, tyaapë nimëkoxpë ijxpë tuunpëty jamtsow ojts nyëjkxtë ma kopkjotmën mëti'ipë yë Efraín ja jyä'äy nyitënääpyën ets jya'ajtaktë ma Micaías yë tyëjkën, jamts ojts ja kootsajtën tyajnaxtë.

³E jam ënäty yajpaatë ma ja Micaías ja tyëjkën ko tyo'kmëtoowtë wi'ix kyäjpxyën ja Leví ja'ay, ënät tyajtëëwtë: ¿Pën jëtu'un yaa të myajminyë? ¿Wi'ix ko yaa myajpaaty? ¿Tiitën yaa m'ixtääpy?

⁴Ja Leví ja'ay wa'ats tnimëtyaktaay wi'ix ënäty ja Micaías oy të y'ëxajëtyën ets wi'ix ënäty të tunyën mëët ja käjpxytyu'unën ets jam tyeety'atëty ma ja tyëjkën.

⁵Ënät y'ënantë: Ëk mëkajpx ja Tios ets yajnijawëty pën oy wyimpëtsëma'any jyëjpëtsëma'any ëëts ja në'ë ntu'ujëty.

⁶Ets ja teety y'ëtsoowëtë mëti'ipë Leví ja'ayën: Nëjkxtë akujk jotkujk, yë Wintsën yë'ë mkëwent'atanëtëp oy maa mja'tëty.

⁷Ko jam tsyo'ontë ja nimëkoxpë ja ja'ayëty mëti'ipë ijxtëp tuuntëpën, jam jyajtë ma txëëwatyën Lais. Ma ya'atë kajpnën ja ja'ayëty akujk jotkujk ënäty jam tsyëënëtë, jëtu'un tä jyä'äy'atën yë Sidónja'ay ja'ayëty, akujk jotkujk, ka'ap pën y'atsipëtë ets ka'ap tii tyëkoy'ajtxëtë. Jëkäm ënäty yajpaatë ets ka'ap pën mëët nyämyäyëtë.

⁸Ënät ojts ja wëxtujkpë ja ja'ayëty wyimpijnëtë mëti'ipë të y'otstën ijxpë tuunpë ets jyajtë jam jatëkok Estaol ets Sorá, ma ja myëku'uktëjk yajpatën ets yajtëëwtë: ¿Wi'ix të mjat të mkëpätë? Ets yë'ë y'ëtsoowtë:

⁹Tëës ojts jam njantyjyëtitë ma tääpë it naaxwiinyëtën maas ojts xykyäxtën. Tääpë it naaxwiinyëtë janty'oy yë'ë. Paaty nipëjktaakëtë ets mnëjkxtëty, niwa'aktë tääpë it naaxwiinyëtë. Këtii ni'ikyë mnaaxwäätstë nëjkxtë jëtu'un.

¹⁰Ko jam mja'tëty tääts xy'ixtëty ko tääpë ja'ayëty akujk jotkujk yajpaatë, ma tääpë naax kamën ka'ap jam tii tyëkoy'äty. Tios yë'ë mmo'ojanëtëp tääpë it naaxwiinyëtë.

¹¹Tä nitëtujk mëko'px tsyo'ontë yë Dan yë jyä'äy jam Sorá ets Estaol. Yajxon jëjp'ixy ets nipëjktaakë tsyo'ontë.

¹²Ënät jyajtë jam ma ja Judá ja jyä'äy ja nyaaxjotmën ets nyäpyëjktakëtë jam, a'oytsyow ma Quiriat-jearim yajpaatyën mëti'ipë tyam yajtijpën Dan y'ijtakn.

¹³Jamts tsyo'ontë ets ojts nyëjkxtë ma ja kopkjotmën mëti'ipë Efraín ja jyä'äy nyitënääpyën ets jam jyajtë ma ja Micaías ja tyëjkën.

¹⁴Ënät ja nimëkoxpë ja ja'ayëty y'ënantë mëti'ipë ënäty ojts të y'ixtë tyuntën jam Lais: ¿Mnija'awëtyëpë? ma ya'atë tëjkën tap tu'uk yë Efod yajpaaty ets kanaak yë tios, nän tap tu'uk yë kepy tsye'ëts mëti'ipë nikoyën mëët yë poop pujxn ¿Wi'ix mëpaat n'ëktu'unëmë?

¹⁵Tä ja ja'ayëty tpuwa'ktutë ja myëku'ukëty, ja nimëkoxpë mëti'ipë ënäty ojts të y'ixtë tyuntën ets nyëjkxtë jam ma ja Leví ja'ay y'ityën, jam ma ja Micaías ja tyëjkën ets ojts tkajpxpo'kxtë.

¹⁶E ja nitëtujk mëko'pxpë ja tsiptuunpë mëti'ipë ja Dan jyä'äy'äjtypyën jam nyäpyëjktakëtë tëjk'ëkë'ëm, jëjp'ixy jam tyim'itë mëët ja mëti'ipë myëtsiptuuntëpën.

¹⁷Ënät ja nimëkoxpë ja ja'ayëty tyëjkëtyë tëkoty mëti'ipë ënäty të y'otstën ijxpë tuunpë ets tkoonkaktë ja kepy tsye'ëts mëti'ipë nikoyën mëët ja poop pujxn ets tpëjkäktë näjyëtu'un ja Efod, tääts ja tsaapotsyëty mëti'ipë ënäty ja Micaías ja y'u'unk tyo'oxytyëjk myëët'ajtëpën ets wintsë'ëkë tyaj'itë, e ja teety jam y'ëwxity tëjk'ëkë'ëm mëët nitëtujk mëko'px ja tsiptuunpë.

¹⁸Ko ja teety t'ijxy ko nimëkoxk ja ja'ayëty tyëjktëkëtë ma ja Micaías ja tyëjkën ets toontyë tmä'tstë ja kepy tsyetsy mëti'ipë poop pujxn nikoyën ets ja kejky yä'äp mëët ja naaxpotsy mëti'ipë wintsë'ëkë yaj'ijtëpën, ënät y'ënäny: ¿Miitsëty tiitën mtuuntëp?

¹⁹Tä yaj'ëtsooy: Mijts amonyëmës it, je'eyë pamiintëkës, ntsojktëpës ets mijts mteety'atëty ma ëëtsëtyën, jëtu'un myajjawëty tä ëëts yë nkë'ëmteetyëtyën. ¿Këtiimës xy'oyjyawë ko ni'ik oy ko tu'kkajpn yë Israel ja'ay xytyim'ënä'ämëty ma mteety'ätyën ets këtiinëm ko je'eyë tu'k'u'unk tu'k'ëna'kë?

²⁰Ja teety oy ojts ya'atë aaw ayuk tmëtoy, ënät ënätyë tpëjkë'ky ja kepy tsyetsy mëti'ipë ënäty nikoyën mëët ja poop pujxn ets ja wyit ets ja wiinkëtypë naaxpotsy mëti'ipë ja Micaías ja y'u'unk y'ëna'k y'u'unk tyo'oxytyëjk y'ëwtajtëpën ets tpatso'ony ja Dan ja jyä'äyëty.

²¹Tä twoowtso'ontaaytyë ja y'u'unk y'ëna'këty y'u'unk tyo'oxytyëjkëty ets ja jyëyujk tsyajpkaajëty, tsyajpaxëty kyupixynyëty.

²²Tëë ënäty këjää nyëjkxnëtë ko yë Micaías pyatso'onëtë mëët ja mayjyä'äy mëti'ipë myëtëjk'ajtypyën.

²³Ko yë Dan jyä'äy tmëtoowtë ja'ay jyänty ya'ax jyänty joktë, ënät tniwinpijtë ja Micaías ets tyajtëëwtë: ¿Tiitën mjajtëp? ¿Wi'ix ko myä'äxy mjoky?

²⁴Tääts ja Micaías y'ëtsooy: Wi'ix ko xymyëkä'äktë yë ntiosës mëti'ipës kë'ëm të n'oytyunyën ets näjyëtu'un xywyoowkä'äktë ja teety mëti'ipë jam tuunpën maas yë ntëjkën etsës jëtu'unyës xyajwë'ëmnëtë. ¿Ets ënät miits xyajtëwtës tiijësën xyjyajtp?

²⁵E ja Dan ja jyä'äyëty tyaa ojts y'ëtsowtë: Këtii nëkoo ëxaty mtimy'ëna'anëty ix nimay ëëtsëty, këtiipë pën nitu'uk jyoot'anpëkëty ets mijts m'ëk'o'knëty ets ka'ap myijtsëty atu'uk, näjyëtu'un yë m'u'unk m'ëna'k m'u'unk mto'oxytyëjk.

²⁶Ko yë Micaías t'ijx ko nimay ënätyëty ja Dan ja jyä'äy, ënät ojts amonyë tyimwinpijnë ma tyëjkën, e yë Dan yë jyä'äyëty ojtx ja tyu'u jatëkok tpëktë,

²⁷ojts tmënëjkxta'atë tëkokyë mëti'ipë ënäty yë Micaías kë'ëm të t'oytyunyën ets näjyëtu'un ja teety ets jam jyajtë Lais; ma tääpë kajpnën yë ja'ayëty mëti'ipë tsënaaytyëpën akujk jotkujk ënäty jam y'itë, nitii tkamay tkatajtë. Paatykyëjxm yë Dan yë jyä'äyëty tyaj'o'ktaaytyë ja jampë ja ja'ay tsyëënëtën ets tyo'kpujxtaaytyë ja ja'ayëty mëët ja yenypyujxn, ënät ja kajpn ojts tnino'oktë.

²⁸E ja kajpn jëkäm ënäty wyi'imy mëët yë Sidón ets ni pën mëët oy kyanäjyëkyäpëtë, paatykyëjxm ojts ka'ap ni pën pyutëkëtë. Ya'atë kajpn jam ënäty yajpaaty ma ja joyjotmën mëti'ipë yajtijpën Bet-rehob. Ok ojts ja Dan ja'ayëty jatëkok ja kajpn tkoj'oyëtë ma ojts tsyënaaytyaknpëktën.

²⁹Oyën ënäty tëëyëp yajtijy Lais, yë'ëjëty jä'ä ojts tyajxëëwpätë Dan, mëët ko ja y'aptëjk jëtu'un txëëwajty, ja myaank ja Israel.

³⁰Jamts ojts ja Dan ja'ayëty tpëjkta'aktë ja kepy tsyetsy mëti'ipë ënäty nikoyën mëët ja poop pujxn ets yë'ë t'ëwtata'antë, yë'ë ojts tyajteety'atë ja Jonatán, yë myaank yë Guersón, yë y'ok'u'unk yë Moisés. Kom'ok yë Jonatán yë y'u'unk y'ëna'këty yë'ë ojts tyeety'atë ma ja Dan ja'ayëtyën, koonëm jatëkok jam yaj'ëxwojptë.

³¹Ma yë'ëjëtyën jam ojts ja Micaías ja kyepy tsyetsy jeky y'ity, mapaat ja Wintsën ja jyëën tyëjk yajpatyën jam Siló.