Read Biblia Mixe de Quetzaltepec Jueces 21 Bible Online

Jueces 21 - Biblia Mixe de Quetzaltepec bible

Jueces 21

¹Yë Israel ja'ayëty tëë ënäty jam tkajpxmuktë Mizpá ko ka'ap ja nyëëxëty tyaka'antë ma ja Benjamín ja'ayëtyën ets yë'ë mëët pyëktëty y'uuktëty.

²E ojts jatëkok jam myuktë Betel ets twinjëëy twinyaxtë ja Tios ets myoontë tyujktë jam tu'kxëëw koonëm tyajtsu'ujëtyë.

³Wintsën mëti'ipë y'ëwtajtëpën yë Israel ja'ayëty. ¿Tiikyëjxm jëtää koos jëtu'un o'ktëy njatë nkëpätë? tyam puwa'ats ëëts të nwë'ëmtë, ¿Tii ko jyëtu'unëty?

⁴Ko kyomjëpom'ajty janty tsojk ojts yë Israel ja'ayëty pyëtë'kojtë, tääts t'oytyuuntë tu'uk yë wintsë'këntyakn ma Wintsën ojts tmo'otën yë wintsë'kën nino'okpyë, ets mëët tyaj'apaatëja'antë ja nay'ëëw'oy näykyajpx'oyë.

⁵Ets aakyë'ë nyäyajtëëwëtë, ¿Ma ëëtsajtëmën, pën ka'ap të y'otsy jam Mizpá ma ja nätyu'ukmukë të y'ityën? Jam Mizpá tëë ënäty jam tkäjpxy'atë, ko pën të kya'otsyën ma ja nätyu'ukmukë të y'ityën yaj'ookantëp.

⁶Yë Israel ja'ayëty mëk ojts ok tjaja'awënëtë mëët ko ënäty jëtu'un të tyuny të jyätyën ma ja myëku'uktëjkëtyën Benjamín ja'ayëty ets y'ënantë: tyam tëë tu'uk ja nmëku'uk'ajtëmë yajëpëky ma ja Israel kajpnën.

⁷¿Tyam wi'ix ënät yë tyo'oxytyëjkëty npatmëty mëti'ipë të wyë'ëmtën? Ëëtsajtëm tëë yë Wintsën n'ënëma'ayëmë ko yë nnëëx'ajtëm ka'ap nkë'ëyaka'anëmë ma yë'ëjëtyën ets mëët pyëktëty y'uuktëty.

⁸¿Yaa ma ëëtsajtëmën jää jëtää pën mëti'ipë ka'ap të y'otsyën jam Mizpá Tioswintuuyë? Ënät ojts tja'amyätstë ko ja ja'ayëty mëti'ipë tsënaaytyëpën jam Jabés ma tnitänën yë Galaad, ka'ap y'ojtstë jam Mizpá ma ja nätyu'ukmukë y'ijtyën.

⁹Jää t'ijxtë ko ojts ja ja'ayxyëëw tkajpxnaxtë ka'ap ojts ni pën y'ëtsoy jampë kyukajpn'atën.

¹⁰Ënät ja naax kajpn tkejxy nimajkmäjtsk mil ja tsiptuunpëtëjk, aakyë'ë jotmëkëtypë, jam Jabés ets tkupujxtaaytyë ja ja'ayëty jampë tsyëënëtën mëët yë yenypyujxn, wä'än tyë'ëjëty mëjja'aypyë mutskja'aypyë ets ja to'oxy'ëna'këty mëti'ipë tëë ja ye'etyëjk tmëët'ajnëtën.

¹²Jam ma ja Jabés kajpnën, jä'ä ja to'oxy'ëna'k tpatë nimajktaxk mëko'px mëti'ipë ënäty ka'ap tmëëttsëënëtënëm ja ye'etyëjk ets tyajmiintë jam Siló, Canaán nyaaxjotm.

¹³Ënät ja mayjyä'äyëty ojts tnikäxëtë ja Benjamín ja'ayëty jampë ënäty yu'utsy yajpaatën tsaatunjotm jam Rimón ets myintëty tääts mëët tkajpx'oyëja'antë ja jëën tsip.

¹⁴Yë Benjamín ja'ayëty ojts jatëkok jyänty wyimpitë ets yajmooytyë ja tyo'oxtyëjkëty jampë ënäty ja Israel ja'ayëty të tyajtsoontën Jabés. E niwäänë ja to'oxytyëjkëty ka'ap ja Benjamín ja'ayëty nyikäkëtyääyëtë.

¹⁵Yë Israel ja'ayëty mëk ojts ja myëku'uk tjapa'ëyowtë, jä'ä ko ja Wintsën apuwa'ats ënäty të tyajwë'ëmy ja Israel ja'ayëty.

¹⁶Ënät ja mëjja'aytyëjk mëti'ipë nyikopk'ajtëpën ja naax kajpn, ojts aakyë'ë nyäyajtëwëtë: ¿Wi'ix ënät mpatmëty ja to'oxytyëjkëty mëti'ipë wyowtëpën yë Benjamín ja'ayëty ka'apë tyo'oxytyëjkëtyën, ix ja to'oxy'ëna'këty tëë y'o'kta'atë?

¹⁷Benjamín kopkpëky ko je'eyëm yajpaatëty ma nyaaxjotmëtyën, jä'ä ko nja'ay'ajtëmë yë'ëjëty, mëti'ipë të wyë'ëmtën juuky. Yë'ë jatëkok nimayëtëp këtiipë tu'uk yë Israel ja myaank kyutëkoyëty.

¹⁸E yë'ë tëy, ëëtsajtëm ka'ap tjëkyepy yë nëëx'ajtëmë nmo'omyëty ets mëët pyëktëty. Jä'ä ko tëë tu'ukyë nkäjpxy'ajtëmë Tios wintum ko ka'ap yë nnëëx'ajtëm ntukpëka'anëmë, jä'ä ko pën kyumëtoownajxyp ya'atë ja käjpxytyu'unën kopkpëky ko y'ookëty.

¹⁹E jamts Siló, winjëmëjt jam yë ja'ay xyëëwtuntë, ma tmëjjawëtën yë Wintsën Tios yë xyëëw, ya'atë kajpn jam yajpaaty anëkëjxmtsow ma Betel, a'oytsyow ma tu'ujën mëti'ipë tso'onpën Betel ets jyä'ty Siquem ets apa'tkë'ëmtsow ma ja it naaxwiinyëtë wyi'imyën mëti'ipë xyëëwajtypyën Leboná.

²⁰Ënät ja mëjja'aytyëjk mëti'ipë nyikopk'ajtëpën ja Israel kajpn ojts tkäjpxynyikäxtë ja Benjamín ja'ayëty ets t'ënëmaaytyë: Nëjkxtë jam Siló ets mnäyu'utsëtëty jam muum kamjotm ma tsatym kyamën jampë winkon yajpaatyën,

²¹ets jëjp'ixy mtimyajpaatëty. Ko ja to'oxy'ëna'këty pyëtsëmtëty äjtspë tu'këëyi'ik, ënät xynyipëtsëmtëty ënätyë ma jap yu'utsy myajpaatën ets xymyäätsëty këëktu'uk ets xymyënëjkxtëty ma ja mnaax mkajpnëtyën.

²²E pën miintëpts ja tyeety ëkë ja jyiiky myëku'uk ets jyoot'anpëktëty, je'eyë ëëts n'ënëëmëtëty: Tuntë mëyajtën, nmënu'kxtaktëp yam ets xypyokymyä'kxtëty, ëëts to'oxytyëjkëtën maa nkapatëtëpës mëti'ipë yë'ë pyëktëpën y'uuktëpën, mëët yë'ëkyëjxm ko ja tsip ëëts të nmëët'atë mëët yë Jabés ja'ayëty. E näjyëtu'un miitsëty, ka'ap kë'ëm të xykyë'ëyaktë ja mnëëxëty paaty ka'ap yowë maa myajmëtëkoytyë.

²³Ja Benjamín ja'ayëty ojts jëtu'un tjantytyuntë tä ënäty të yaj'ënëëmëtën, ojts tmäätstë këëktu'uk ja tyo'oxy'ëna'këty mëti'ipë pëtsëëmtën äjtspë tu'këëyi'ikyjäty. Jëtu'un'äämpy jatëkok wyimpijtë ma ja nyaax kyajpnëtyën ets ojts tkojtë jatëkok ja kyajpnëty ma tsyënaaytyaknpëjktën.

²⁴E ja nimaypyë ja Israel ja'ayëty ojts wyimpijnëtë ma ja nyaax kyajpnëtyën ets ma ja jyiiky myëku'ukëtyën, y'u'unk tyo'oxytyëjkëty.

²⁵Jä'ä xëëw jä'ä jëmëjt ka'anëm ënäty ma ja yajkutujkpë. Ja ja'ayëty jëtu'un ijty winë tuntë ijxtëm wyinma'anypyaatën.