Read Biblia Mixe de Quetzaltepec Jueces 3 Bible Online

Jueces 3 - Biblia Mixe de Quetzaltepec bible

Jueces 3

¹Ya'atëty ja kajpn mëti'ipë ojts ja Wintsën tyajwë'ëmyën ets yë'ë mëët twinma'any'ixa'any ja Israel ja'ayëty mëti'ipë ënäty ka'ap myintënëm naaxwiinyëtë ko yajnitsiptuuny ja it naaxwiinyëtë jam Canaán.

²Ya'atë ja kajpn mëti'ipë ojts ja Wintsën tyajwë'ëmyën ets ja ja'ay tnijawëtëty wi'ix mëpaat tsyiptuntën mëti'ipë ënäty ka'ap ja tsip të t'ixtën.

³Ojts wyë'ëmtë ja nimëkoxkpë ja filistejë ja'ayëty ja kajpnëty, ma ënäty tsyëënëtën ja Canaán ja'ayëty, sitonyë ja'ayëty ets Heve ja'ayëty, jampë tsyëënëtën Líbano kopkjotm, tso'ontä'äky jam ma ja kopkjot yajtijyën Baal-hermón ets jyä'ty ma yajtuknaxyën yë Hamat itjotm.

⁴Ya'atë naax kajpn paatykyëjxm ojts yë Wintsën tyajwë'ëmy ets yë'ë mëët t'ixmatsa'any ja Israel ja'ayëty wi'ix myäytyën tyajtën, pën pyatuuntëp ja ënä'ämën tëyajtën mëti'ipë ja Wintsën ënäty të tmo'oyën ja y'ap y'okëty mëët ja Moisés.

⁵Ja Israel ja'ayëty jëtu'un ojts jam ja jyuuky'ajtënëty tyajtso'onta'aktë tsyënaaymyuktë mëët ja Canaán ja'ayëty, Hit ja'ayëty, Amor ja'ayëty, Ferez ja'ayëty, Heve ja'ayëty ets Jebús ja'ayëty.

⁶E ja Israel ja'ayëty ja myaankëty ets ja nyëëxëty ojts mëët pyëjknëtë y'uknëtë ja ja'ay ja y'u'unk y'ëna'këty jampë yajpaatën ets yë'ë t'ëwtajtnëtë ja ka'apë tyiosëtyën mëti'ipë yë'ë y'ëwtajtëpën.

⁷Yë Israel ja'ayëty ka'ap ojts winë oy tuntë tkajpxtë Tios wintum ojts ja Wintsën tja'atyëkooynyëtë ets ojts t'ëwtajnëtë ja Baal ja y'awinax ets ja Astarté ja y'awinax.

⁸Paatykyëjxm yë Wintsën ojts tyukjoot'anpëkëtë ets kyë'ëyajkëtë ma ja Cusan-risataim, ja yajkutujkpë mëti'ipë jam ënä'ämpën Mesopotamia. Yë Israel ja'ayëty wëxtujk jëmëjt tmëtuuntë yë yajkutujkpë Cusan-risataim.

⁹Koonëm tmëpëjktsoowtë ja Wintsën ets ojts tu'uk yë ja'ay pyëtsimy mëti'ipë yajtsokëtën. Ja ja'ay mëti'ipë yajtsokëtën yë'ë xyëëwajt Otoniel, yë myaank yë Quenás yë y'uty yë Caleb.

¹⁰Ënät ja Wintsën ja myëk'ajtën y'oyajtën tuktëjkëy ja Otoniel ets ojts yë'ë tnitsiptuny yë Israel kajpn, ko ojts tnitsoony ja yajkutujkpë mëti'ipë xyëëwajtypyën Cusan-risataim. Tios ojts tu'ukyë tuk'ijxpety ets ojts yajmëtä'äkyë.

¹¹Ko ya'atë tyajkutëkooy jä'ä ojts yë Israel ja'ayëty jotkujk jyuuky'atë wëxtyikxy jyëmëjt. Ko yë Otoniel y'o'ky

¹²Ënät yë Israel ja'ayëty ojts jatëkok tpanëjkxtëkëtë ja ëxëëktu'un ëxëëkajpxën ets ja Wintsën jëtu'un tuk'ixtë, paatykyëjxm ojts tyukjoot'anpëkëtë ets tyajmëktäky ja yajkutujkpë Eglón, jampë y'ëne'emyën ma Moab kajpnën.

¹³Yë Eglón ojts mëët nyäpyikyë yë Amón ja'ayëty ets Amalec ja'ayëty ets ojts tukja'të yë Israel ja'ayëty ma ka'ap tyajmëtaktën ets ojts tpëjkëtë ja kyajpnëty mëti'ipë xyëëwajtypyën Palmeras.

¹⁴Majkmokx tëkëëk jëmëjt ojts yë Israel ja'ayëty tmëtuntë yë Eglón.

¹⁵Koonëm tmëpëjktsoowtë yë Tios ets ojts tu'uk jam pyëtsimy pën yajnitso'okëtëp. Ja ja'ay mëti'ipë ojts nyitsiptunëtën jä'ä xyëëwajt Ehud, anajny ijty tyony myätsy, yë'ë yë myaank yë Guerá, yë Benjamín yë jyä'äy. Tu'kxëëw tu'kjëmëjt ojts yë Israel ja'ayëty tkäxtë yë Ehud ma ja yajkutujkpë Eglónkën ets tmo'ojëty ja këpäjtën mëti'ipë ënäty të tyajmuktën kyajpnjotyëty.

¹⁶E ja Ehud ojts ja winma'any t'ijxta'ay, tu'uk ja yenypyujxn tyaj'o'oyëy mäjtsk'atu'umpë mye'eyëtyën, tu'kë'ënuxën y'ayenyëty, ënät ojts tpëjktä'äky wyëënkëjxy a'oytsyow ets y'ëxmotsjoty tkutijëy këtiipë yaj'ixëty.

¹⁷Ënät ojts tmënëjkxy ja këpäjtën jam ma ja yajkutujkpë Eglónkën. Yë Eglón jä'ä ënäty jyä'äy'äty janty ni'kx.

¹⁸Ko ja Ehud tukë'ëtëjkëy ja këpäjtën, ënät ojts jam tsyo'onë mëët ja mëti'ipë të pyaminëtën.

¹⁹E ko jam jyä'äjty Guilgal ma jam yë maytsyaapotsy yajpaatën, ënät yë Ehud wyimpijty ets ojts jatëkok nyijkxy ma jam yajpaatyën ja Eglón ets t'ënëmaay: Ayukës tu'uk nyajmiinpy ma mijtsën, ayu'utsyë ntuk'ëwaanëja'any. Ënät ja yajkutujkpë t'ënëmaaytyääy ja tyuunpëtëjkëty ets y'ëmontëty ets pyëtsëmtëty ma ënäty jap yajpaatën.

²⁰Ko ojts je'eyë jap nimäjtsk wyë'ëmtë tëkoty, ënät ja Ehud tatsmëkajpxëy ja Eglón ets t'ënëmaay: Yë ayuk mëti'ipës nyajmiinpyën ma mijtsën, Wintsën të xytyukmëkäxës. Ko yë Eglón jëtu'un tmëtooy, ënät ojts amëjaaw pyëti'iky ma y'ënyääypyäjnën.

²¹E ja Ehud jä'ä ko anajnytsyow tyony myätsy, ënät poj'am tnikuxajëy ja tyiypyujxn mëti'ipë a'oytsyow myëët'ajtypyën ma wyëënpa'ajën ets tukmoxmëtijëy ja Eglón.

²²Yajxon ojts amëjaaw timtyukmoxmëtijë ets tyëjkëtyääy ja tëypyujxn ma myoxën, yë'ëpaat ja y'ëjx ojts tyëjkëtyä'äy, jä'ä ko ja Eglón ni'kx ijty, yë Ehud jëtu'unyë ojts tnike'eky ja tyiypyujxn jap Eglón myoxjoty.

²³Ko ja Ehud tyaj'o'ky ja Eglón, yajxon ojts ja tëjk ta'tspëky tyaj'ëtuky ets ojts yäjtskojnë ventanëjoty.

²⁴Ko ja yajkutujkpë ja tyuunpëtëjk myiintë ets y'ijxtë ko ëtuky ja tëjk, ënät y'ëna'antë ko wä'änxyëp jap jyëtity.

²⁵Jeky t'ëwxijtë e ko t'ijxtë ka'ap nyäkpyëtsimy, ënät tyëkëtë määpyë tajpë, tää ja ëwatsn t'ixtaaytyë ets tyaj'ëwatstë ja tëjk'aaw. Ko tyaj'ëwatstë, ënät tuk'ijxpäjtë ja yajkutujkpë tëëtëm nya'o'knë.

²⁶Ja ja'ayëty tam ja jyajtëpë y'o'ktëpë, e ja Ehud tam ja nyakäknë; ko twinnajxtaay ja tsaapotsy jampë Guilgal yajpaatën, jam ojts kyäktso'oky ma ja it naaxwiinyëtë txëëwatyën Seirat.

²⁷Ko jam jyä'äjty ma ja Israel ja'ayëty ja y'itjotëtyën, ënät ojts tyaxmujkta'ay nitëkokyë ja Efraín ja jyä'äyëty mëti'ipë ënäty jam yajpatëpën kopkjotm ets tyo'ontë, yë'ë ja Ehud jëwyiin'ajtp.

²⁸Ehud ojts y'ënë'ëmxëtë ets yë'ë tpanëjkxtëty jä'ä ko tëë ënäty yë Wintsën tyajkutuky ko yë'ë myëta'aka'antë ma ja moapja'ayëtyën. Ënät ojts tpatsoontë ets tyaj'ëtujktaaytyë ja joy'it jampë yajpaatyën ma Jordán nëëjën ets ni pën tkayajnajxtë.

²⁹Jä'ä xëëw, jä'ä tyaj'o'ktë yë Moab ja'ayëty nimajk mil, tëkokyë jënu'un ja tsiptuunpëtëjk ojts y'ooktën aakjä'ä mëti'ipë ëwa'anëtyën ets mëkëtyën. Nitu'uk kyakeky.

³⁰Jëtu'un'äämpy yë Israel ja'ayëty ojts tyajtëkoytyë yë Moab ja jyä'äy. Ko jëtu'un y'ëkjajty y'ëpëpejty, yë Israel kajpn jotkujk ojts yajpaaty majkta'px jëmëjt.

³¹Ja mëmäjtskpë ja ja'ay mëti'ipë ojts tnitsiptunyën ja Israel kajpn ets tsip'ixy jä'ä xyëëwajt Samgar, yë'ë myaank yë Anat, jä'ä tyaj'o'ky yë filistejë ja'ay nitëtujk mëko'px mëët tu'uk yë krukts'apajk. Samgar ojts näjyëtu'un tyajtso'oky yë Israel ja'ayëty.