Read Biblia Mixe de Quetzaltepec Jueces 5 Bible Online

Jueces 5 - Biblia Mixe de Quetzaltepec bible

Jueces 5

¹Jä'ä xëëw yë Débora ets Barac yë myaank, yë Abinóam ojts y'ëwtë:

²Win'ëw winya'axtë yë Wintsën, jä'ä ko ma Israel kajpnën jaaktää'ajtp yë ja'ayëty, mëti'ipë ka'ap tsyë'ëkëtën ets tsiptuuntëp. Jä'ä ko jaaktää'ajtëp yë ja'ayëty, mëti'ipë jëjp'ixy timyajpatëpën oy jëna'a tyimyajmëkajpxtëty tsipjoty.

³Mëtoow'ijtëkës miits yajkutujkpëtëjkëty. Mëtoow'ijtëkës miits ënä'ämpëtëjkëty. Yë Wintsën yë'ëjës yam mwin'ëwäämpy. Yë Tios mëti'ipë yë Israel ja'ay Tyios'ajtëpën, yë'ëjës yam nmo'ojäämpy ya'atë ë'ëwën yaxën.

⁴Ko mijts, Wintsën mtso'ony jam Seir; ko ojts mnëjkxy jam Edom, ojts naaxwiinyëtë yu'kxy, ojts tsajp kyootsë, ets ojts tyu'uy.

⁵Mijts mwintuuy Wintsën, mijts mwintuuy, Tios mëti'ipë Tyios'ajtypyën yë Israel kajpn, yë kopk tëë xyajyu'kxy, tëë xyajyu'kxy ja Sinaí kajpn.

⁶Ma jyuuky'äjtyën yë Samgar, yë myaank yë Anat, ma jyuuky'äjtyën yë Jael, ma ka'ap ja ja'ayëty ënäty y'ëknajx y'ëktëjkënëtën në'ëjoty tu'ujoty, ets ko ojts jam nyajxnëtë tyëjkënëtë ma ja ëxëëkpë ja në'ë'aaw tu'u'aawën;

⁷ma ënäty may ja ja'ay të tsyo'ontaaynyëtën ma mutskëtypë ja naax kajpnën, mëti'ipë ja Israel kajpn nyitënääpyën. Ënätës ojts ja njot nwinma'any npaaty etsës ja nax kajpn njotmëkwinkajpxëy. Ëjts mëti'ipës nxëëwajtypyës Débora, tu'uk ja taak tsi'tsk mëti'ipë yajpatpën ma Israel kajpnën.

⁸Ka'ap ojts tyëkoy'äty ja ja'ay mëti'ipë wyinkoxtënaayën ja wiink tios, ma ënäty ja tsip jam tyunyën kajpnpë'am ma kajpn yajnitëkën, je'eyëp ko ka'ap yaj'ijxy ja y'akëëytyuk ets ja ku'umën, yi'iyë këxë'ktëp ja Israel ja'ayëty ja niwëxtyikxy milpë.

⁹Ëjts n'oyjya'ap ntsuja'apës yë ja'ayëty mëti'ipë nyikopk'ajtëpën yë Israel kajpn, ja ja'ayëty mëti'ipë ja aaw ayuk ojts poj'am tja'akyukëtën ko yajyaxtsoowtë ma ënäty ja tsip y'ityën. Paaty xoonta'aktë ënät tyam jam Tios wintum.

¹⁰Kajpxtë mëtya'aktë miitsëty jënu'un jëyujkëjxy mjëtitën; jënu'un m'u'unyëtën to'okyijxy xa'këjxy; näjyëtu'un miitsëty jënu'un në'ë'am tu'u'am myajpaatën:

¹¹Ets näjyëtu'un mëti'ipë jam yajpatëpën ma ja jëyujk tsajpkaa nyëë'uuktën, ëwtë ya'axtë ets jotkujk yajpaatë, tukpa'ëna'antë yë platillë, ets ëna'antë ko tëë mëta'aktë tsipjotm ma Wintsën të mputëkëtën ma ja tsipën mëti'ipë jam të y'ityën ma ja kajpnëtyën ja mutskëtypë, mëti'ipë yë Israel nyitënääpyën.

¹²Débora pëtë'ëk, Débora pëtë'ëk Pëtë'ëk ets ëw ya'atë ëy yä'äxy Ets mijts Barac yë myaank yë Abinóam pëtë'ëk ets mënëjkx yë mtsumjyä'äy.

¹³Ënät ja Israel ja'ayëty tsyo'ontë ets ojts nyëjkxtë tsiptuunpë mëët ja mëkja'aytyëjkëty mëti'ipë ënäty mëj'äämpy ijtëpën yaa naaxwiiny naaxkëjxy, mëët ëjtskyëjxm jëtu'un ojts tsyoontë, ets nyëjkxtë tsiptuunpë mëët ja ja'ayëty mëti'ipë ënäty yajxon tsip'ixëtyën.

¹⁴Ojts yë Efraín yë jyä'äyëty näjyëtu'un tsyoontë ets ojts nyëjkxtë jam joyjyotm tsiptuunpë, ojts näjyëtu'un pyanëjkxëtë yë Benjamín yë jyä'äy. Ojts tsyoontë yë Maquir yë wyintsëntëjkëty, ets Zabulón yë kyutuunktëjkëty.

¹⁵Yë Isacar yë jyä'äy ojts näjyëtu'un yë Débora tpanëkxtë; mëk ojts mëët yë Barac nyäpyutëkëtë, ko jam yë Barac ojts nyijkxy joyjotm ojts näjyëtu'un tpanëjkxtë. Tam'ajtëp yë ja'ayëty jotmëkëtypë ma Rubén yë tsyiptuunpëtëjkëtyën.

¹⁶¿Wi'ix ko ojts jam wyë'ëmtë tyëkotmëty ko ojts jyayajmëkajpxtë myintëty, tä ja'ay yë kyupixyny tmëkajpxmukyën? Ma Rubén yë tsyiptuunpëtëjkëtyën tam yë ja'ay jotmëkëtypë ets wintse'knyëtypë.

¹⁷Yë Galaad ni'ikyë ojts jam wyä'äts'oyë ma wyittëjkën nëë'awinnaxy ma Jordán nëë jyënäkyën. Dan ojts jam ni'ikyë wyi'imy ma ënäty jam ja kepytyëjk nëëwimye'epyë yajpaatën, yë Aser ojts jam näjyëtu'un wyi'imy ma ja nëë'aawën, ma ja may kepytyëjk nëëwimye'epyë tsyoontën jya'tën.

¹⁸E yë Zabulón ets Neftalí yë jyä'äyëty ojts jam tsyoontë tunkëjxm kopkkëjxm ma ënäty jam yajpaatën ets ja jyuukyajtën tmëktuuntë jam ma tsip tyunyën.

¹⁹Ënät ja yajkutujkpëtëjk jam myiintë Taanac, ma ja nëëjot txëëwatyën Meguido; yë yajkutujkpëtëjk mëti'ipë Canaán ja'ayëtyën ojts myintë tsiptuunpë, e ka'ap ojts tpaatë yë poop pujxn ets wit meeny.

²⁰Jam tsajpjotm ets tëkokyë jënu'un jam winë y'ëwtityën tä yë mëtsa'ajëtyën ojts tsyiptuntë mëët yë Sísara;

²¹Yë nëë wok, yë jekynyëëwok, yë nëë wok mëti'ipë yajtijpën Quisón wa'ats ojts jam ja ja'ay tyaj'o'kta'ay tyajtëkooytyä'äy. Mijts jëtu'unyë të xyaj'ëmoonta'ay ja mëkja'aytyëjkëty ets ja tsiptuunpëja'aytyëjk.

²²Kiw kawnë jyänty y'ëna'antë yë pujxn ma kyëpajkëtyën. Puyë'kp nyëjkxtë yë oy tsujpë jëyujkëty.

²³Ets ja Wintsën ja kyukäjpxy y'ënä'äny: Wä'än yë ëyo'on tkëtä'äky ma Meroz. Jä'ä ko yë'ëjëty ka'ap yë putëjkën të tyajktë ma ja Wintsën Tios ojts tjani'ënä'ämën.

²⁴Kënu'kxy ets jotkujk y'itëty yë Jael ma to'oxytyëjktëjkëtyën, yë tyo'oxytyëjk yë Éber ja quenitëja'ay. Kënu'kxy nëjkx y'ity ma tsyënaaytyaknën yë Israel ja'ayëty.

²⁵Yë Sísara nëë y'amëtoow yë Jael tsi'tsknëë ojts myo'oyë. Yajxon ojts t'oytyuunë xu'kx ets tuk'uky.

²⁶Jëxkë'ptsow tnixajnajxy ja kepyjyëjpxu'uny mëët yë y'anajnykyë'ë, ets ja pujxnkuwojpën mëët ja y'a'oykyë'ë tukutäjxë'ky kyëpajkëjxy amëjaaw, ojts tuknaaxmëtijë mëët, wa'ats ja kyuko'oxy ojts täjxpëtsëëmtaayë

²⁷Yë Sísara jëtu'unyë ojts yetsy pyojy ma ja Jael ja tyekpya'tkën. Ja pa'am ets ja tsëtyut jëtu'unyë ojts tmëyetsy tmëki'ity, jam ma kyëtääyën jam ojts wyi'imy.

²⁸Yë Sísara ojts yë tyaak jyi'iy yä'äxy ma tyëjkën, ventanëjoty y'ijxnajxy ets y'ënäny: ¿Wi'ix jëtää ko pyo'oxy ja pyujxn wintëkäänpë mëti'ipë tyuktsiptuunpyën?

²⁹Ënät ja to'oxy'ëna'këty y'ëtsoowtë mëti'ipë yajmëtoowtëpën nyija'awëtyëp yowë winë, ets kë'ëm nyäy'ëtsoyë:

³⁰Yë'ë ënät jam yajwa'kxtëp mëti'ipë yë myëtsipëty të tukyajni'o'ktu'utën. Tu'uk ëkë mäjtsk ënät tyuka'ajëtë ja to'oxy'ëna'k nitu'ukjaty ja tsiptuunpëty; ja Sísara yë'ë ënät të tyukka'ayë ja oypyë ja wit, mëti'ipë ujkënmëëtën janty oyëty, ets ka'ap je'eyë tyu'ukëty, mäjtsk ënät të tyuka'ayë, yë jo'okpyë mëët yë oyëtypë piity, ets nyätyukyo'kwitsëtëty.

³¹Jëtu'un mëpaat kyutëkooytya'atë mijts yë mmëtsip Wintsën, e ja ja'ay mëti'ipë mtsojkëpën mja'awëpën wä'än jëtu'un të'kxtë tjajtë tä xyëëw'anyën. Ko ya'atë tsip nyäjxy, jä'ä ojts yë Israel kajpn jotkujk yajpaaty wëxtyikxy jyëmëjt.