Read Biblia Mixe de Quetzaltepec Jueces 8 Bible Online

Jueces 8 - Biblia Mixe de Quetzaltepec bible

Jueces 8

¹Yë jyä'äyëty yë Efraín ojts tukjoot'anpëktë yë Gedeón, jä'ä ko ka'ap ënäty të wyowëtë ko tsyo'ony tsiptuunpë ma ja Madián ja'ayëty mëët tsyiptuna'anyën.

²E yë'ë tyaa y'ëtsooy: Miitsëty ka'ap xywyinja'awëtyë ko mëj këjää winë xytyuuntë këtiinëm jëtu'un ëjts, jawäänëpë të xytyuntën tsoowpatp ni'ik, këtiinëm jyëtu'unëty mëti'ipës mëj këjää të ntuntën.

³Tios jëtu'un të tyajkutuky ets miits xyaj'ooktëty yë Horeb ets Zeeb, mëti'ipë ënäty nyikopk'ajtëpën yë Madián ja'ayëty. ¿Ëëtsëty tiijës të ntuntë ets yaj'ijxkijpxëty mëët mëti'ipë miitsëty të xytyuntën? Ko ja Efraín ja jyä'äyëty jëtu'un tmëtoowtë ja Gedeón y'ënä'äny ënät ojts jyotkujkëtë.

⁴Ënät tsyo'ontë yë Gedeón jam ma ënäty yajpaatën mëët nitëkëëk mëko'px ja jyä'äy ets tuknajxtë ja Jordán nëë oy ënäty tëë yajxon jya'ënu'kxëtë, mëët ko ja myëtsip të tpapo'otë tu'kxëëw.

⁵Ko jam jyajtë Sucot, ënät yë Gedeón t'amëtooy yë ka'ayën ukën: Tuntë yë mëyajtën yajkaytyë wäänë yë ja'ayëty mëti'ipës xypyamiintëpën, tëë y'ënu'kxëtya'atë ko yajpapo'oy yë yajkutujkpë Zébah ets Zalmuná mëti'ipë ënä'ämtëpën ma Madián ja'ayëtyën.

⁶E ja mëjja'aytyëjk jampë Sucot yajpaatën tyaa y'ëtsoowtë: ¿Tiixë të xytyuny, kajts xyaj'ookynyëm ja Zébah ets ja Zalmuná yë mtsiptuunpë ka'ap pyaatëtë kyäytyëty?

⁷Ets ja Gedeón y'ëtsooy: Koos yë Wintsën xykyë'ëmo'ojëty yë Zébah ets Salmuná, winpitëpës yaa jatëkok ets jëtu'unyë yë mni'ak nwinkë'tstutmëty mëët yë äpny mëti'ipë wintë'ës'ituuy yoontëpën ji'tsëpën.

⁸Ko jam tsyo'ony Sucot, jam ojts nyijkxy Penuel, jam t'amëtooy yë ka'ayën ukën. Näyjyëtu'un jam yaj'ëtsooy tä ojts Sucot yaj'ëtsoyën.

⁹Tä ja Gedeón t'ënëmaay ja ja'ayëty jampë yajpaatën: Koos nmëta'akëty maas tyam tsipjoty nyajpaatyën winpitëpës yaa jatëkok etsës xiipë potsy njijtë'kta'ajëty.

¹⁰Yë Zébah ets Zalmuná jam ënäty yajpaatë ma tu'uk yë it naaxwiinyëtë txëëwatyën Carcor mëët nimajkmokx mil ja jyä'äy. Tääpë nimajkmokx milpë yë tsiptuunpëtëjkëty, yi'iyë ënäty jaakwë'ëmtëp jampë xëëwpëtsëmtsyow yajpaatën. Jä'ä ko tëë ënäty nimay y'o'knëtë, jä'ä nyiwinë'atë i'px mil.

¹¹Gedeón yë'ë ojts yë tu'u tkuuynyijkxy mëti'ipë pya'anajxypyën yë të'ëts'itjot, a'oytsyow, ma wyi'imyën yë Nóbah ets Jogbehá. Yë myëtsip, ajotkumonë ojts t'ëkëty tyukja'ty ma ënäty yë'ë ka'ap ninu'un timjyëjp'ixtën.

¹²Yë Zébah ets Zalmuná ënätyë ojts tyäty kyä'äktë; e yë Gedeón ojts poj'am pyatsoonëtë koonëm nyäspatëtë ets myajtsëtë, ja tsiptuunpëtëjkëty yajxon tsyë'kënëtë.

¹³Ko ojts wyimpijnë yë Gedeón ma ënäty të y'otsyën tsiptuunpë jam nyäjxy Herés.

¹⁴Ets tmajtsy tu'uk yë yä'äy'ëna'k mëti'ipë kukajpn'ajtpën Sucot ets tyajtëëwtaay mëti'ipë ënäty nyijawëjäämpyën; tääpë yä'äy'ëna'k ojts tkëxjaaytyä'äy nokykyijxy ja xyëëwëty ja kopktëjkëty, ja mëjja'aytyëjk ets ja wintsëntëjkëty jampë yajpaatën Sucot, mëti'ipë ënäty wintsën'ajtëpën jä'ä nyiwinë'atë, nitëkë'px majkmokx mäjtsk.

¹⁵Tä ja Gedeón ojts jam nyijkxy Sucot ets t'ënëmaay ja kukajpnëty: ¿Miitsëty wa'ats jëtää xyjyä'ämyätstë wi'ix ojts xynyëxi'ik xytyukxi'iktësën maas ënäty mëët näpyajëtitëtën ja Zébah ets Zalmuná? ¿Mja'amyäjtstëp ko miitsëty nitu'ktukyën ojts yë nja'ayës xykyamo'oja'antë kääky uuky oy ënäty tëë jya'ënu'kxënëtë; miitsëty je'eyë m'ëtsoowtë ko tiis ëëts nätyukyajmëjnajxëtëp kajts maa ja mëtsip tmatstëmës?

¹⁶Ënät ja Gedeón ojts twinpëjkmuky ja äpny jam të'ëts'itjotm ets jä'ä mëët tuktëytyuuny ja mëjja'aytyëjk jampë yajpaatën Sucot.

¹⁷Ojts näjyëtu'un tjijtë'ëky ja potsy mëti'ipë tyijtëpën Penuel ets tyaj'o'ktaay ja ja'ay jampë kyukajpn'atën.

¹⁸Tääts tyajtëëy ja Zébah ets Zalmuná: ¿Ja ja'ayëty mëti'ipë jam myaj'o'ktën Tabor wi'ix ënäty y'ixë'atë? Tääts y'ëtsoowtë: Aakjëtu'un y'ixë'atë tä mijtsën, aakjëtu'un kyëxë'ëktë tä jeexyë yë yajkutujkpë teety'atën.

¹⁹Ënät ja Gedeón janty mëk yujk'ënany: Nmëku'ukës. Ntimmyëku'ukës jä'äjëty mëti'ipë myaj'o'ktën, tyam miits yajxon tëyajtën ntimy'ënëëmëtë, jëtu'un tä tyiyëtyën ko yë Wintsën jyuukyëty, kooxyëp ojts xykyayaj'ooktë nän kajxyëp miits yam nyaj'ooktë.

²⁰Tääts ojts t'ënëëmë ja Jéter ja myaank mëti'ipë ënäty mëj'ajtpën: Pëtë'ëk ets yaj'ook xiipë ja'ayëty. E komë yë Jéter jaakmutsk'ajtpnëm ënäty, ka'ap ja mëk'ajtën tmëët'ajty ets ja yenypyujxn tjuutëty.

²¹Ënät ja Zébah ets ja Zabulón t'ënëmaay ja Gedeón: Yaj'o'ktëkës mijts. Jëtu'unxë yë käjpxy y'ënä'äny ko yë ye'etyëjk yë'ë mëët yajtuk'ixkäpy yë jyotmëk'ajtën. Tä yë Gedeón pyëti'ky ets tyaj'o'ky tääpë ja'ayëty ets tuknipëjktutaay winë mëti'ipë ënäty ja jëyujk jëku'ux myëët'ajtëpën, ja Zébah ets ja Zalmuná ja jyä'äy.

²²Ënät ja Israel ja'ayëty ojts ni'ëmukë y'ënaanta'atë, t'ënëmaaytyë ja Gedeón: Mijts Gedeón tëëjës xyajtso'oktë ma ja Madián ja'ayëtyën, ëjts ntsojktëpës ets m'ënä'ämëty mëët ja m'u'unk m'ok ma ëëtsëtyën.

²³Tä ja Gedeón y'ëtsooy: Ëjts ets nmaankës ka'apës tääpë tuunk nkupëktëty ets miits n'ënä'ämtëty. Yë Wintsën yë'ë kë'ëm nyija'ap wi'ix y'ënä'äma'any ma miitsëtyën.

²⁴Mëti'ipë tëy yam miits n'amëtowantëp yë'ë ets xymyo'otëtyës ja kë'ëjiits mëti'ipë ja mëtsip të xypyëjkëtën. Tääpë jëtu'unpë kë'ëjiits yë'ë ijty yajtuuntëp yë tsiptuunpëtëjkëty jampë yajpaatën ma ja it naaxwiinyëtën të'ëts'itjotmëpë.

²⁵Ja Israel ja'ayëty ojts tu'uk tyä'äptë ja wit naaxkëjxy ets jam tkëxpëjktaaytyë ja kë'ëjiits aak pu'ts pujxn mëti'ipë të tpëjkëtën ja myëtsipëty ets t'ënëmaaytyë ja Gedeón: Tyaa ënät ja kë'ëjiits mëti'ipë m'amëtoopyën.

²⁶Tu'kë'ëyë ja kë'ëjiits ko ojts yajkijpxy jä'ä pyëtsiimy majkmokx taxk tsim mëti'ipë aak pu'ts pujxnën, ëpëky ja maypyë mëti'ipë ka'ap pyu'tspujxnëtyën ets ja witëty tujkxyëty oyjyätyëtypë mëti'ipë ja yajkutujkpëtëjk ijty myëët'ajtëpën jampë yajkutujktën Madián ets näjyëtu'un ja yo'ktëyëty mëti'ipë jëyujk jëku'ux myëët'ajtëpën.

²⁷Mëët tääpë pu'ts pujxn mëti'ipë yë Gedeón ënäty të tyajmukyën, yë'ë mëët t'oytyuuny tu'uk yë teety wyit mëti'ipë jam pyëjktakën Ofrá, ma kyukajpnëtyën; mëët ya'atë Efod mëti'ipë aak pu'ts pujxnën, yë Israel ja'ayëty ka'ap ojts oy yë Wintsën tmëtuntë, je'eyë ojts nëkoo tyajtsipta'aktë ja Gedeón ja y'u'unk tyo'oxytyëjk.

²⁸Jëtu'un'äämpy yë Madián ja'ayëty ojts tmëtuntë yë Israel ja'ayëty ko myëmëtakëtë ets ka'ap ojts nijëna'a tii t'ëktuunëtë. Wëxtyikxy jëmëjt ojts yë Israel kajpn jotkujk y'ity mapaat jyuuky'äjtyën yë Gedeón.

²⁹Jerubaal, mëti'ipë näjyëtu'un yajtijpën Gedeón, jam ojts nyëjkxnë tsënääpyë ma tyëjkën. Jä'ä yë y'u'unk y'ëna'k nyiwinë'ajtë nitëkë'px majk, jä'ä ko kanaak ënäty ja tyo'oxytyëjk tmëëtëty.

³¹Jam Siquem jam ijty tu'uk yë to'oxytyëjk tmëëttsëënë mëti'ipë ka'ap yajxon mëët pyijky y'ukyën; tääpë to'oxytyëjk ojts tu'uk yë u'unk maay tyajja'ty, jä'ä ojts yë Gedeón txëëwmo'oy: Abimélec.

³²Gedeón tëë ënäty myëjja'ayënë ko ojts y'o'knë, jam nyaaxtëjkëy ma ja tyeety Joás nyaaxtëjkëyën ma ja naaxwiinyëtë txëëwatyën Ofrá ma Ebiézer jyä'äy tsyëënëtën.

³³Ko yë Gedeón ojts y'o'knë, yë Israel ja'ayëty ojts t'ëxmatstë jatëkok yë Wintsën ets tpanëjkxtëjkëtyë ja wiink tios mëti'ipë yajtijpën Baal; yë'ë ojts twin'ixtë t'ëwtata'antë tu'uk awinax mëti'ipë tyijtëpën Baal-berit.

³⁴Ojts tja'atyëkooynyëtë ja Tios mëti'ipë ënäty të pyutëkëtën oy muum mëët të nyäwyinkuwa'akëtë ja myëtsipëty mëti'ipë ënäty ja yajkutëkoyanëtëpën.

³⁵Ka'ap ojts jëtu'un t'oyjyawëtë ja Jerubaal ja y'u'unk tyo'oxytyëjk tä ënäty jyapaatyën, oy winë mëj këjää tjatuuny ma yë'ëjëtyën mëti'ipë ojts tuk'oy'atën.