Read Biblia Mixe de Quetzaltepec 3 Juan 1 Bible Online

3 Juan 1 - Biblia Mixe de Quetzaltepec bible

3 Juan 1

¹Ja mëjja'ay Juan. Tkajpxpo'kxy ja nmëku'uk'ajtëm Gayo, mëti'ipë mëtëy tsojkp ja'apën.

²Jëëky mëku'uk, n'amëtoopyës ja Tios ets ja oyajtën mëk'ajtën mmo'ojëtëty, xypaatëty xy'ixëty tii myajmëyäjtypyën ets oy mëk myajpaatëty.

³Akujk jotkujkës të näjyawëty ko ja nmëku'uk'ajtëm të xynyimintës ets të xytyukmëmëtya'aktës ko mijts oy tsuj ja Tios ja tyiyajtën xypyatuunë.

⁴Nitiijës të nkatukjotkujk'aty ijxtëm ya'atën, koos të nijawë ko ja n'u'unk n'ëna'kës jyuuky'atë mëët ja tëyajtën.

⁵Jëëky myëku'uk, oy ko xymyëtuny ja Tios mëtëy ma ja mmëku'uk'ajtëmën, ets ma ja mëti'ipë tso'ontëpën wiinktsow.

⁶Tëë tnimëtya'aktë ko mijts oy tsuj mja'ay'äty. Jëtu'un xyjyaaktunëty ja mëyajtën, jaaktukputëkë winë tii yajmëyajtëpën ets oy tyu'uye'eytyëty, jëtu'un ijxtëm ja Tios tukxoontä'äkyën.

⁷Jä'ä ko Tios yë jyä'ä myëjëtijtëtëp, yë'ëjëty ka'ap ja putëjkën të t'ëxajëtë oy pën të jyaputëkëja'anëtë ma ja ja'ayëtyën mëti'ipë ja Tios ka'ap tnijawëtën.

⁸Paatykyëjxm ëëtsajtëm xypyattëm ets nyajja'ajtakmëty, jä'ä ko tu'ukyë nmëtu'unëm ja Tios.

⁹Tëës ja noky n'ëktuknikäxtë ja mëpëjkpëtëjkëty ma miits mye'eymyuktën, je'eyëp ko ja Diotrefes ka'ap të tkupëky ijxtëmës nja'ëna'anyën, jä'ä ko yë'ë je'eyë y'ënä'äma'any.

¹⁰Paaty koos ënäty ëjts nnëjkxy ntukmatsäämpyës wi'ixës xynyimëtyä'äkyën ets ka'ap yi'iyëty, näjyëtu'un ko ka'ap tkupëky ets tyajjajta'akëty ja nmëku'uk'ajtëmë ets nän y'akajpxtujkpy ko ja nmëku'uk'ajtëm jëtu'un tuntë ets tyim'ëxwojpy tyim'ixkejxyp ma ye'eymyuktën.

¹¹Mëku'uk, këtii yë'ë xypyatunëty ja ëxëëk ijxpëjkën, patun mijts ja oypyë. Pën ja oypyë tyuunpy, yë'ë Tios jä'ä'ajtëp; pën ja ëxëëkpë tyuunpy, ka'ap ja Tios nyijawëty.

¹²Oy tsuj ja Demetrio yajnimëtyä'äky ko mëtëy ja oypyë tuny. Näyjyëtu'un ëëtsëty nän oyës nnimëtya'aktë, ets mijts mnija'ap ko mëtëyës nkajpxtë.

¹³Mayës ja winma'any nmëët'aty mëti'ipë miits njatuk'ëwaanëjantëpën; je'eyëp ko ka'apës noky'am n'ëkmëtya'akanë.

¹⁴Kë'ëm jam nninëjkxa'antë ets nkajpxmëty nmëtyakmëty wiinxë jëjpxë.

¹⁵Tios mkënu'kxëtëp ets akujk jotkujk myajpaatëty. Mtuknikäjxëtëp ja kajpxpo'kxën ja nmëku'uk'ajtëmë mëti'ipë yaa tsënaaytyëpën. Tun yë mëyajtën, kajpxpo'kx nitu'ukjaty mëti'ipë jam yajmëku'uk'ajtpën.