Read Biblia Mixe de Quetzaltepec Apocalipsis 11 Bible Online

Apocalipsis 11 - Biblia Mixe de Quetzaltepec bible

Apocalipsis 11

¹Tëë nyajmo'oyës tu'uk ja kepy mëti'ipë yajtukkijpxpën winë, jëtu'un kyëxë'ëky ijxtëm yë tsajkäpynyën ets nyajnëmaayës: Pëtë'ëk ets xykijpxëty ja Tios ja tyëjk ets ja wintsë'këntyakn ets näjyëtu'un xymyëtyowëty mëti'ipë wyintsë'këtëpën ja Tios.

²Je'eyëp ko këtii xykijpxëty ja Tios ja tyëjk tëja'aw, jä'ä ko tëë yë ja'ay yajkë'ëmo'otë mëti'ipë ka'ap jyutiis'atën, mëti'ipë y'ëxëëktunantëpën wëxtyikxy mäjtsk po'o ja wa'ats kajpn.

³Nkäxäämpyës nimäjtsk yë ijxpë tuunpë, yë'ë wyit'ajtëp yë wit mëti'ipë u'kxpën ets kuumpën ets nikajpxa'antë mëti'ipë tunan jatanëpën tu'uk mil ja mäjtsk mëko'px ja tëkë'px xëëw.

⁴Ja nimäjtskpë ijxpë mëtoopë, yë'ë tyijpy ja mäjtskpë ja olivë kepy ets ja mäjtskpë ja cera ato'oyën mëti'ipë Wintsën wintum yajpatpën.

⁵Pën jää pën wi'ix tyuna'anëtë, yajpëtsëmtëp ja jëënyä'änk y'aawjoty, jëtu'unts ja myëtsip y'o'kta'atëty mëti'ipë ëxaty tunanëtëpën.

⁶Ja nimäjtskpë mëti'ipë ja tëyajtën yajktëpën myëët'ajtëp ja mëk'ajtën ets ka'ap tyu'ujëty kanaak xëëw ma ja Tios ja jyä'ä tkajpxwa'kxëtën, ets nän myëët'ajtëp ja mëk'ajtën ets ja nëë tyajne'pynyëtya'atëty ets tyaj'ëyowtëty ja naaxwiinyëtë ja'ay mëët kanaaknax ja ëyo'on jotmay ijxtëm kë'ëm timtsyoktën.

⁷Ko ja Tios ja jyä'ä ënäty të tkajpxwa'kxta'atë, ënät ja mëj jëyujk pyëtsëma'any mëti'ipë tso'onpën ëyoowtaknjoty, yë'ë yaj'ookëtëp.

⁸Tu'ujotm ja nyi'kx kyopk wyë'ëmta'aja'antë wijtstëy jam mëj kajpnjotm, ja kajpn ma ja Wintsën kyëruutspejtyën, yë'ë yajtijp yë Sodomë ets Egiptë kajpn.

⁹Ets tëkëëk xëëw ja kujkm, ja ja'ay nëjkx t'ixtë ja o'kpë, mëti'ipë tso'ontëpën wiink naax wiink kajpn, tëkokyë mëti'ipë wiink aaw wiink ayuk kyajpxtëpën. Ni pën tkakupëka'any ets ja o'kpë nyaaxtëkëtëty.

¹⁰Oy ets akujk jotkujk ja naaxwiinyëtë ja'ay nëjkx nyäyjyawëtë ko t'ixtëty ko tëë ja ja'ay y'ooktë. Nëjkxëp nixëëwtuntë ets nyämyo'ojëtë ja näykyumayë nixim niyam, jä'ä ko tääpë ja käjpxynyajxpëtëjk je'eyë ijty y'atsipëtë.

¹¹E ko mëtëkëëk xëëw ja kujkm ënäty të nyäxy, ënät ja Tios të yajjuukpyëkëtë ets jatëkok të pyëtë'ëktë e mëti'ipë të t'ixtën yajxon të tsyë'kënëtë.

¹²Ënät ja nimäjtskpë mëti'ipë tëyajtën yajktëpën, ojts ja ayuk tmëtowtë jam tsajpjotm ets y'ënëmaayëtë: Pätë yam. Ets pyäjtë yoots akujky. Ni'ëmukë ja myëtsip t'ijxtë.

¹³Ënätyë ja ujx myiiny mëk ets niwëxtujk mil ja ja'ay y'o'ktë ko tu'kpëky ja majk pëkpyë kajpn kyuja'awnajxy mëët ja ujx, e ja ja'ay mëti'ipë ka'ap y'o'ktën, yajxon tsyë'ëkëtë ets tmëja'awëtyë ja Tios ja tsajpjotmëpë.

¹⁴Jëtu'un y'ëknajxy ja mëmäjtskpë ëyo'on, je'eyëp ko tim tëë jëtu'un ets ja mëtëkëëkpë ëyo'on myinëty.

¹⁵Ko ja mëwëxtujkpë ja tsajpjotmëtë kukäjpxy tukxuxy ja pujxnxuxn, ënät kanaakpëky ja mëto'owën mëk yajmëtooy jam tsajpjotm ets y'ënä'äny: Tëë ja Wintsën ets ja Kristë tyajtso'onta'aktë ja kyutujkën naaxwiiny ets yajkutuka'antë xëmëkyëjxm.

¹⁶Ets nyäkyoxtënaaytyakëtë ja i'px taxkpë ja mëjja'aytyëjk mëti'ipë u'unyääytyëpën jam ma kutujktaknën, Tios wyintum ets ja Tios twintsë'ëkëtë,

¹⁷ets y'ënantë: Wintsën Mëti'ipë Maaytyääyëpën Winë, mijts m'ijtp tyam ets mijts të m'ity tëëyëp, nkukajpxëtëpës ma mijtsën, jä'ä ko tëë xy'ëxajë ja mëk'ajtën ets të myajkutujktsoony.

¹⁸Tëë ja naaxwiinyëtë ja'ay jyoot'anpëktë ets tëë ja tiempo tpaaty ets xtyiytyunëty ja ja'ay ets xypyaye'eyëty ja pyoky ja o'kpë; ets ja mkäjpxynyajxpëtëjk xymyo'ojëty ja nyäkyumayë, ja wa'atspë ja mkajpn ets mëti'ipë myëjja'awëtëpën ja mxëëw, mëj mutskpë; jëtu'un xyajkutëkoyëty mëti'ipë yajkutëkooytyëpën ja naaxwiinyëtë.

¹⁹Ënät ja Tios ja tyëjk y'ëwatsy jam tsajpjotm ets n'ijxyës jap ja kaaxë mëti'ipë myë'ijtypyën ja käjpxytyu'unën, ënät ja wëtsuk të y'ëtëtstä'äky, ja aaw ayuk të yajmëtoy, ja ënääw të y'ënaantä'äky, të tyëkë ja naaxwiinyëtë yu'kxpë, të tsyëyuuypyiky ets të tyëkë mëk tëtsntuupë.