Read Biblia Mixe de Quetzaltepec Apocalipsis 14 Bible Online

Apocalipsis 14 - Biblia Mixe de Quetzaltepec bible

Apocalipsis 14

¹Ets n'ijxyës mëti'ipë yajtijpën Kupixynyën U'unk, jam tyänë ma Sión kopkën. Mëët nimëko'px ja wëxtyikxy majktaxk mil ja ja'ay mëti'ipë ja Tios Teety xyëëw ets mëti'ipë Kupixynyën U'unk xyëëw myëët'ajtëtëpën wyimpokëjxm.

²Ënätës nmëtooy mëk y'ënä'äny tsajpjotm ijxtëm ja nëë tax y'iitsy kyomyën ets ijxtëm ja ënääw y'ënä'änyën, jëtu'un yajmëtoy tä yë ja'ay kyowtën.

³Jamts ja jempyë ëy t'ëwtë kutujktakn wintum, nimajktaxkpë juuky'ajtpë wyintum ets mëjja'aytyëjk wyintum. Ni pën jëtu'unpë ja ëy tkajaty, yi'iyë ja nimëko'px ja wëxtyikxy taxk milpë jyajtëp mëti'ipë të nyitso'oktën naaxwiiny.

⁴Yë'ë mëti'ipë oy tsuj të jyä'äy'atën ets ka'ap të nyäyaj'ëxëëkëtë mëët ja to'oxytyëjk. Wa'ats yë'ëjëty të nyäyaj'itëtë, pyanëjkxtëp oy tyimmaajëty mëti'ipë yajtijpën Kupixyn U'unk. Yë'ë jëtu'un jëwyiin të nyätyukmëyoxëtë ja Tios ets mëti'ipë yajtijpën Kupixyny U'unk ets të tuknitso'oktë.

⁵Ka'ap të wyin'ëëntë, nitii poky të tkamëët'atë.

⁶Ënät ja wiinkpë ja tsajpjotmëtë kukäjpxy n'ijxyës jam tsajp'itkujkm kyaakëtity. Ja ayuk myëmiinpy ets tkajpxwa'kxa'any wi'ix nyitso'oktëty ja naaxwiinyëtë ja'ay, oymyëti'ipë kajpnëty, oymyëti'ipë naaxëty, ets oy tyimpën ja'ayëty ets tu'kë'ëyë mëti'ipë ja aaw ayuk kyajpxtëpën.

⁷Ets mëk y'ënäny: Winkutsë'ëkëtë ja Tios ets xymyëjjaw xyjyääntyjyawëtëty, jä'ä ko tëë ja xëëw mëtyo'owën tpaaty ma tyiytyuna'anyën ets pyaye'eyä'äny. Ëwtatë pën ja naax, tsajp, nëë ets ja mejy yajkojën.

⁸Tääts ja mëmäjtskpë ja tsajpjotmëtë kukäjpxy pyamiinë mëti'ipë ënaanpën: Tëënëm, tëënëm ja mëj kajpn Babilonyë kyuka'anaxy, mëti'ipë tu'kë'ëyë ja naaxwiinyëtë ja'ay të twin'ëënyën ets të tuktuny ja ëxëëk tuunk.

⁹Ets ja wiinkpë ja tsajpjotmëtë kukäjpxy mëtëkëëkpë pyamiinë mëti'ipë mëk ënaanpën: Pën kyupëjkpy ja nätsya'ajë wyimpokëjxm ets kyë'ëkëjxm, ets pën wyintsë'këp ja mëj jëyujk ets ja y'awinax,

¹⁰yë'ë ja ëyo'on yajmo'ojaanp jä'äkyëjxm ko ja Tios të tyajjotma'aty; jëtu'unts y'ëyowëty ma ja jëënyä'änk tyoyën mëët ja azufre, Tios y'anklëstëjk wyintum ets mëti'ipë yajtijpën Kupixyn U'unk wyintum.

¹¹Xëmëkyëjxm ja jëënjok jap pyëtsimy ëyoowtaknjoty, ka'ap jap ja po'kxën maa, xëëny koots jap y'ëyowëty mëti'ipë ja mëj jëyujk ets ja awinax wyintsë'këpën ets mëti'ipë kyupëjkpyën ja nätsya'ajë.

¹²Paaty ja mëpëjkpëtëjk, mëti'ipë ja Tios ja y'ënä'ämën pyatuunëtëpën ets mëti'ipë ja Jesús mëët tu'ukyë y'itën, pyëjktaktëp ja mëjaaw.

¹³Ënätës nmëtooy tu'uk ja ayuk mëti'ipës xynyëmaayën: Kuja'a ya'atë: Jotkujk mëti'ipë tyam o'ktëpën ets mëti'ipë ookantëpën, mëti'ipë tu'ukyë ja Wintsën mëët y'itën. Jëtu'un ja Kënu'kxymyëkajtën y'ënä'äny: Jatëp jëtu'un. Po'kxantëp jä'ä, jä'ä ko oy të tyuntë, jääpaat ja tyuunk y'ëyo'on të tyajnaxtë.

¹⁴Ënätës n'ijxy tu'uk jam y'u'unyë poop yootsjotm, jëtu'un kyëxë'ëky ijxtëm ja ja'ayën, pu'ts pujxn kyujän'ajtyp ets tsujkn tu'uk kyoon'ijtyp.

¹⁵Ets ja wiinkpë ja tsajpjotmëtë kukäjpxy jap pyëtsiimy ma ja Tios ja tyëjkën ets mëk tmëkäjpxy mëti'ipë yootsjotm u'unyääpyën: Yajpëtë'knë yë pëjktä'äky mëët yë tsujkn. Tëë yë xëëw po'o tpatnë ets pyëtë'knëty, jä'ä ko tëë myëjaawnë.

¹⁶Tääts mëti'ipë u'unyääpyën jam yootsjotm tyajpëtë'ktaay ja pëjktä'äky naaxwiinyëtë apëtsëmy mëët ja tsujkn.

¹⁷Tääts ja wiinkpë ja tsajpjotmëtë kukäjpxy pyëtsiimy ma ja Tios ja tyëjkën jam tsajpjotm, nän tsujkn myëët'ajtyp jëjpë.

¹⁸Tää wiinkpë tsajpjotmëtë kukäjpxy pyëtsiimy ma ja wintsë'këntyaknën mëti'ipë y'ijx'ijtyp kyëwent'ajtypyën ja jëën wintsë'këntyakn ets tmëjyaxëy mëti'ipë ja jëjpë ja tsujkn myëët'ajtypyën ets t'ënëmaay: Tsujkmuk yë tsatymtyëëm mëët yë mtsujkn jëjpë, mëti'ipë yajpatpën naaxwiiny, jä'ä ko tëë yë tsatym tsyaamnë.

¹⁹Ënät ja tsajpjotmëtë kukäjpxy tsujkmujky ja tsatymtyëëm mëët ja tsyujkn ets t'apëjkëy jap ma yajma'atsyën. Ja mëti'ipë kyutëkats'ajtypyën ja ëyo'on mëti'ipë Tios kyäxäämpyën.

²⁰Jëtu'unts ja tsatsymtsya'am yajwinma'atsy kajpnpë'am ets kom pyëtsiimy ja ne'pyny. Jëtu'un jyä'äjty ja ne'pyny ma ja kwaay ja y'ajäänë'ëkën, jä'ä wyinjëkämëty majk xëëw ye'eyën.