Read Biblia Mixe de Quetzaltepec Apocalipsis 17 Bible Online

Apocalipsis 17 - Biblia Mixe de Quetzaltepec bible

Apocalipsis 17

¹Tu'uk ja niwëxtujkpë ja tsajpjotmëtë kukäjpxy mëti'ipë ënäty myëët'ajtypyën ja wëxtujkpë ja a'ukën, ojts xynyiminyës ets xynyëmaayës: Min ets ntuk'ixëty wi'ix y'ëyo'onpaata'anyën ja mëj ku'into'oxy mëti'ipë u'unyääpyën mejy wiinkëjxm.

²Yë yajkutujkpëtëjk mëti'ipë yaajëtyën naaxwiiny, tëë mëët pyokytyuntë yë mëj ku'into'oxy ets ja naaxwiinyëtë ja'ay tëë ni'ik wyinma'anytyëkooynyë mëët ja ku'into'oxy ja pyoky.

³Ënät ja tsajpjotmëtë kukäjpxy, mëti'ipë ja Kënu'kxymyëkajtën xytyuk'ijxpënës ojts xyajnëjkxyës jam të'ëts'itjotm. Jam n'ijxyës ja to'oxytyëjk tuk'u'unyë ja mëj tsapts jëyujk mëti'ipë ujts nyini'kxën mëët ja ëxëëk ayuk mëti'ipë ja Tios tyukni'ojëpën ets wëxtujk ja kyëpajk ets majk ja wyaj.

⁴Tsu'unk, tsapts ets oyëty ja wyit ja to'oxytyëjk; pu'ts pujxn, oyëtypë tsaa ets perlas nätyuk'oytyuunëp. Jam tu'uk ja pu'ts pujxn a'ukën tkoon'ity, ujts mëët ja ëxëëkajtën mëti'ipë tyuunk'ajtypyën.

⁵Jam wyinpokëjxm, jam kyëxja'ayëty ja aaw ayuk ka'apë oy yajja'akyukën. Jëtu'un jam kyëxja'ayëty: Mëj Babilonyë, mëti'ipë nyikopk'ajtypyën ja ku'into'oxy, ja pokytyuunk ets ja ëxëëk winma'any.

⁶Ënätës n'ijxy ko ja to'oxytyëjk myu'ukyë, yë'ë mukëp ja mëpëjkpëtëjk ja nye'pyny ets ja ja'ayëty mëti'ipë të tkajpxwa'kxtën ja Jesús ja jyä'ä. Mëkës ni'ik nja'awëy ko jëtu'un n'ijxyës.

⁷Tääts ja tsajpjotmëtë kukäjpxy xynyëmaayës: ¿Tii ko mëk xyjyawë? Tyam ntuk'ëwaanëty wi'ix yajja'akyukëja'anyën ja to'oxytyëjk ets mëj jëyujk mëti'ipë yë to'oxytyëjk tyuk'u'unyääpyën, mëti'ipë wëxtujk ja kyëpajkën ets majk ja wyajën.

⁸Yë mëj jëyujk mëti'ipë të xy'ixyën, yë'ë ja mëti'ipë të jyuuky'ätyën, ka'ap ja tyam maanë. Jäänëm ja pyëtsëma'any ëyoowtaknjoty ka'anëm ënäty nyijkx ma kyutëkoyä'änyën; ja ja'ayëty mëti'ipë ja xyëëw ka'ap kyuja'ayëtyën jap nokyjoty ma ja ja'ay ja xyëëw myintën mëti'ipë xëmëkyëjxm juuky'ajtëpën, yë'ë nëjkx mëk tjawëtë ko t'ixtëty jatëkok ja mëj jëyujk mëti'ipë të jyuuky'ätyën ets ka'ap tyam maanë, je'eyëp ko minaanp jatëkok.

⁹Yaa yaj'ixa'any pën myëët'ajtypyën ja wijy'ajt kejyajtën. Ja wëxtujkpë këpajk, jä'ä nyiwijy: yë wëxtujkpë kopk ma to'oxytyëjk y'u'unyën.

¹⁰Tëë kyutëkoy nimëkoxk ets tu'uk tyam y'ëne'emy ets ja tu'uk ka'anëm myiny. Ko myinëty, ka'ap jeky y'ita'any.

¹¹E ja mëj jëyujk mëti'ipë të jyuuky'ätyën ets ka'ap tyam maanë: yë'ë ja mëtuktujkpë ja yajkutujkpë, yajmëtyoop näjyëtu'un ma ja niwëxtujkpë ja yajkutujkpëtyën. Ënät ja nyëjkxnëty ëyoowtaknjoty.

¹²Ja waj mëti'ipë të xy'ixyën, jä'ä ja nyiwijy: nimajkpë yajkutujkpë, mëti'ipë ka'anëm tyëkëtën ënä'ämpë; tu'ktsojkyë je'eyë jyaak ita'any ets tpëktëty ja kyutujkën ets y'ënä'ämëty mëët ja mëj jëyujk.

¹³Tu'ukyë ja wyinma'any tyaj'itë ja nimajkpë ja yajkutujkpëtëjk ets myo'ojantëp ja mëk'ajtën ets ja kutujkën ja mëj jëyujk.

¹⁴Tääts mëët tsyiptuna'antë mëti'ipë yajtijpën Kupixyny U'unk; nëjkxëp myëmëta'akëtë ja mëti'ipë yajtijpën Kupixyn U'unk, jä'ä ko wintsëntëjk Wintsën ja y'ity, ets yajkutujkpëtëjk Yajkutujkpë; mëët nëjkx y'ity mëti'ipë ja Tios të wyinwitsëtën ets mëti'ipë wintëy wiinkujk mëët ja Tios y'itën.

¹⁵Ets ja tsajpjotmëtë kukäjpxy näjyëtu'un xynyëmaayës: Yë mejy mëti'ipë të xy'ixyën ma ku'into'oxy y'u'unyën, yë'ë tyijpy ja ja'ay mëti'ipë yajpatëpën maajaty ja naaxwiinyëtën, ma kanaakjëjpë ja aaw ayuk ja'ay tkajpxtën, ma ja naax kajpnën ets ma ja itjot naaxjotmën.

¹⁶Ja majkpë ja waj mëti'ipë të xy'ixyën ma mëj jëyujkën, nëjkxëp t'ëxëëk'ixtë ja ku'into'oxy ets t'ëxwopa'antë niwa'ats ëxwa'ats, nëjkxëp ja nyi'kx kyopk tsu'tsëtë ets nino'këtë.

¹⁷Tios të wyinma'anymo'ojëtë ets tuntëty mëti'ipë tsyojkpyën ko ënäty tu'ukyë ja winma'any tmëët'atë. Ënät ja kyutujkën tmo'otëty ja mëj jëyujk koonëm tpaatëty ijxtëm ja Tios të tuknipëjktaakën.

¹⁸Yë to'oxytyëjk mëti'ipë të xy'ixyën, yë'ë jëtu'un tyijpy ja mëj kajpn mëti'ipë y'ëne'empyën ja yajkutujkpëtëjk naaxwiinyëtë apëtsëmy.