Read Biblia Mixe de Quetzaltepec Apocalipsis 19 Bible Online

Apocalipsis 19 - Biblia Mixe de Quetzaltepec bible

Apocalipsis 19

¹Ko jëtu'un y'ëkjajty, ënätës nmëtooy ko mayjyä'äy kyajpxtë tsajpjotm ets mëk y'ëna'antë: Tukxoontä'äky mëjjawë yë Tios yë xyëëw nyaxëty, ja nitsokën, ja mëj'ajtën jaanty'ajtën ets ja mëk'ajtën Tios yë jyä'ä'ajtääpy,

²jä'ä ko mëtëy ets tëyajtën yë'ë tyiytyuny ets pyaye'ey. Tëë t'ëyo'onmo'oy ja mëj ku'into'oxy mëti'ipë ja naaxwiinyëtë ja'ay të tyajma'atyën mëët ja y'ëxëëktu'unën, tëë ja Tios tëytyuny ets tpaye'ey ko të yaj'o'kxëty ja tyuunpëtëjk.

³Tääts jatëkok y'ënaankojnëpë: Tukxoontä'äky mëjjawë yë Tios yë xyëëw nyaxëty. Nijëna'a yë kajpn kyatooy'ëtukëty, xëmë jam jok yaj'ixëty.

⁴Tääts ja i'px taxkpë ja mëjja'aytyëjk ets ja nimajktaxkpë juuky'ajtpë nyäkyoxtënaaytyakëtë naaxkëjxy ets ja Tios tmëjja'aw tjaantyja'awëtë, mëti'ipë u'unyääpyën ma kutujktaknën ets y'ënantë: Tukxoontä'äky mëjjawë yë Tios yë xyëëw nyaxëty.

⁵Ënät yajmëtooy ja ayuk ma ja kutujktaknën: Miitsëty, mëti'ipë myëtuuntëpën ets wyintsë'këtëpën ja Tios, mëjpë mutskpë, mëjjaw jaantyjyawëtë yë nTios'ajtëmë.

⁶Tääts nmëtooyës ijxtëm ja mayjyä'äy kyajpxtën, ijxtëm ja mëjnëë y'iitsy kyomyën ets ijxtëm ja ënääwën y'ënä'änyën: Tukxoontä'äky mëjjawë yë Tios yë xyëëw nyaxëty, jä'äkyëjxm ko yajkutujktsoony, ja Wintsën Mëti'ipë Maaytyääyëpën Winë.

⁷Nxoontakëmë, n'ijtëmë nxo'onëmë ets nmëjja'aw njaantyjya'awëmë, jä'ä ko tëë ja xëëw tpaaty ma ja Tios U'unk mëët ja jyä'äy nyäpyaata'anyën, ets mëët pyëka'any y'uuka'any, tëë ja jyä'äy nyäy'ixkukëtë.

⁸Tios tëë tyajkutuky ets ja jyä'äy nyäxyoxëtëty mëët ja oywyit poopë mëti'ipë ajajp atë'kxpën. Ja oypyë poop wit, yë'ë jëtu'un yajtijp mëti'ipë tyuuntëpën ja Tios ja nyaax kyajpn.

⁹Tääts ja tsajpjotmëtë kukäjpxy xynyëmaayës: Këxja'a: Akujk jotkujk mëti'ipë të yajwowtën ma yajnixëëwtunyën ja Kupixyny U'unk. Ets jyaak'ënany: Ya'atë jëtu'un tëy'ajtën'ajtp mëti'ipë Tios kyäjpxypën.

¹⁰Täätsës nnäkyoxtënaaytyakë tsajpjotmëtë kukäjpxy wyintum ets nwintsë'ëkëja'anyës e yë'ë je'eyës xynyëmaay: Këtii jëtu'un m'ëtë'ëtsy. Tiosës näjyëtu'un xytyuunpë'ajtp, ijxtëm mijtsën ets ijxtëm ja mmëku'uktëjkën mëti'ipë pyanëjkxtëpën ja aaw ayuk mëtëypyë, mëti'ipë ja Jesús kyajpxwa'kxën. Winjawë wintsë'ëkë ja Tios y'itëty. Ets jyaak'ënany: Ya'atë tëyajtën, yë'ë ja Tios ja kyäjpxynyajxpëtëjk winma'anymyooyë.

¹¹Tääts n'ijxyës ko ja tsajp y'ëwatsy. Jamts kyëxë'ëky tu'uk ja poop kwaay ets mëti'ipë tuk'u'unyääyëpën jä'ä xyëëwajtyp, Mëtëypyë ets ja Oypyë winë tunyën, jä'ä ko tëytyuunp, paye'epy ets tsiptuump jä'ä ijxtëm pyaat'atyën.

¹²Janty ajajp ja wyiin yaj'ixy ijxtëm ja jëënyä'änkën ets may ja kyujän tmëëtëty ma kyëpajkën. Jamts tu'uk ja xëëw kyuja'ayëty, ka'ap pën t'ijxkäpy, yi'iyë kë'ëm nyija'ap.

¹³Aak ne'pnymyëët ja wit mëti'ipë wyit'ajtypyën ets jä'ä xyëëwajtyp: Ja Tios ja y'aaw y'ayuk.

¹⁴Ets ja tsiptuunpëtëjk tsajpjotmëpë pyaye'oyë, janty oyëty ja wyit yaj'ixtë, janty poopëty, janty wa'atsëty ets aak poop këwaaykyëjxm y'u'unyëtë.

¹⁵Y'aawjoty jëtu'un jap pyëtsimy të tu'uk ja tëypyujxn mëti'ipë jëjpën, ets yë'ë mëët tyajtsëtyuta'any ja naaxwiinyëtë ja'ay. Ënät ja Tios jää y'ënä'äma'any mëët ja kutujkën. Ets yë'ë kë'ëm wyintäänäämpy ja tsatsymtsya'am ets tsatym nyëë tyajpëtsëma'any ma ja Tios mëti'ipë maaytyääyëpën winë ja tsyip y'äkë.

¹⁶Ma kyë'ëjën ets ma kyë'ëpoontyën jam tmëët'aty këxja'ay: Yajkutujkpë kopk ma ja yajkutujkpëtyën ets Wintsënkopk ma ja wintsënëtyën.

¹⁷Ënät n'ijxyës tu'uk ja tsajpjotmëtë kukäjpxy tyänë xëëwkëjxm ets ayaxp ajojkp t'ënëmaay ni'ëmukë ja jëyujk mëti'ipë kääkëtijtëpën tsajpwinm: Mintë. Nämyujkta'ajëtë ma ja Tios ja mëj a'ux tyaka'anyën.

¹⁸Mintë ets xytsyu'utstëty xyjyë'kxtëty ja yajkutujkpë, ja tsyiptuunpëtëjk, ja jotmëkja'aytyëjk; näjyëtu'un xytsyu'utstëty ja kwaay ets mëti'ipë tyuk'u'unyääytyëpën. Oy tyimtiijëty xytsyu'utstëty, wä'än tkamëtuunpëty, wä'än tyajja'aytyuunpëty, wä'än tmëj tmutskëty.

¹⁹Tääts n'ijxyës ja mëj jëyujk ets ja naaxwiinyëtë yajkutujkpëtëjk mëët ja tsyiptuunpëtëjkëty, tëë nyämyujkta'ajëtë ets mëët tsyiptuna'antë ja ja'ay mëti'ipë ja poop kwaay tyuk'u'unyääpyën ets ja tsyiptuunpëtëjkëty.

²⁰E yajmajts ja mëj jëyujk mëët ja käjpxynyajxpë win'ë'ëmpë, mëti'ipë ënäty ja mëj jëyujk ja myëj'ajtën të tyaj'ijxën yë'ë wyintuuy, ijxtëm ja Tios ja jyä'äjën ets tukwin'ëëny mëti'ipë ënäty të tkupëktën ja mëj jëyujk ja tsya'a ets të twintsë'ëkëtë ja awinax. Ënät ajuukyë nimäjtsk yajkujëpijpëtyë ma ja mejy tyoyën mëët ja azufre.

²¹Ja wiinkpë, ojts y'o'kta'atë mëët ja tëypyujxn mëti'ipë jap y'aawjoty pëtsëëmpën mëti'ipë tyuk'u'unyääpyën ja poop kwaay ets ni'ëmukë tsyu'tstaayëtë ku'uxyë ja jëyujk mëti'ipë kääkëtijtëpën.