Read Biblia Mixe de Quetzaltepec Apocalipsis 20 Bible Online

Apocalipsis 20 - Biblia Mixe de Quetzaltepec bible

Apocalipsis 20

¹Ënät n'ijxyës ko tu'uk ja tsajpjotmëtë kukäjpxy kyëtä'äky tsajpjotm tsyoony, ëyoowtakn ëwatsn myëët'ajtyp ets tu'uk ja mëj puxn tejpxy.

²Tyaapë tsajpjotmëtë kukäjpxy myajts ja mëj tsa'any mëti'ipë yajtijpën mëjku'u ets Satanás ets tkë'ëtsuumy tekytsyuumy mëët ja mëj pujxntejpxy ets jëtu'un tu'uk mil jëmëjt y'itëty tsumy matsy.

³Tää tkujëpijpëy ëyoowtaknjoty ets tku'ëkëëy ets ja y'akë'ë tpëjktakëy ja nyi''ijxwë'ëmën, jëtu'unts ka'ap t'ëkwin'ë'ënëty ja naaxwiinyëtë ja'ay koonëm tu'uk mil jëmëjt nyaxëty. Ënätnëm yajnajtsmatsëty jayiin jawään.

⁴Ets n'ijxyës kanaak ja kutujktakn, yë'ë jam u'unyääytyëp mëti'ipë ënäty të t'ëxajëtën ja kutujkën ets pyaye'eytyëty; ets n'ijxyës näjyëtu'un ja y'anëmëty mëti'ipë të yajkupuxtën mëët ko të tkajpxwa'kxtë ja Wintsën Jesús ja jyä'ä ets ja Tios ja y'aaw y'ayuk ets mëti'ipë ënäty ka'ap të twintsë'ëkëtën ja mëj jëyujk ets ni të tkakupëktë ets yajtsa'atëty wyimpokëjxm ëkë kyë'ëkëjxm; ets n'ijxyës ko jyuukpyëktë jatëkok ets yajkutuka'antë mëët ja Kristë tu'uk mil jëmëjt.

⁵E ja wiinkpë ja o'kpëty, ka'ap ojts y'ëkjuukpyëjknëtë, jëtu'un nyäjxy tu'uk mil jëmëjt. Yë'ë ya'atë ma më''ëka'any ja o'kpë jyuukpyëktën.

⁶Akujk jotkujk jyuuky'atë mëti'ipë jëwyiin juukpyëjktëpën. Yë'ë jëtu'un ja Tios jä'ä''ajtëtëp ets ka'ap ja ëyo'on tpaata'antë mëti'ipë xëmëkyëjxm ijtpën. Teety y'itëty mëti'ipë Tios myëtuuntëpën ets ja Kristë mëët yajkutuktëty tu'uk mil jëmëjt.

⁷Ko ënäty të nyäxy tu'uk mil jëmëjt, ënät ja mëjku'u yajnajtsmatsëty

⁸ets ja naaxwiinyëtë ja'ay twin'ëëna'anëty tu'ktsajp'akëtä'äky, jëtu'un ja Gog ets Magog nyämyukëtëty tsiptuunpë mëët ni'ëmukë ja tsyiptuunpëtëjkëty.

⁹Ënät t'aye'eytyääytyë mapaat ja naaxwiinyëtë y'ëwëtityën ets tyajnatujktaaytyë maajaty yajpaatën mëti'ipë ja Tios kajpn'ajtëtëpën, ja kajpn mëti'ipë Tios tsyojkpyën. E Tios yajkëtak ja jëën tsajpjotmëpë mëti'ipë yaj'o'ktaayëtën.

¹⁰Ets ja mëjku'u mëti'ipë ënäty të twin'ëënyën ja mayjyä'äy, nän jap ja yajkujëpijpëy ma ja mejy tyoyën mëët ja azufre, ma ënäty të yajkupipëtën ja mëj jëyujk mëët ja mëti'ipë ja Tios kyäjpxynyajxpë nätyijëpën. Japts y'ëyowëty xëmëkyëjxm, xëënaxy tsuunaxy.

¹¹Ënät n'ijxyës tu'uk mëti'ipë u'unyääpyën ma ja poop kutujktaknën. Winëjaty tyimtëkooytyääy yë'ë wyintum wyinkujkm: ja tsajp ets ja naax, nimaa tii kya'ëkyaj'ijxnë.

¹²Ets n'ijxyës ja o'kpë jam tyänëtë mëj mutsk kutujktakn wintum. Tääts ja noky ojts yaj'akëëywyä'kxy ets yaj'ixy wi'ix të tyuntën nitu'ukjaty, ets näjyëtu'un wiinkpë noky ojts yaj'akëëywyä'kxy ma ja ja'ay ja xyëëw jap y'itën mëti'ipë xëmëkyëjxm juuky'ajtëpën. Jëtu'unts ja o'kpë ni'ëmukë yajpaye'eytyë.

¹³Ja mejy ojts ja y'o'kpë tkë'ëyäky, ets ja o'kpë kutujktakn ojts tkë'ëyajkta'ay ja o'kpë jënu'un ënäty jap yajpaatën ets tu'kë'ëyë yajpaye'eytyääytyë wi'ixjaty tii të tuntën oy ka'oy.

¹⁴Ënät jap yajkujëpijpëy jëënjoty, nëëmejyënpë kyëxë'ëkyën. Ya'atë jëën, nëë mejypyën kyëxë'ëkyën, yë'ë ja mëmäjtskpë ja o'kën.

¹⁵Jap yajkujëpijpëtyääytyë mëti'ipë ja xyëëw ka'ap y'akëxë'ëkën nokyjoty mëti'ipë juukyajtënmëëtën.